I-Rom Taekan te Boki Aei - Kiribati New Version Bible

Taekan te Boki AeiE a koreaki te reta aei b'a e na katauraoaki kawaini B'auro i bukin rokona i Rom, n ai aron are e a tia ni baireia. E kaantaningaia b'a e na m'akuri i buakoia Kristian ikekei i nanon tabeua te tai, ao i mwina e na wakina nako kawaina nako Tibein. E a oti n te reta aei ana atatai B'auro n te onimaki ni Kristian, ao aron te onimaki aei n noraki ni baika a karaoi Kristian ni maiuia.I mwini kamauraia kaain te ekaretia i Rom irouni B'auro, ao i mwin taekan ana tataro i bukiia, ao e a kaota te koaua ae kakannato ae kaangai: b'a e kaotaki n te euangkerio aron te Atua ni kaeti aroia aomata nakoina n te onimaki, ni moa man rekena i rouia ni karokoa tokina (1.17). E a kab'arab'ara ni kamatata nanon te koaua aei; ao e taekinna b'a a bane aomata nako, aika I-Iutaia ma aika tiaki I-Iutaia, ni kainanoa kaetan aroia n reitaki ma te Atua, ngkai a bane n tauaki i aani m'aakan te bure. Onimakinan Iesu irouia aomata boni ngaia rekeni kaetan aroia n reitaki ma te Atua.E a waaki i mwina ngkanne B'auro ni kab'arab'ara aron te maiu n reitaki ma Kristo i mwin rekeni kaetan aron te aomata n reitaki ma te Atua. E kaotia b'a e na reke iai te maiu n raoi ma te Atua, ao te maiu ae kainaomataki ni m'aakan te Tamnei mani m'aakan te bure ma te mate.Ni M'akoro 5 nakon 8 ao a taekinaki iai kaantaninga i bukin ana Tua te Atua, ao m'aakan te Tamnei are Raoiroi ni maiun te tia onimaki. Ao i mwin taekinani baikai, e a manga waaki nako riki n taekina aroia I-Iutaia ma aika tiaki I-Iutaia n rin i nanon ana kaantaninga te Atua. E kaotia n ana koaua b'a ribakin Iesu irouia I-Iutaia boni kanoan ana kaantaninga te Atua i bukiia aomata nako b'a a aonga n akoaki iroun te Atua i nanon Iesu Kristo; ao e kaotia naba ae a na bon aki kona I-Iutaia n taai nako n riba Iesu.Ni kabanean ana reta ao e a katereterea iai aroia Kristian ni b'aina te maiu ni Kristian, ai moara riki n aroia ni b'aina te maiu n tangira n reitaki ma raoia. E a taekin naba iai koaua aika kakannato, n ai aron te aomata ni kakaonimaki nakon te Atua, ao baika a riai ni karaoi Kristian nakon te tautaeka ao nakon temanna ma temanna i rouia, ao baika kaeti ma taekani mataniwin te nano; ao e kabanea ana reta n taeka aika kaeti ma raona, ao n taeka n nebonebo nakon te Atua.Aron Teini KanoanaB'auro ma te Euangkerio, ao te Koaua ae Kakannato n te Reta aei 1.1-17

Kainanoan te Kamaiuaki iroun te Aomata 1.18—3.20

Ana Kawai ni Kamaiu te Atua 3.21—4.25

Te Maiu ae Boou i Nanoni Kristo 5.1—8.39

Nen Iteraera n Ana Kaantaninga te Atua 9.1—11.36

Anuan te Kristian 12.1—15.1-13

Kabanea n Taeka ao Taeka ni Kamauri 15.14—16.27