Taniera 7 - Kiribati New Version Bible

Mitaraeakinan Maan Aika Aman iroun Taniera.

1I nanon ana moan ririki te uea are Beretiata i aoni B'aburon, ao I noora te kaotioti n te tairiki teuana. Ao I korea taekan te kaotioti anne, ao aio taekan

2te b'ai are I nooria n te tairiki anne: E kare te ang n akea unna, ao e kabuakaa nanoni marawa.

3Ao a kaoti maan aika a korakora aika maan mai nanon marawa, ao a kaokoro taraaia n tatabemaniia nako.

4Are te moan, kaanga ai aron taraan te raian, ma iai baina ni kiba kaanga te ikare. Ao ngke I bon tabe ni matakuakinna, ao a rina naba ni b'aka baina ni kiba. Ao e tabekakirake ao e kateaki ni kaetaki raoi. Ao i mwiina e a anganaki te nano n aomata.

5Ao te kauoua ni man, kaanga ai aron te bea are e tei i aoni waena ake mai buki. Ao e tenai tennai te rii i nanoni wiina, ao e taku te b'anaa nakoina, “Waaki nako, kana te iriko n aron tokin am konaa!”

6Ao ngke I tabe ni mataku, ao e a manga kaoti te man temanna, ae kaanga ai aron taraan te reb'ari, ma iai aua baina ni kiba i aon akuuna, aika kaanga bain te mannikiba, ao iai aua atuuna, ao e anganaki te m'aaka n tautaeka.

7Ao ngke I tabe ni mataku, ao e kaoti te kaaman ni man. E korakora ao e kakamaaku. E kangkanta kanana ni wiina aika taian biti, ao i mwiina e a manga toubekaia. E kaokoro ma maan ake tabeman b'a iai tebwina korona.

8Ao ngke I tabe ni matakuakini taiani koro ao I noora te koro teaina ae e uarereke ae e kaoti i rarikin ake tabeai. Ao e kouti tennai taiani koro mai buakon ake a kamani mena i m'aaina. Iai matan te koro aei kaanga te aomata, ao iai naba wiina ae e rangi n taetae ni kamoamoa.

Mitaraeakinan te Motikitaeka.

9Ngke I bon tabe ni mamataku, ao e katukaki te kaintoka ni motikitaeka ni nnena. Ao e tekateka i aona Teuare e maiu n akea tokina. A mainaina kunnikaina n ai aron te tinoo, ao irana kaanga ai aron buraen te tiibu ae e boou. E toka ana kai ni motikitaeka i aon wiira aika taian ai aika a ura,

10ao e raanga nako te ai mai iai. Ao iai ngaa n aomata aika a m'akuri i bukina, ao mirion aika a tei i matana. Ao e moanaki te kabowi ni motikitaeka, ao a kaukaki taiani boki.

11Ngke I bon tabe ni mamataku, ao I ongo tangin te bu ae e taetae ni kamoamoa. Ngke I tabe ni mataku, ao e a tiringaki te man are te kaaman, ao e tewenakoaki rab'atana nako nanon te ai ni kamaunaaki.

12Ao e a tia n anaaki m'aakaia, ma a kariaiakaki b'a a na tiku ni maiu n te tai ae e a tia ni baaireaki.

13I nanon mitaraeakinan baikai n te tairiki anne,

I noora kaanga taraan

natin te aomata

Ao e tabe ni kawarai, ao e katobibiaki n taian nang,

ao e nakon Teuare e maiu

n akea tokina ao e tei i matana.

14E anganaki te kariaia,

te karineaki, ao te m'aaka,

b'a a na bane aomatan

te botannaomata, reeti,

ao taetae nako n toro i rouna.

E na teimatoa m'aakana n aki toki,

ao akea tokin ueana,

ao e na bon aki kona n uruaki.

Kab'araan Nanon te Kaotioti are Maan ake Aman.

15E rangi ni katabetabea nanou te kaotioti are I nooria n te aro are I aki rau iai.

16Ao I waerake nakon temanna i buakoia ake a teitei ikekei, ao I butiia i bukin kab'araan nanona ni kabane. Ma ngaia are, e a tuangai nanona.

17Ao e taku, “Maan aika a korakora akana aman akanne bon taian tautaeka aika aua aika a na kaoti n te aonnaba.

18Ao e na reke irouia ana Aomata te Atua ae Moan te M'aaka te nakoa ni uea anne, ao a na b'ainna n aki toki.

19Ao i mwiina, ao I a manga tangiria ni kan ataa aron te man are te kaaman, are e boni kaokoro ma ake tabeman, te man ae e kakamaaku are e kangkanti kanana ni ukin baina aika taiani buraonti, ao wiina aika taiani biti, ao e a manga toubekaia.

20Ao I tangiria ni kan atai aroni kooro ake tebwina ake i aon atuuna, ai moaraara riki te koro teaina are e a tib'a kaoti, are e manga kab'akai kooro ake tennai. Are iai matana ao wiina kaanga te aomata, ao e rangi ni kainikatonga. E bon rangi ni kakamaaku riki nakoia ake tabeman.

21Ao ngke I tabe ni mataku, ao e buakaniia ana aomata te Atua te koro arei ao e kataenikaiia.

22Ao e roko teuare e maiu n akea tokina, ao e anga te motikitaeka ae e riai nakoia ana Aomata te Atua are Moan te M'aaka.

23Aikai nanoia ake I anganaki, “Te kaaman ni man bon te kaaua n tautaeka are e na kaoti i aonnaba, ao e na kaokoro ma taian tautaeka nako. E na kamanatua te aonnaba ma n toubekaia rikaaki.

24Taiani koro ake tebwiina bon taiani uea ake a na tautaeka n te tautaeka anne. Ma ane e na manga kaoti te uea temanna; ao e na bon rangi ni kaokoro ma ake mai m'aiina, ao e na kab'akaia uea akana teniman.

25E na taetae n eekaanako te Atua ae Moan te M'aaka, ao e na karawawataia ana Aomata te Atua. Ao e na kataia ni bita tuan ma botakin aia aro, ao a na mena ana Aomata te Atua i aani m'aakana i nanon tenua ma te iterana te ririki.

26Ao e na waaki te motikitaeka i karawa, e na anaa m'aakana ma ni kamaunaa teuanne n akea nikirana.

27Ao m'aakan ma korakoran taian tautaeka ni kabane n te aonnaba a na bane n anganaki ana Aomata te Atua. E na bon akea tokini m'aakan ana tautaeka, ao a na bane n toro i rouna taan tautaeka n te aonnaba ma n ongotaeka i rouna.”

28Ao aei tokin rongorongoni b'aai ake a riki. Ao I rangi ni maaku n te aro are I a mainarake, ao I aki kona ni m'aninga baikekei.