Tani Motiki-taeka 6 - Kiribati New Version Bible

1Ao a manga waakina naba aia aki ongotaeka Iteraera nakon te UEA, ma ngaia are, E a anga ngaiia nakoia kaain Miiria b'a a na tauaki taekaia irouia i nanon 7 te ririki.

2Ao a rangi ni buakaka aroia kaain Miiria nakoia Iteraera, ma ngaia are, a birinako Iteraera nakon te naani maunga ni karabaia n te naan nangananga ni b'a.

3Ni katoa te tai are a ribanai arokaia iai Iteraera, ao a aki toki n roko kaain Miiria ni buakaniia ma kaain Amareka ao botannaomata ake i mainiku.

4-5A roko i aon aia kaamero, ma ni katei aia autinrianna, ao a kam'arakeia aia man n arokaia Iteraera maikanne ni karokoa te kaawa are Kaata. A iraei taian am'arake kaain Miiria, n reitaki ma taian tiibu, taiani kao, ao taian aati. A aki kona ni warekaki m'aitiia b'a kaanga ai aroia taian taanga n rookati, A tiringi arokan aaba ake a mena i m'aain kawaia.

6-7A anai b'aai ni kabane kaain Miiria ake aia b'ai Iteraera, ao a bubutiia te UEA Iteraera.

8-9Ao E kanakoa te burabeti nakoia ma te rongorongo aikai:

Bon te UEA Ngai ae Atuaia Iteraera, ma ngaia are, kam na ongora nakon te b'ai ae N na taekinna. Bon taian toro ngkoa ngkami i Aikubita, ao I kainaomataingkami ni kaotinakoingkami mai Aikubita nakon te aba aei. Ao ngke a manga karawawataingkami kaain botannaomata ake ikai, ao I kamaiungkami ni katokanikaingkami i aoia ma n taua abaia.

10Bon Atuami Ngai, ao I tuangingkami b'a kam na aki taromauriia atuaia kaain Amora, e ngae ngke kam a maeka n te aba are a maeka iai kaain Amora. Ma kam aki kan ongo irou.

Rineakin Kiteon Iroun Te UEA

11Ao n te tai teuana, te UEA e kanakoa ana Anera nakon te kaawa are Obera, ao e tekateka te anera arei i aan te aroka ae buubura are arokan Ioati, are kaain te kaainga are Abietera. Ao e tabe n oroi kunin ana uita Kiteon n te m'anono ae kaan ma te anera arei, n te tabo ae aki kona n nooraki iai irouia kaain Miiria.

12Ao e kaoti te anera nakon Kiteon ao e taku nakoina, “E na buokiko te anera, ao ko na riki b'a te tia buaka ae korakora.”

13Ao e taku Kiteon, “Ngkana e koaua ane ko taku, ao e aera ngkai a riki taiani kaangaanga aikai? Ti a tia n ongo rongorongon taiani kakai aika E karaoi, ao kamaiuaia ara bakatibu mai Aikubita. A riki aron aikai n taai ake ngkoa. Ao ngkai, E a tia ni manga kiitaniira te UEA ni kawariia kaain Miiria.”

14Ao E taku te UEA, “Ko na korakora Kiteon, b'a I anganiko te m'aaka ni kamaiuia Iteraera mai rouia kaain Miiria.”

15Ao e taku Kiteon, “Ma N na kanga ni kamaiuia Iteraera? Bon te kaainga are rangi ni mangori mai buakon kaaingan Manate au kaainga, ao boni ngai naba te kabanea ni mangori man au utu.”

16Ao E taku te UEA, “Kiteon, ko kona ni kamaiuia Iteraera i bukina b'a N na buokiko. E na bon rangi ni beebete kataenikaiaia kaain Miiria b'a kaanga ai aron kataenikaian te aomata ae ti temanna.”

17Ao e taku Kiteon, “I bon aki konaa ni kakoauaa b'a I a taetae ma te UEA. Taiaoka, karaoa te b'ai teuana ae N na kakoauaa iai b'a te UEA ngkoe.

18Ao ko na taningaai ikai b'a N na angakarea nakoim.”

Ao E taku te UEA, “E tamaroa, N na taningaiko.”

19Ao e okira ana auti Kiteon, ao e tiringa te kooti ae uarereke, ao e a kaburoa irikona. Ao i mwiina, e kauka te baeki ni buraawa, ao e karaoa te kariki ae manii mai iai. Ao ngke e a m'ai te iriko, ao e karinna n te b'atiketi, ao e kab'aroa ranna nakon te b'aata te kaatiibu. E ana te iriko, ma ranna, ao te kariki, ao e katikui i aan te aroka are buubura arei.

20Ao e taku ana anera te UEA, “Kiteon, katuka te iriko ma te kariki i aon te b'a aei, ao kab'aroa ranna i aoia.” Ao e karaoa te b'ai are tuangaki Kiteon.

21Ao e taua te oko te anera i nanoni baina, ao e korea iai te iriko ao te kariki n tabon okona. Ao e kiba te ai man te b'a ao e kabuoka te iriko ma te kariki.

Ao ngke e taratara nako Kiteon, ao e a akea te anera arei.

22Ao e a ataia Kiteon ae e a tia n noora ana anera te UEA ao e a tang, “O, N nang boni mate.”

23Ao E taku te UEA nakon Kiteon, “Karaua nanom, bon akea te b'ai ae ko na maaku iai. Ko na bon aki mate.”

24Ao e karaoa te baonikarea Kiteon i bukin taromaurian te UEA, ao e aranna b'a “E kamaunanakoi makura te UEA.” Ao bon are e tei naba ngkai i Obera, te kaawa are i abaia kaain te kaainga are Abietera.

Uruan Ana Baonikarea B'aara Iroun Kiteon

25Ao E a manga taetae naba te UEA nakon Kiteon n te tairiki arei:

“Anaa ana kaom'aane tamam ane ana kauoua n tamaroa ae tuai ni koromangeaki ae ai tib'a 7 ana ririki ni maiu. Ko na kamanena te kaom'aane anne ni katika ni kab'aka iai te baonikarea are tataromauria iai B'aara tamam, ao koroi taiani baangota akana i rarikin te baonikarea.

26Ao i mwiina, karaoa te baonikarea i bukin taromauriau i aon kabanean rietaatan te tabuki are e tei iai te kaawa. Kabonganai taian atiibu aika aiakirake i bukin baonikareau, tiaki ti taiani b'a aika a kauataorake. Koroi taiani kai man te boua, ao kam'aaka te ai, tiringa te kaom'aane ae tuai koromangeaki, ao kabuokia b'a te karea nako iu.

27Ao e rineia 10 ana toro Kiteon b'a a na buokia, ao a karaoi b'aai ni kabane ake E taekin te Atua. Ao i bukina ngke e maaku Kiteon irouia ana utu ma kaain te kaawa, ngaia are e karaoi b'aai ni kabane n te tairiki.

28Ao ngke a uti kaain te kaawa n te bong are i mwiina, ao a noora baonikarean B'aara b'a e a b'aka, ao a tia naba ni koreaki taiani baangota. Ao i mwiina, a ataia b'a ngaia e a tia n anga te aba te karea are te kaom'aane i aon te baonikarea are boou.

29Ao a taku, “Antai ae kona ni karaoa te m'akuri aei?” Ao a bon titiraki i bon irouia ni karokoa e a kaangai temanna mai buakoia, “Bon ana m'akuri teuare Kiteon are natin Ioati.”

30Ao a m'ananga m'aanen te kaawa arei nakon Ioati ao a taku, “E a tia natim are Kiteon n urua baonikareani B'aara, ao e koroi baangota ake i rarikina. Ko na anganiira natim anne b'a ti na tiringnga.”

31Ao a keekeerake aomata, ao e a taku naba Ioati, “Kam kataia n irataangan B'aara? Kam na kamaiua B'aara? B'a ngkana ngkami, ao kam na bon tiringaki ni kaarangainan te ingabong. Ngkana bon te atua B'aara, ao ke e bon irataangana i boni i rouna ni kamatea te aomata are urua ana baonikarea.”

32Ao ni bon te bong naba arei, ao Ioati e a kab'aka naba aran Kiteon nakon Ierub'aara, ae nanona, “Te aomata are e urua baonikarean B'aara.” Ma ngaia are, ke e bon irataangana B'aara i bon i rouna.

33Ao a bane ni bootaki kaain Miiria, Amareka, ao botannaomata ake i mainiku, ao a ri nanon te Karaanga are te Ioretan. Ao i mwiina, a buakana abaia Iteraera, ao a katea aia maeka n te M'arua are Ietireera.

34Ao E ninia Kiteon tamnein te UEA, ao e katanga te kanikina Kiteon n te bu n tuangiia kaain te kaainga are Abietera b'a a na iria.

35Ao e kanakoa naba ana rongorongo nakoia te baronga are Manate, Atera, Teburun, ao Nabetari, n tuangiia m'aanen baronga aikai b'a a na botiia aia taanga ni buaka. Ao a m'ananga nako ni kaaitaraa aia maeka aia kairiribai.

36-37Ao e tataro Kiteon nakon te Atua ni kaangai, “I ataia b'a Ko berita b'a Ko na buokiira ni kamaiua Iteraera, ma I tangira te b'ai ni kakoaua. N na katokaa te burae n tiibu i aon te atiibu are raababa are n te tabo ni kaaki kun ni uita arei. Ao ngkana Ko na buokai ni kamaiuia Iteraera, ao Ko na karika te aoi i aon te buraentiibu, ma e na bon tiku ni m'auteretere te burae n tiibu.”

38Ao bon anne te b'ai are e riki. N te karangaina are i mwiina, e uti Kiteon ao e nako n noora te buraentiibu arei. Ao e ongira te ran man te b'aub'au ni kanoa te boora iai.

39Ma e a manga tataro riki Kiteon nakon te Atua ni kaangai, “Taiaoka n aki un irou. Kariaia b'a N na kata riki te b'ai aei te kabanea n tai, b'a I aonga ni koaua raoi b'a Ko na boni buokai. N te tai aei ngkanne, e na manga m'au te buraentiibu, ao e na m'aim'ai te atiibu ae raababa aei n te aoi.”

40Ao n te tairiki arei, E kam'aim'aa te atiibu are raababa arei te Atua n te aoi, ao e kam'aua te buraentiibu.