1E tei raoi
ana utu te aine
n rabakauna,
ma e konaa ni uruaki arona
n nanobabana.
2Ngkana kam maiu raoi, kam bon kaotia
b'a kam karinea te UEA;
ngkana kam b'anganikewe, kam bon kaotia
b'a kam bon akea boonganan te Atua.
3A katuaaeaki taian nanobaba aika a kamoamoa,
i bukin aia taeka ni baba,
ma e konaa ni kamaiuko
te taeka ae e iangoaki raoi.
4Ngkana e aki buobuoki te kao
ao e na bon akea taian uita,
ma e na rangi ni m'aiti taian uita
n te kao ae e marurung.
5E taekina te koaua
te tia kakoaua ae e raoiroi;
ma bon akea te b'ai ae e taekinna b'a ti te kewe
te tia kakoaua ae e buakaka.
6B'ainingarea te wanawana
ao e na aki reke iroum.
Ma ngkana iai iroum te ataib'ai,
ao e na beebete rokon te rabakau.
7Kararoaingkami mairouia nanobaba,
b'a kam kaawa n aki rabakau te b'ai teuana.
8Akea aia kangaanga aomata aika a wanawana
ngkana a kakaaea kawaia,
ma a waekoa ni bua aomata aika a nanobaba.
9A aki tabe aomata aika a nanobaba
ngkana a karaoa ae e bure,
ma e kukurei te Atua
ngkana a karaoa ae e raoiroi aomata.
10Bon akea ae e konaa n ataia raoi
b'a m'aitira kukureim ke nanokaawakim.
11E teimaan riki ana autinrianna
te aomata ae e raoiroi nakon ana auti
te aomata ae e buakaka.
12Kam na taku b'a kam
mena n te kawai ni koaua
ao ngaia kam a toki n te mate.
13E karabaa te nanokawaki
i tinanikun te ngare
ao e na toki te kukurei
n te nanokawaki.
14Kam taia te b'ai ae kam unikia,
e ngae ngkana e raoiroi ke e buakaka.
15Kam na aki burababa
mani kakoauai b'aai ni kabane akana kam ongo,
kawanawanaingkami ao ataa
te tabo ane kam nako iai.
16Bon ti te nanobaba ae e
aki konaa n taratara raoi
ma ngaia ae ko na rangi n taratara raoi
ao kararoako man te kangaanga.
17A rangi ni kakai un aomata aika nanobaba,
ao bon akea ae e na tangiriko
ngkana akea onimakinam.
18E kairiko nakon te nanobaba te bangab'ai;
kawanawanako ao reirei.
19E kawakawa n roko te aomata ae buakaka
nakoia aomata aika a ongotaeka iroun te Atua.
20Bon akea raoraom
ngkana kam maiu ni kainano,
ma a na bon rangi ni m'aiti raoraom
ngkana kam kaub'ai.
21Bon te kaairua ae kam na ribaia tabem'aang,
ma e kakab'aiaia aomata nako te Atua
akana a akoi nakoia aika a maiu ni kainano.
22Bon te kaairua
karaoan babaaire aika a buakaka,
ma a na reke raoraom aika a kakaonimaki
ngkana kam tangiria ni karaoa ae e raoiroi.
23E boongana te m'akuri m'aaka,
ma a na karikiko b'a te aomata ae e maiu ni kainano
te taetae ae e akea kanoana.
24E konaa ni karikiko b'a te kaub'ai te wanawana,
ma te nanobaba e kona ni kairiko nakon
te nanobaba ae e korakora riki.
25E konaa ni kamaiuko
te tia kakoaua ae e raoiroi,
ma a aki konaa n onimakinaki aomata aika taani kewe.
26Ngkana kam karinea te UEA
ao e a reke ami nono
ae e matoatoa ngkoe ma ami ataei
27ao te koburake n ran ae e anga te maiu
are e kakaawakiniko
man taiani b'ai ni kam'ane aika kamaamate.
28A teimatoa ni karineaki taan tautaeka aika a korakora n taiani botannaomata
ma bon akea aroia
taan tautaeka ni botannaomata aika a uarereke.
29Bon te m'akuri ae e wanawana te taotaonaki n nano,
ma bon te bangab'ai
te kakaiun.
30Ko na marurung raoi ngkana e rau nanom,
e konaa ni kaningkami te aki rau n nano.
31Ngkana kam karaoa ae e aki riai nakon te aomata ae e maiu ni kainano,
ao kam bon kamamaaea iai te Tia Karikib'ai;
ma ngkana kam akoia,
ao kam bon kaota iai karineana.
32A uruanaki aroia aomata aika a buakaka
n tain te kangaanga;
ma e bon teimatoa naba n onimaki ane akea ana bure
n tain te mate.
33E reke te wanawana inanoia
aomata aika a iangoraoi,
ma a aki ataa aei aika a nanobaba.
34E uota te karineaki nakon te botannaomata
karaoan ae e raoiroi,
ma e karokoa te b'ainrang te bure.
35A anga te kaniwanga taian uea nakoia aia taani m'akuri
aika a m'akuri ma te wanawana,
ma a katuaaia akana
a m'akuri ma te nanobaba.
Who We AreWhat We EelieveWhat We Do
2025 by iamachristian.org,Inc All rights reserved.
