1Te Atua, ti ongo n taningara,
Ti kaongoaki irouia ara bakatibu
taekan am M'akuri ake Ko karaoi ni
boong ake ngkoangkoa:
2Ngke Ko kakioia nako botannaomata ni m'aakam,
Ao Ko kamaekaia
ara bakatibu i aon abaia;
Ko karawawataia,
ao Ko kakab'aiaia ara bakatibu.
3E aki reke te aba irouia ara bakatibu n aia b'ai ni buaka;
Ao e aki reke irouia n oini korakoraia;
E reke ni m'aakam ao ni korakoram:
mani kakoauaan memenam irouia
ni kaotia b'a Ko tangiriia.
4Bon au Uea Ngkoe ao Atuau;
Ko karekea te tokanikai
nakoia ana aomata Iakob'a;
5ao ti tokanikai i aoia aiara ni m'aakam.
6I aki onimakina kanoan au kainikatebe,
Ke au kabaang b'a e na kamaiuai.
7Ma Ko kamaiura mairouia aiara,
Ao Ko katokanikaira i aoia ake a riribaira.
8Ti na kamoamoako n taai nako
Ao ni katituaraoiko n aki toki.
9Ma Ko a ribaira ao Ko katokanikaia aiara i aora;
Ao Ko a aki kairiia ara taanga ni buaka.
10Ko kabirinakoira mai m'aaia aiara,
Ao a anai ara b'ai b'a aia b'ai.
11Ko anga ngaira b'a kanga tiibu nakon te kamateaki;
Ko kamaaenakoira i buakoia botannaomata.
12Ko kaboonakoia am Aomata
n te boo ae uarereke ke ae akea booia,
n akea am raka iai.
13A noori baike Ko karaoi nakoira baronga ake a maeka i rarikira,
Ao a kaenaenaira ma ni ngareakinira.
14Ko karikira b'a b'ainingare irouia botannaomata,
Ao a ioioi atuia nakoira.
15E aki toki b'ainrangu;
Ao e taonai te mamaa
16n ongou ni b'anaaia
aiau ma ake a ribaai.
17A bane n riki baikai nakoira,
e ngae ngke ti tuai ni m'aninga taekam
ke n urua te boraraoi are Ko karaoia ma ngaira.
18Ti aki toki ni kakaonimaki nakoim;
Ti ongeaba n taai nako nakon am Tua.
19Ma Ko katikuira b'a kanga maate ngaira i buakoia maan aika aki manana;
Ko kakiira n te tabo ae rotongitong.
20Ngke arona b'a ti katoka taromaurian Atuara
ao n tataro nakon te atua ae Ianena,
21Ao Ko na kamani kunea:
b'a Ko atai nanora aika raba.
22Ma ti kaitaraa ma te mate i bukim n taai nako,
Ao ti riki b'a kanga tiibu aika nang kamateaki.
23Te UEA, Ko na uti! E aera ngkai Ko matu?
Tei rake! Tai ribaira n aki toki!
24E aera ngkai Ko karabako mai roura?
Tai m'aninga taekan rawawatara ma ara kaangaanga!
25Ti b'aka ni borarabaua i aontano;
Ti wene n aki konab'ai i buakoni bubun aontano.
26Ko na nako mai ni buokira!
Kaota am Atataiaomata ni kamaiura!
Who We AreWhat We EelieveWhat We Do
2025 by iamachristian.org,Inc All rights reserved.
