1Oin te kaantaninga ni baika ti taekin bon aei: b'a iai i roura te Ibonga ae Kakannato, are tekateka i angaatain ana kaintokanuea ae kakannato te Atua i karawa.
2Bon te tia m'akuri Ngaia n te tabo are moanibaan te tabu are n te um'anrianna ni koaua, are E kateia te Uea, ma tiaki te aomata.
3B'a a rineaki ibonga aika kakannato n tatabemaniia nako nakon aia m'akuri b'a a na anganga b'aintituaraoi ma karea; ma ngaia ae e bon riai iroun ara Ibonga ae Kakannato b'a e na iai naba te b'ai ae E na anga b'a te karea.
4Ngke arona b'a E na mena i aon te aba, ao bon tiaki te ibonga, ngkai bon iai ibonga aika anga b'aintituaraoi n aron are e tangiraki n te Tua.
5Te m'akuri n ibonga are a karaoia bon ti katotongan ao nun are i karawa. Bon ti te bo ma are riki nakoni Moote. Ngke e nang katea te Um'antabunrianna, ao E kangai te Atua, “Ko na taraia b'a ko na karaoi b'aai ni kabane n ai aron te b'ai ni kakairi are kaotaki nako im i aon te maunga.”
6Ao E a reke iroun Iesu ngkai te nakoa n ibonga ae rangi ni kakannato riki; ngkai Ngaia ae kona ni karekea te boraraoi ae raoiroi riki i marenan te Atua ma ana aomata, ae te boraraoi ae boboto i aon taian taeka n akoi aika raraoi riki.
7Ngke tao arona b'a e kororaoi raoiroin te moa ni boraraoi arei, ao a na akea kainanoan are te kauoua.
8B'a E kabuakakaia ana aomata te Atua, ngke E kangai,
“Noria, a na roko boong,
aika N na karaoa iai te boraraoi ae boou
ma te botannaomata ae Iteraera
ao te botannaomata ae Iuta.
9E na aki ti te bo ma te boraraoi are I karaoia ma aia bakatibu
n te bong are I tauu baiia iai ni kaotinakoia man te aba are Aikubita.
I bukina ngke a aki kakaonimaki nakon au boraraoi,
ai ngaia anne are I aki mutiakiniia iai, bon ana taeka te Uea.
10B'a aio te boraraoi ae N na karaoia ma te botannaomata ae Iteraera
i nanoni boong aika na roko, bon ana taeka te Uea:
N na karin au tua i nanon aia iango,
ao N na koroi i nanoia.
N na riki b'a Atuaia,
ao ngaiia a na riki b'a au aomata.
11Ao a na aki manga i reirei:
akea temanna ae na reireia kaain ana kawa,
ke e na reireia tarina,
ni kangai, ‘Kam na ata te Uea.’
B'a ane a na bane n ataai
akana moa ni mangori ma akana moa ni kakannato.
12B'a N na nanoangaiia
ni kab'arai aia buakaka,
ao N aki manga uring aia bure.”
13Ngkae E kangai, Te boraraoi ae boou; ao nanona b'a te Atua E a tia ni karaoa te moa ni boraraoi b'a te b'ai nikawai; ao te b'ai ae e a b'ai nikawai ma ni mane e waekoa ni mauna.
Who We AreWhat We EelieveWhat We Do
2025 by iamachristian.org,Inc All rights reserved.
