Ieremia 51 - Kiribati New Version Bible

Uruakakin B'aburon

1Boni Ngai ae te UEA, ae I kanakoa

te ang b'a e na uruaniia

kaain B'aburon

ma B'aburon, are atuun kaawan te tautaeka.

2Ane a na roko aia tautia ianena

man taabo nako,

ao e na akea kaain B'aburon,

ao e na akea manenana

ngkana e a toki te kabuanib'ai.

3N na taetae ni kaangai nako ia tautia aikai,

“Buaka ni kawaekoa,

i m'aain ae a kanakoi kanoan aia bana

ke a karin aia b'ai ni buaka

kaain B'aburon.

Tiringiia aia tautia ake a bane aroia

ao kamaunaa aia taanga ni buaka!”

4Ane a na b'aka ni ikoaki aia taanga ni buaka

i nanoni kawain nako nuukan B'aburon.

5A bane ni bure aomata ni kabane i Iteraera

ma Iuta.

Ma I bon tuai ni kiitaniia

Ngai ae te UEA ae Moan te m'aaka,

te Atua ae e mimitong.

6Otinako mai B'aburon!

Biri n rawei maiumi!

Kam na mate, ngkana kam tiku

ngkana I kaoka te kai nakon te kaawa aei

ma ni katuaaea i bukin ana bure nako.

7B'aburon bon Au m'angko te koora

ae e kanoaaki ni wainin

uniu.

A na manging n te wain aei

botannaomatan nako te aonnaba

ao a na rangirang.

8Ma e na rina ni b'aka B'aburon

ao e na uruaki.

Boni Ngai ae te UEA ae I tuangiia ianena

ake a maeka ikekei ni kaangai,

“Taang i bukin te kaawa!

karekea te b'ainaoraki i bukin ikoakina;

tao a na bae n raoiroi.”

9Ao a kaeka ianena ni kaangai,

“Ti a tia ni kataia

ni b'ainaorakiia ikoakin nako B'aburon,

ma a bon aki buokaki.

Nako mai, ti a okiri mwengara

n oin abara nako.

Bon akea te b'ai ae e tiku i B'aburon;

a bane n uruaki b'aai nako.”

10A taku Iteraera,

Tuangiia kaain Tion ni kabane!

E a tia te UEA n irantaanga

i bukin te b'ai are e karaoia B'aburon nakoira.”

E Tangiria Ni Kamaunaa B'aburon Te UEA

11Boni Ngai ae te UEA,

ae I tangira B'aburon b'a e na kamaunaaki,

i bukina ngke a urua au Tembora

ana taanga ni buaka.

Ma ngaia are, kam na kakangii ami kanoanikatebe

ngkami aika uean Miria,

ao anai ami otanga.

12Irakea te buraeki are te kanikina

ao buakana oon nako te kaawa.

Kateirakeia riki taan tei aika a bati.

Tuangiia tautia b'a a na tararuaa te kaawa

ma ni katea te taanga ni buaka ni bakairaa.

I a tia ni karaoa te kawai

i bukin uruakakin B'aburon,

ao akea te b'ai teuana ae e na konaa ni katokai.

13Kaain B'aburon, kam maeka

i mataniwiin te Karaanga are Iuberetiti

ao kam katobibiaki n taiani kanare.

Kam kaub'ai,

ma e a roko te tai

are kam na mate iai.

14Boni Ngai ae te UEA ae Moan te M'aaka,

ae I tuea ni bon oini maiu

b'a a na kaona kawain nuukan ami kaawa

aia tautia kairiribai

kaanga te taanga n rokati.

Ane a na takaarua

ao a na rungaa aia tokanikai.

Te Anene N Nebonebo(Ieremia 10.12-16)

15E kamanenaa wanawanana te Atua ao m'aakana

ni karika te aonnaba

ao n taakin taiani karawa.

16A rurunga ranin taiani karawa

n Ana taeka.

E kariki taian nang b'a a na kaoti;

ao E kanakoi taian ang

man ana autinib'ai

ao E karaoi taian iti

i nanon te karau.

17A nanobaba aomata aika a karaoi

taiani bouannanti!

Ane a na b'ara nanoia,

i bukina b'a

a aki konaa n ikeike antiia.

18Bon ti taiani b'ai ni manikangare taiani bouannanti,

ma ane a na uruaki,

ngkana e roko raoi te tai.

19Bon te UEA ae Atuaia Iteraera,

ae Moan te M'aaka.

E karaoi b'aai ni kabane,

ao E rinea Iteraera

b'a oin ana b'ai.

E taku te UEA:

20Kaain B'aburon, bon Au aama ngkami;

I kamanenaingkami n oroia botannaomata nako

ma n urui taian abanuea,

21ao ni kamaenako ia taan toka i aon taian aoti ao taiani kaanibuaka,

22ao ai uana naba ma mm'aane ao aine,

ataei ao kaara,

23taani kaawakin tiibu ma aia nanai,

taan ununiki ma aia kaomm'aane,

ma koowana ao taan kairiiri.

24Ma ngkai, a na mataku Au aomata

ngkana I anganiko boom

i bukin te b'ai are ko karaoia nakon Tion.

25Kam uruaniia botannaomata

ao ko taraa ni marurung kaanga te maunga,

ma bon am kairiribai Ngai.

N na bon raweiko

ao N na karabinoko nako nakon te tabo ae e katati.

Ao ngkana e bane karaoan anne irou,

ko na riki b'a kaanga te b'ariko

ni buriki aika a mannang.

26E na aki kamanenaaki am buriki atiibu

i bukin atiibun taiani koona

ke taian aana,

ao I berita b'a kam na riki

b'a te rereua n aki toki.

Bon aei Au taeka Ngai ae te UEA.

E taku te UEA:

27Aanga te kanikina nako ia botannaomata nako

b'a a na tauraoi nakon te buaka.

Irakea te buraeki ao katanga te buu.

Kanakoa weteaia aia taanga ni buaka kaain Ararata,

Minni, ao Atikenati.

Rinea te mataniwi;

ao kanako ia taani buaka i aoia aoti b'a a na buaka

kaanga taanga n rokati.

28Tuangiia uea ma koowana,

taan kairiri ao kaain te

abanuea are Miria

b'a a na katauraoi nakon te buaka!

29E unoraki ao e rairaki te aonnaba

nakon te kamarakaki ae e korakora,

i bukina ngke I iangoia

b'a N na karika B'aburon b'a e na rereua

ae akea ae e na konaa ni maiu iai,

ao I aki konaa ni bita nanou.

30E a tia ni mauna korakoraia

ao ninikoriaia

tautian B'aburon.

A tiku n aia nono,

n aki konaa ni buaka,

ngke a roko kairiribai n ninia

mataroan nako te kaawa,

ma ni kabuoki taiani mwenga ni kabane n te ai.

31A roko taan uarongorongo temanna i mwiin temanna

ni katanoataa nakon te uea ae e kaangai,

“E a tia n tauaki B'aburon!

32A teiakina ngkai te ri aon

te karaanga kairiribai!

A a urarake taabo ake a aom'aim'ai!

A a tia ni buannano te taanga ni buaka!”

33Boni Ngai ae te UEA ae Moan te M'aaka

ae Atuaia Iteraera,

ao I karaoa te boraraoi aei

“E na kaboraoaki B'aburon

ma ni kamanatuaaki

kaanga te tabo ni kaaki kun ni uita

n tain te tai.” Ane E Na Kabooa Mwiina B'aburon!

34Ane a na kaangai kaain Ierutarem,

“E kabuai nanora

te Uea ae Nebukaneta

E kaonna te manikaakang are

iroura ma kaub'aira,

ao e katikuira n akea ara b'ai

e kab'auta

te b'ai are e tangiria

ao e baawarea nako nikirana.

35A kaikoakia tabeman maibuakora

kaaini B'aburon

ao a tiringiia tabem'aang.

Ngkai, te UEA, karaoia b'a a na kabooa mwiina!”

E Na Kaoka Nakon B'aburon te UEA

36Au aomata, I mena n ami itera,

N na kaoka te kai

nakon B'aburon.

N na korouaa ana ran

ao e na m'autakataka ana karaanga n ran.

37E na riki B'aburon b'a te b'ariko n atiibu aika a maaerikiriki

ike ti taian tiakaore aika a maeka iai.

Ane a na ngare aomata,

ma a na aki maaku

n nakonako i buakon b'aina aika a uruaki.

38A bekorara kaain B'aburon ao a kakarongoa

kaanga raian ataei.

39Ao ngkai a kaman baki

N na anganiia te baka n am'arake.

A na bootaki ni kukurei, a na koro ni manging,

ao i mwiina, a na b'aka ni matu,

ao a na aki manga uti!

40N na kairiia nakon te mate,

kaanga te tiibu, tiibu ataei, ao taiani kooti

aika a kairaki nakon te tia tiringiia maan.

41A bane n neboa B'aburon botannaomata nako,

ma ngkana e tauaki,

a na maaku naba

botannaomata ake a neboia akekei.

42Ane a na teirake ana kairiribai B'aburon

kaanga naon te marawa

ao e na kaiekaa te kaawa.

43E na oroi kaawa akana a uakaan

te urub'ai ae e kakamaaku.

E na riki te aba b'a

te rereua ae akea kain aona,

ike akea ae e konaa ni maiu iai

ke ni m'ananga iai.

44N na katuaaea Maretuka,

are antin B'aburon,

ma ni karaoia b'a e na mumutai

b'aai nako ake e kab'auti.

Ao i mwiin anne, a na aki manga

uoti aia b'aintangira botannaomata nakoina,

ao a na maerikiriki oon nako B'aburon.

E Anga Te Kaantaninga Te UEA

Nakoia Ana Aomata

45Otinako mai B'aburon, Au aomata,

ao biiri n rawei maiumi,

i m'aain ae I orea te kaawa

n uniu!

46Kam na aki maaku ke ni kabuai ami kaantaninga,

e ngae ngke iai taian maningongoo

ae taekaia taani kairiiri i bukin kairan te waaki

i nanon te kaawa ae e buubura ae B'aburon

i nanon ririki ma ririki.

47E a roko te tai

are N na katauaea iai

antin nako B'aburon ni kewe.

A na bane ni mate aomata,

ao e na b'ainrang

te botannaomata ae e b'anin,

48ngkana e a buaka te taanga ni buaka

mai meaang

ma ni karokoa te urub'ai.

Ao i mwiina, a na kukurei

aonnaba ma taiani karawa

ma b'aai ni kabane ake iai.

49E na karenakoaki,

i bukina ngke e tiringiia

Au aomata aika Iteraera aika a m'aiti

ao a m'aiti naba man botannaomata ake tabeua.

50Au aomata, kam biri nako man te mate

ngke e b'aka Ierutarem.

Ngkai kam a maeka n raroa ma mwengami,

ma kam na riai ni kakoauaai

ao kam na iangoa Ierutarem.

Kiitana B'aburon! Kam na aki tiku!

51Kam na bon mamaa ao kam na b'ainrang,

i bukina b'a a tia n rin ianena

n au Tembora are e tabu.

52N te tai ae e aki maan N na karokoa te buaka

b'a e na katuaai ana bouananti nako B'aburon

ma ni katikuia kaaina aika a ikoaki

n tang man taabo nako.

53E ngae ngke a roota

karawa oon nako B'aburon,

ma e na urua te kaawa ae e buubura aei

te taanga ni buaka ae N na karokoa.

Bon aei Au taeka Ngai ae te UEA.

E Na Uruaki B'aburonE taku te UEA:

54Ongora nakon te tang ni kani buokaki

ae e nako mai B'aburon.

E ongo

te aba tangin te urub'ai

man taabo nako i aon te aba arei.

55Takaaruaia kairiribai,

ae kaanga ai aron rebwen naoni marawa,

e na kamaunaa tangiia kaain B'aburon

ngkana I kabooraoa te kaawa.

56E na buakana B'aburon kairiribai

ma n urua.

A na tauaki tautiana

ao a na uruaki aia b'ai ni buaka,

i bukina ngke bon te Atua Ngai

ae I kaakaboo kai nako ia botannaomata nako

n te b'ai are a karaoia.

57Bon te UEA Ngai ae Moan te M'aaka,

te Uea ni koaua, ae I berita

b'a a na bane ni manging mataniwi ao taan iango,

koowana ma taani kairiiri

ao tautian B'aburon,

ao a na koronimanging ao a na b'aka ni matu,

ao a na aki manga uti.

58A na tabwenaua

oon te kaawa ake a matenten,

ao a na bane ni bue mataroana ake a totoakaei.

A na aetorake b'a te bubu

b'aai ni kabane ake a tia ni m'akuri korakora i bukin karekeaia.

Anganakin Teraia Te Niira ni boki Iroun Ieremia.

59E m'ananga nako B'aburon Tetekia n ana kaaua n ririki ni uea i aon Iuta. Ao e iri naba tarin B'aruka are Teraia b'a te aobitia ngaia are e tabe ma baairean taian tabo are a na tiku iai ni kangainaa.

60I m'aain nako ia, I koreia i aon te niira ni boki b'aai ni kabane aika a kakamaaku ake a na riki nakon B'aburon.

61I anga nakon Teraia ao I kaangai:

Ngkana kam roko i B'aburon, ko na wareka te niira ni boki aei ni kaoa b'anaam,

62ao i mwiina, ko na tataro ni kaangai, “Ara UEA, Ko berita ngkoa b'a Ko na onika te tabo aei nakon te rereua ike akea aomata ke taiani man ae a na maiu iai.”

63Ngkana e bane am tataro, kabaea te niira ni boki ma te atiibu ao karenakoa nakon te Karaanga are Iuberetiti. Ao i mwiina, ko na kaangai,

64“Aio aron inakon B'aburon ngkana e uruakaki i roun te UEA. A na bane ni mate kaain te kaawa, ao e na aki manga reke korakorana n teirake.”

Tokin Ana Koroboki Ieremia

E bane ikai ana koroboki Ieremia.