Etekiera 37 - Kiribati New Version Bible

A manga maiu taian rii aika a m'au

1Tabeua te tai i mwiina, I a manga namakina m'aakan te UEA b'a e niniai, ao E uotai nako Tamneina nakon te m'arua ae e onrake n taian rii.

2E kaneweabaai te UEA iai, ao I noori taian rii aika a m'au n raea n taabo nako.

3Ao E taku, “Etekiera ae natin te aomata, a na konaa ni manga maiu taian rii aikai?”

Ao I kaeka, “Bon ti Ngkoe te UEA ae te Atua ae Ko konaa ni kaeka anne.”

4Ao i mwiina e tuangai b'a N na taetae ni kaangai:

Taian rii aika kam m'au, kam na ongora nakon ana taeka te UEA nakoimi,

5N na ikeike nako aomi Ngai ae te UEA ae te Atua, ao kam na manga maiu.

6N na kabutaa n rabuningkami n taian iia ao te kun ao N na uka te ike ni maiu nakoimi. Ao i mwiina, kam na ataai iai b'a bon te UEA Ngai.”

7Ao I karaoa te b'ai are E tuangai te UEA, ma i m'aain banen au taeka, I ongo taian keruaatai. A manga toma taian rii!

8I noori taian iia ao te kun n rabuna te rii, ma bon akea te maiu i nanoia.

9Ao i mwiina, E taku te UEA:

Etekiera, ko na kaangai ngkai nakon te ang, “E tuangko te UEA b'a ko na uki man taabo nako ao ko na uka te ikeike ni maiu nakon taian rab'ata aika a mate aikai, b'a aonga ni manga maiu.”

10I mwiin taekinan arei, ao e a uki naba te ang nakon taian rab'ata akekei, ao a manga maiu! A bane n teirake, ao e bon m'aiti aia koraki n te aro are a konaa ni katea te taanga ni buaka ae e korakora.

11Ao E taku te UEA:

Etekiera, ti te bo Iteraera ma taian rii aika a mate. A ngurengure b'a a m'au n te aro are akea kaantaningaan boong aika a na roko irouia.

12Ma ngaia ae ko na tuangiia ni kaangai, “I berita Ngai ae te UEA ae te Atua, b'a N na kauki taian ruanimate ma ni kainaomataingkami. N na manga kaokingkami nako Iteraera,

13ao kam na ataia b'a te UEA Ngai ngkana e koro bukin anne.

14E na anganingkami Tamneiu te ikeike, ao kam na manga maiu. N na kaokingkami nakon mwengami, ao kam na ataia iai b'a I kaawakina Au berita. Bon aei Au taeka Ngai ae te UEA.

Manga Ikotakiia Iuta Ma Iteraera

15E taku te UEA:

16Etekiera ae natin te aomata, anaa te kai ao korea i aona ae e kaangai, “Te abanuea are Iuta.” I mwiina, ko na anaa te kai riki teuana ao korea i aona ae e kaangai, “Te abanuea are Iteraera.”

17Ko na taui kaai aika uoua aikai tabon are teaina n tomaia ma tabon are teaina, n te aro ae kaanga ai aron ae ti teaina te kai.

18Ao ngkana a titirakiniko aomata b'a tera nanona,

19ao tuangiia b'a N na manga tomai n ti teuana kain Iteraera ma kain Iuta. N na taui n ti teuana i nanoni baiu, ao a na riki n ti teuana.

20Ko na taui kaai aikai n te aro are e ko na nooraki irouia aomata nako.

21ao i mwiina, ko na kaangai:

N na manga ikotiia Iteraera ma ni kaokiia nakon mwengaia mairouia botannaomata ianena ake a maeka iai ngkai.

22N na karikiia b'a te botannaomata ae ti teuana ao N na manga kamaekaia n te aba are Iteraera, A na tautaekanaki iroun te uea ae ti temanna, ao a na aki manga tib'auaaki nakon uoua te botannaomata.

23A na aki manga taromaurii taian bouannanti ma ni karaoi m'akuri aika I aki kukurei iai. N na teboki aia bure ni kanakoi ma ni kaitiakiia, ao N na kaawakiniia man b'aai nako aika a na kam'araa iai. A na riki b'a Au aomata. ao N na riki b'a Atuaia.

24E na uea i aoia temanna ae e nako mairoun Au toro are Tawita. A na bane n ikotaki i aan temanna te tia tautaeka ao a na ongotaeka nakon au Tua nako.

25A na maeka ma aia kariki n te aba are I angan Au toro are Iakob'a, te aba are a maeka iai aia bakatibu. A na maeka ikekei n aki toki, ao ai uana naba ma natiia ma aia kariki nako. E na uea i aoia te aomata ae ai aron au toro are Tawita n aki toki.

26I berita raoi b'a N na kakab'aiaia Iteraera n te rau ae akea tokina. N na kakawakiniia ma ni karikiia b'a te botannaomata ae e korakora. E na tei au Tembora i aon Iteraera n taai nako,

27ao N na maeka i buakoia Au aomata ao N na riki b'a Atuaia.

28A na bane n ataia botannaomata n te aonnaba ae e mena au Tembora i Iteraera ao I a tia n rineia Iteraera b'a Au aomata.