Te Tua-Kaua 21 - Kiribati New Version Bible

Te Tiriaomata Ae Aki Reke MannaAo e taku Moote nakoia Iteraera:

1Ngkana tao arona b'a e kuneaki te aomata ni mate i nanon te katawanang, ao e aki reke maana b'a antai ae tiringnga.

2Ao taani moti ma taani kairiiri ake tabem'aang man kaawa akana i rarikina a na kakaaea b'a te kaawa ra ae te kabanea ni kaan riki nakon te tabo are kuneaki iai te aomata are mate.

3Ao a na nako taani kairiiri man te kaawa anne nakon aia nanai ni kao, ao a na rinea te kao te tei ae te aine ae tuai kam'akuraki.

4-5A na uota te kao aei taani kairiiri, ao tabeman taian ibonga nakon te m'arua ae kaan ae iai te karaanga n ran iai ike akea iai taian uita ma b'aare. Ao ngkana a roko n te m'arua, ao a na otea roroan te kao taani kairiiri.

A na riai ni mena ibonga ikekei i bukina b'a E a tia te UEA n rineia b'a ana taani m'akuri aika raka n taabo n taromauri. E a tia n rineia te UEA b'a a na kakab'aiaia aomata n arana, ma ni motikitaekaia n taian kabowi, i bukin te aro ni b'aib'ai ke te kaikoaki.

6A na teboki baiia taani kairiiri man te kaawa i aon rab'atan te kao are mate

7ao a na kaangai, Bon akea rekerekera ma te tiritiri aei, ao ti aki ataa naba ae karaoa te m'akuri aei.

8-9Ma ti butiiko te UEA ngkai e tiringaki te aomata ae akea ana bure, b'a Ko na butim'aea ara karea aei i bukin kab'araan aia bure Iteraera. Bon am Aomata ngaira, ao Ko kamaiura ngkoa. Ma ngaia are, ti butiiko b'a Ko na aki katuaaira i bukin te bure aei.

Ngkana kam ongotaeka nakon te UEA ma ni karaoi baikai, ao E na kab'ara aia bure Iteraera.

Mareakin Te Aine Ae Te TaenikaiAo e taku Moote nakoia Iteraera:

10Ane a roko taai aika ko na riki iai b'a te tautia ma n nako ni buaka. Ane E na buokiko te UEA ae atuam n tokanikai i aoia am kairiribai, ao ane ko na uotiia rikaaki buure aikai bati.

11-13Ao ngkana arona b'a e botonaine temanna mai buakoia ami bure, ao ane ko na tangiria n iein ma ngaia. Ma te moani b'ai, ko na uotia moa nakon am auti, ao ko na koromaraia, ma ni koroi naba ukin baina, ma ni kanakoi kunnikaina ake mai abana, ma ni karin i aona kunnikain Iteraera, ao i mwiina, e na tang i bukiia tamana ao tinana, ao i mwiina ko a tib'a kona ni mare ma ngaia.

14Ao i mwiina, ngkana ko a manga aki kukurei i rouna, ao ko a manga raure, ao e kona n inaomata n nako. Ma ngkai ko a tia ni matu ma ngaia n aron te bu, ao ko na aki kona ni kabooa nako n aron te toro, ke n anaia b'a am toro.

Aia B'ai Karimoa Mm'aaneAo e taku Moote nakoia Iteraera:

15-17Ngkana tao arona b'a uoman buun te m'aane temanna, ao e tangira riki are temanna nakon are temanna. Ao ane moan bungiia natina te karimoa te m'aane mairouia aine aikai, ao e na atongaki b'a a na karimoa te m'aane anne, e aoria naba ngkana natin te aine are e aki bati n tangiraki iroun buuna. Ao ngkana e a kara te m'aane ma ni kaaniia matena, ao e na kataboroa tib'an te karimoa te m'aane, ti i bukina ngke bon te moan bungiaki ngaia.

Te Nati Te Mm'aane Ae KamoamoaAo e taku Moote nakoia Iteraera:

18Ngkana e reke natiia kaaro ae te nati te m'aane ae taningabono ma ni kamangao nakoia ana karo, ma n raarawa n ongotaeka irouia e ngae naba ngkana e a tia ni katuaaeaki.

19Ngkana anne aron te nati te m'aane, ao a na katikitikia ana karo nakon mataroan te kaawa, ike a kakaraoa iai aia bowi taani kairiiri.

20Ao a na tuangiia taani kairiiri ni kaangai, “E rangi n taningabono natira te m'aane aei, ao e aki ongotaeka. E aki toki n mamanging, ma ni kakaei taian takakaro.”

21Ao a na karebanaa te nati te m'aane anne n taian atiibu m'anen te kaawa anne ni karokoa matena, b'a e aonga ni mauna nako te m'akuri ae buakaka ae karikirakea te aomata anne man te kaawa anne. Ao ane a na maaku iai Iteraera ngkana a ongo aron katuaaean te aomata anne.

Rab'atan Te Tia BureAo e taku Moote nakoia Iteraera:

22Ngkana e tiringaki te tia bure, ma ni katinea rab'atana i aon te aroka,

23ma kam na aki katuka rab'atana ikanne ni karokoa te moaningabong. Kam na taunna naba n te bong anne, b'a rimwi ao e na kamaraia aon te aba ni kabane te UEA i bukin te rab'ata ae mate. E anganingkami te aba aei te UEA b'a abami, ma ngaia are, kam na aki kam'araea aon te aba ni katuka rab'atan te tia bure i aon te aroka.