Te Tua-Kaua 3 - Kiribati New Version Bible

Konaakin Uean Batian Are Oka(War 21.31-35)Ao e taku Moote nakoia Iteraera:

1Ao ngke ti rairaki nakon te kawai are nako Batian, ao e kaotinakoia ana taanga ni buaka ni kabane te uea are Oka ni buakaniira i Eterei.

2Ma E taku te UEA nako iu, “Moote, ko na aki maaka te uea are Oka. N na buokiko ni kataenikaia ma ana taanga ni buaka ma n taua abana. Tiringiia ma ana aomata, n aron are ko karaoia ngkoa nakon uean Amora are Taion are maeka i Etibon.”

3E buokiira ara UEA ae Atuara n tiringa Oka ma ana taanga ni buaka ma n taua abanueana ni kabane are Batian, n reitaki ma aonon Arekoba.

4A m'aiti taiani kaawa aika uarereke i nanon abanueana,

5ao onoua kaawa aika iai ooia aika rietaata, ao mataroaia aika rokanaki n taiani kai aika bangaki, ao iai naba kaawa aika a aki ooaki.

6Ti kamaunai kaawa aikai ni kabane n akea nikiraia, ao ti tiringiia ni kabane m'aane ma aine, ao ataei n aron are ti karaoi naba nakon kaawa ake ana kaawa te uea,

7ma a na kaawakinaki taian nanai ni man aika kawakawa ma baika a kakaawaki ni kabane.

8“A tia n tautaekana te abanuea are Amora are i mainikun te Karaanga are te Ioretan uea ake Taion ao Oka. E moa abaia man te Karaanga are te Arenon i maiakin te Maunga are Oman are i meang, ao a reke iroura ni kabane.

9E aranaki te Maunga are Oman irouia kaain Titon b'a te Maunga are Tirion, ao e aranaki b'a te Maunga are Tenira irouia kaain Amora.

10Ti taui kaawa ni kabane ake n aaba ake a rietaata, ao n kabane ake i Batian, ao ni kabane ake i Batian ni karokoa Tareka ao Eterei, kaawa ake uoua ake e tautaekani Oka.”

B'aokin Maten Oka

11Te uea ae Oka bon te kabanea mai buakoia taian Rebaim E karaoaki man te b'a ae roro ae matoatoa, ao bon 13.5 te buuti ab'akina ao 6 te buuti rababana.

Tib'aakin Aaba Ake I Mainikun Te Karaanga Are Te Ioretan(War 32.1-42)Ao e taku Moote nakoia Iteraera:

12“I anga tabeua te aba mai buakon aaba ake ti taui nakoia te baronga are Reuben, ao Kaata. E moanaki tib'aia mai meangin te kaawa are Aroera are e kaan ma te Karaanga are te Arenon, ni ikotaki ma tabeua kaawan Kireata ake a kirimaungaunga.

13Iteran te baronga are Manate I anganiia nikiran Kireata, ni ikotaki ma Batian ni kabane, are e tautaeka ngkoa iai Oka.

Batian bon abaia te naan Rebaim.

14Iaira, boni kaain te baronga are Manate, ao e abana te aono are Arekoba, ae boni Batian, ao e toki i Keturi ma Maaka. E ingoani kaawa aikai n arana, ao a ataaki naba n araia ae Ana Kaawa Iaira.

15I anga Kireata nakon utuun Makira are natin Manate.

16Ao te baronga are Reuben ma Kaata I anganiia aonon Kireata n toki te Karaanga are Arenon. Nuukan Arenon bon tiaia mai maiaki, ao tiaia mai meang bon te Karaanga are Iaboka, are bon tian naba abaia kaain Ammon.

17Tiaia mai maeao bon te Karaanga are Ioretan, are e moa mai meang man te Naman Kariraia n ruorikaaki nakon Taari are Mate i maiaki n toki i aan te Maunga are Bitika i mainikuna.”

18-19Ao I kaangai nakoia m'anen baronga aikai Reuben, Kaata, ao Manate Mainiku:

E tuangai te UEA ae Atuara b'a N na anganingkami te aba aei ma kaawa, ao I a tia ni karaoa anne. A kona n tiku ikai buumi ma natimi ma ami nanai n tiibu ao kooti aika bati, ao ami nanai ni kao aika bati. Ma ngkami m'aane ake kam kona ni ira te taanga ni buaka kam na ri nanon te Karaanga are te Ioretan ni buokiia baronga ake tabeua, i bukina ngke bon ami koraki.

20E na karaoia te UEA b'a a na taenikai botannaomata irouia ake aia kairiribai ake mai maeaon te Karaanga are te Ioretan ma n taua abaia. Ao i mwiina, kam kona n okira ikai nakon te aba ae I a tia n anganingkami.

21-22Ao i mwiina, ao I taku nakon Iotua, Ko bon noora aron te UEA ae Atuara ni buokiira n tiringa te uea are Taion ao te uea are Oka. Ma ngaia are, ko na aki maaku. E na buaka te man ami itera n taabo nako ike kam nako iai ma ni buokingkami ni kamaunaia ami kairiribai.

Aki Kariaiakan Moote Iroun Te Atua B'a E Na Rin I KanaanAo e taku Moote nakoia Iteraera:

23Ao I kakorakoraai n tataro ma ni bubuti ni kaangai,

24Ara UEA, e tara n ae Ko a tib'a tabe ni kaota m'aakam ae korakora nako iu. Bon akea atuan karawa ke te aonnaba ae kona ni karaoi b'aai aika ab'ab'aki aika ko karaoi.

25E rangi n tamaroa te aba are i maeaon te Ioretan. Taiaoka, kariaia b'a N na ri nanon te Ioretan ma n noori taian tabuki ma Maungan Reb'anon.

26Ma E un te UEA irou i bukimi ngkami aomata, ao E aki kan ongo. Ao E taku, E bati n tau anne. I bon aki kani manga ongo riki mai roum.

27Ko na tam'arakea te Maunga are Bitika ao tara meang, maiaki, mainiku, ao maeao. Karaua taraia b'a ko na aki ri nanon te Karaanga are te Ioretan.

28E na kairiia Iteraera Iotua n ri nanon te Ioretan n taua te aba, ma ngaia are, ko na buokiia ni kakorakora ma ni kauna nanona, ao tuangnga te b'ai ae na karaoia.

29Ao i mwiin aei, ao ti a manga tiku n te m'arua are Beta Beora.