1I mwiin ana kakaonimaki Etekia n ongotaeka nakon ana tua te UEA ni karaoan baikai, ao e a buakana Iuta uean Aturia are Tennakeriba. E buakan kaawa aika a nonoaki aika a buubura ao e iangoia b'a a na reke i rouna ni kabane.
2Ao ngke e ataia Etekia ae e baaireia Tennakeriba b'a e na buakana Ierutarem,
3ao a karaoa aia babaaire ana mataniwi b'a a na kaina mwiin te ran nako tinanikun te kaawa are e buubura arei, b'a a aonga n akea nimaia te ran ngkana a roko ni buaka.
4Ao a botiia taani m'akuri aika moan te bati taiani mataniwi aika a na katoka te koburake n ran arei ao taian raanga n ran ake i rarikin Ierutarem.
5Ao e karekeia naba taani m'akuri Etekia ake a na bonota m'akoron oon te kaawa are e buubura arei ake a uruaki. Ao i mwiina, a karaoi taian taua n totoko ao oon tinaniku ake a na buoka ni katana are e kaman mena ikekei. E kakorakoraaki naba
6ao e rineia taian mataniwi n taanga ni buaka i bukin taian taanga ni buaka nako. Ao i mwiina, e bootia taian taanga ni buaka n te tabo ae e uki i matan te mataroa ao e taku nakoia:
7Kam na ninikoria ao kam na korakora! Bon akea riaina b'a kam na maaka te uea are Tennakeriba ma ana taanga ni buaka ae e korakora,
8b'a e buaka n ara itera te UEA ae Atuara. A ti onimakina korakoran te aomata kaain Aturia.
Ao a kakorakoraaki ana taanga ni buaka Iuta n taeka aikai.
9Ao ngke a kaemb'a ana taanga ni buaka Tennakeriba n te kaawa are Rakiti, ao e kanakoa ana rongorongo nakon Etekia ao kaain Ierutarem. Ao e taku:
10Bon Tennakeriba ngai ae uean Aturia ao I a tia ngkai ni katobibia Ierutarem. Tao ko taku b'a ko konaa n rawea maium ngkana I buakaniko?
11E tuangkami ami uea ane Etekia b'a e na kamaiungkami te UEA ae Atuami mairou. Ma e keweingkami, ao kam na mate n te baki ma te taka.
12Tiaki e uruaki taiani baonikarea ma taabo n taromauri ni kabane Etekia ao ti teuana nikiran te baonikarea ma te tabo n taromauri? Tiaki e tuangkami naba kaain Ierutarem ao kaain Iuta b'a kam na taromauri n te tabo ane ti teuana anne?
13Kam ongo taekau ma au bakatibu ao b'aai ake I karaoi nakoia botannaomata ake te korakina. A konaa antiia botannaomata aikai ni kamaiua abaia mairoura?
14Bon akea mai buakoia anti aikai a kamaiuia aia aomata mairoun uean Aturia. Ao ngkami, kam taku b'a e konaa Atuami ni kamaiungkami?
15Kam na aki kananobabaaki iroun Etekia! Bon akea antiia botannaomata aika a konaa ni kaaitaraa Aturia. Kam na kakoauaai, e bon aki konaa naba Atuami ni kamaiungkami!
16A taekini baika a bubuaka ana mataniwi mai Aturia nakon te UEA ae te Atua, ao nakon naba ana toro are Etekia.
17Ao e bon b'ainingarea naba te UEA te uea are Tennakeriba ao e taku, “Bon akea mai buakoia antin te botannaomata ake te korakina ae e konaa ni kamaiuia aia aomata mairouia ana taanga ni buaka Aturia, ao e bon aki konaa naba te Atua ae e taataromauriia Etekia.”
18A taekini baikai ni kabane taiani mataniwi akekei n te taetae n Ebera, b'a a aonga ni bane n ongo aomata ni kabane ake i nanon te kaawa are e buubura are e nonoaki arei ao a na maaku ma n taenikai.
19A taekina naba te UEA ae te Atua taian mataniwi akekei b'a kaanga ai aron te anti n aki akaaka ke te bouannanti ae e karaoaki iroun te aomata.
Maten te Uea are Tennakeriba(2 Uea 19.14-19,35-37; Itaia 37.14-20; 37.36-38)20Ao a bubutiia te UEA Etekia ao te burabeti are Itaia are natin Amoti buokaia,
21ao E kanakoa te anera are e tiringiia tautia ma mataniwiin ana taanga ni buaka Aturia ni kabane ake n aia kaemb'a.
Ao e okirikaaki Tennakeriba nako Aturia, ao e rangi ni b'ainrang. Ao n te bong teuana e nako n rin n ana Tembora antina ao e a tiringaki naba iai irouia natina m'aane tabeman.
22E kamaiua Etekia ma kaain Ierutarem te UEA mairoun Tennakeriba ao e kaawakiniia naba mairouia aia kairiribai ake tekorakina.
23A uoti aia angab'ai aomata nako Ierutarem i bukin te UEA ao taian b'aintangira naba aika a rangi ni bobuaka i bukin Etekia, ao man te bong anne, a bane botannaomata n te aonnaba ni karinea Etekia.
Aorakin Etekia are e kuri ni mate iai(2 Uea 20.1-11; Itaia 38.1-8)24Ni bon aekakin naba te tai aei, ao e a aoraki Etekia ao e a kuri ni mate. E tataro, ao te UEA e anganna te kanikina ae e na manga marurung.
25Ma e rangi ni kamoamoa Etekia ao e rawa ni kaaitaua te UEA i bukin b'aai ni kabane ake e a tia ni karaoia nako ina. Ao aio are e karika unin te UEA, ao e katuaaea Etekia ma kaain Iuta ma Ierutarem.
26Ao rimwi riki, ao a namakina aia kaairua Etekia ma aomata ao a bubutiia te UEA b'a e na kab'arai aia bure. Ma ngaia are, e a aki katuaaia te UEA ni kabane ana bong ni uea Etekia.
Kaub'ain Etekia(2 Uea 20.12-19; Itaia 39.1-8)27Ao e a rangi ni kaub'ai Etekia, ao a bane ni karinea aomata. E karaoi taian ru aika a kaokoro i bukin taian tirewa, koora, ao atiibu aika a tamaroa ao taiani b'ai ni kaboiarara, taian otanga, ao b'aai riki ake tabeua aika a kakaawaki.
28A karaoaki naba taian auti ni b'ai i bukin taiani uita, wain, b'aan te oriwa, nneia maan n am'arake aika a karaoaki i bukiia ana nanai ni kao, ao ooia ana tiibu.
29E karika Etekia te UEA b'a e na rangi ni kaub'ai, ma ngaia are, e a manga karekei riki ana tiibu, kooti, ao ana nanai ni kao. Ao e katei naba taiani kaawa ike a na konaa ni kawakinaki iai taiani man aikai.
30Bon Etekia are e karaoa te kanare are e na konaa ni karokoa te ran nakon te kaawa ae buubura are Ierutarem man te koburake n ran are Kion. Ni koauana, ao b'aai ni kabane ake e karaoi a bane n nakoraoi!
31E ngae ngke a kanakoia aia taan uarongorongo taan kairiiri mai B'aburon b'a a na titirakina Etekia ana kanikina te UEA are e anganna, ao te Atua, e kariaia Etekia b'a e na anga are bon ana reke b'a e na tuoa ao n noora ana kakaonimaki.
Maten Etekia(2 Uea 20.20-21)32A koreaki mwiin b'aai ni kabane ake e karaoi Etekia i nanon ana tai ni uea, n reitaki ma ana kakaonimaki nakon te UEA, n reitaki naba ma taian rongorongo ake e kaawakin Itaia are te burabeti. A koreaki b'aai aikai i nanon Rongorongoia Uean Iuta ao Iteraera.
33Ao ngke e a mate Etekia, e taunaki ni m'akoron ruanimateia uea are e kaokoroaki i bukiia uea aika a rangi ni karineaki, ao a bane kaain Iuta ma Ierutarem ni karinea. E a manga uea natina te m'aane are Manate i mwiina.
Who We AreWhat We EelieveWhat We Do
2025 by iamachristian.org,Inc All rights reserved.
