Iobi 5 - Kiribati New Version Bible

Te Wewete i bukin kainanoan te i buobuoki

1E wewete Iobi, ni kakaea buokana

ao nooria b'a iai te anera ae roko!

2Te nanobaba ma te bakantang

e na boni kona n tiringko iai.

3I a tia n nooria aomata aika nanobaba b'a a buuti wakaaia

ma te Atua e karokoa te maraia,

ao e rina koutiarake

4ao ni katikuia natiia

n akea ae kani kamaiuia i nanon taian kabowi.

5A na kanaki uaan arokaia aomata aika nanobaba irouia aomata aika bora ni baki

a na kang naba taian uaani kai aika uangingi i buakon kateketeke

ao aika borantaka ana mataiakina kaub'aina.

6E aki bwebwerake te buakaka mai nanon te bon,

ao e aki rikirake naba man te tano.

7E bon aki! E bon karika te kangaanga te aomata i bon i rouna,

kaanga ai aron te m'aakaro n ai ae e kibanako mai nanon te ai.

8Ngke tao arona b'a Ngai ngkoe,

ao N na rairaki nakon te Atua ma n uotirake kaetan taekau i matana.

9Ti aki kona n atai b'aai aika ab'ab'aki aika E karaoi,

ao bon akea tokin m'aitin Ana m'akuri aika kamimii.

10E kanakoa te karau nako aonteaba,

ao E teboki taian tawaana.

11Eng, bon te Atua ae kateirakea te aomata ae nanorinano,

ao E kakukureia aika tangi ni wenei ni kabane.

12E aki kakoroi bukin aia babaire aomata aika taan minotiia aomata,

13ao E karaoia aomata aika rabakau b'a a na m'ane ni bon oin aia babaire

n te aro are e aki koro bukin te b'ai teuana ae a karaoia;

14e ngae ngke te tawanou, ma a na kakaae nako baiia n te rootongitong

15Ma E kamaiuia aomata aika kainano te Atua man te mate;

E kamaiuia aika kainano man te karawawataaki.

16E anga te kaniwanga nako ia aika akea aia b'ai,

ao E katoki karongoaaia aika buakaka.

Kaota Arom n Tetekeraoi

17E na kukurei te aomata ae kaetaki arona i roun te Atua!

Tai kauna nanom ngkana E boaiko.

18E bauti taian ikoaki te Atua ake bon mwiina;

E kaikoakiko baina,

ao E kamaiuko naba baina.

19E na kamaiuko te Atua

man te b'ai ae kamamate

n te tai teuana ma teuana.

20E na kamaiuko ngkana e roko te rongo,

ao e na kawakiniko man te mate ngkana e roko te bo ni buaka.

21E na kamaiuko te Atua

man taian taeka ni kabuakaka

E na kamaiuko ngkana e roko te urub'ai.

22Ane ko na ngare

n tain te kangaanga ma te baki,

ao ko na aki maakui

maan aika tiritiri.

23Ane a na akea atiibun te tawaana ae ko kamaraua aona;

ao a na akea maan aika tiritiri aika na roko n aki karauko.

24Ao i mwiina, ko na maiu ma te rau i nanon am auti n rianna,

ao ngkana ko taraia am tiibu, ao ko na nooria b'a a na mano man taian kangaanga.

25Ao ane a na reke natim aika m'aiti

ae kaanga ai aron bwebwen te uteute n te tawaana.

26Kaanga ai aron te uita ae tai raoi n tain te tai,

ao ai arom naba b'a ane ko na maiu

ni karokoa rokom raoi n am bong ni kara.

27Iobi, aio te koaua ae tia a tia ni kakaaea n te tai ae rangi ni maan.

Bon te koaua raoi, ma ngaia are, ko riai ni kakoaua.