1Ao ngke a nooria aomata b'a e a rangi ni maan Moote i aon te maunga, ao a nako nakon Aaron ao a taku, “Karaoa taamnein antira are e na kairiira ma ni kaawakiniira. E kaotinakoira Moote mai Aikubita, ma bon akea temanna ae ataia b'a tera ae e a tia n riki nako ina.”
2Ao e tuangiia Aaron ni kaangai, “Uotimai aia taabia aika koora buumi ma aia b'ai natimi mm'aane ma natimi aine akana a toka i aoia.”
3Ao a bane aomata ni buuti aia taabia aomata nako ao a uoti nakon Aaron,
4ao i mwiina, e kaburoi ni karanii ao e karaoi nakon bannan te kao te ataei.
Ao a taku aomata, temanna nakon temanna, “Bon aei te atua are e kaotinakoira mai Aikubita!”
5Ao ngke e nooria Aaron b'a a rangi ni kukurei aomata iai, e manga katea te baonikarea i matan te bouannanti ao e taku, “Nakon te ingabong, ti na karaoa ara bootaki are karinean te UEA.”
6Ao a uti m'aaka aomata n te ingabong are i mwiina ao a tiringi tabeman taiani man ake a na kamanenaaki i bukin te karea ao tabeman i bukin te am'arake. Ao i mwiina, a bane n am'arake aomata ma ni mooi ni katibutauaia ao ni kakoroia n te aro are a riki b'a kaanga maan aika aki manana.
7E taku te UEA nakon Moote:
Kawaekoako n oki rikaaki! A riki b'a kaanga baaba aomata ake ko kaotinakoia mai Aikubita.
8A tia ni kaman katoka ongotaekaia i Rou: a tia ni karaoa aia bouannanti ae bannan te kao te ataei. A bobaraaki nako ina, ao a angakarea nako ina, ao a taku b'a te anti arei are e kaotinakoia mai Aikubita.
9Moote, I a tia n noora aron taningamatoaia aomata aikai,
10ao I a rangi ni un n te aro are N nang karaoi taekaia, ma ngaia are, ko na aki tautauai. Ma N na karaoia am kariki b'a te botannaomata ae e kakannato.
11Ao e kataia Moote ni butiia te UEA ae te Atua b'a E na bita nanona:
Ara UEA. Ko kamanenaa ngkoa korakoran m'aakam ni kaotinakoia aomata aika mai Aikubita. I butiko b'a Ko na aki un i rouia ngkai ma ni karaoi taekaia.
12Ane a na taku kaain Aikubita b'a Ko kaotinakoia nakon te maunga aei b'a ko na karaoi taekaia iai. I butiiko b'a Ko na aki un irouia am aomata. Ko na aki tiringiia!
13Uringa te berita are matoa are ko karaoia ngkoa ma Aberaam, Itaaka, ao Iakob'a. Ko berita b'a n te bong teuana a na m'aiti aia kariki kaanga itoin karawa ao Ko na anganiia abaia.
14E aoria ngkana E a tia ni katanoataa te UEA b'a E na kamaunaia ana aomata, ma E na manga bon bita nanona ma ni kamaiuia.
15Ao e oki rikaaki Moote n ruorikaaki man te maunga ma atiibu ake a raababa
16are E korea iai ana Tua te Atua n oin tabonibaina. E koroboki i aon iteran te atiibu ake uoua.
17Ao ngke e ongo Iotua karongoaia aomata ae korakora, ao e taku nakon Moote, “Ti te bo ma iai te buaka i nano ikekei n aia maeka.”
18Ma e kaeka Moote ni kaangai, “Tiaki karongoaan te takaarua n tokanikai ke te konaaki n te buaka. A bon rangi n roko nanoia n anene!”
19Ao ngke e tabe ni kaan Moote ma aia maeka, e a noora te bouannanti, ao e nooriia aomata aika m'am'aie i rarikina. Aei te b'ai are e a rangi n un iai n te aro are e a karenakoi taian atiibu ma ni kamaaenikuni i oin te maunga.
20E karikia b'a te ran te bouannanti are a tia ni karaoia aomata, ao e kamantia ni kab'auta. E kaaki i nanon nimaia b'a a na nimma, ao a nimma.
21E titirakina Aaron Moote ni kaangai, “Tera ae ko maakuia iai aomata aikai n te aro are ko a ira nanoia ni karaoa te bure ae moan te buakaka aei?”
22Ao e kaeka Aaron:
Ko na aki un i rou. Ko bon ataa aron korakoran nanoia aomata aikai ni kaakaraoa te bure.
23A bon tuangai naba ni kaangai, “E kaotinakoira te mm'aane are Moote mai Aikubita, ma ti a aki ataia ngkai b'a tera ae e a riki nako ina. Ma ngaia ae, ko na karaoa antira are e na manga kairiira.”
24Ao i mwiina, I buubutiia b'a a na uoti nako iu aia taabia koora. A buuti ma n anganai. I kab'akai taiani koora i nanon te ai, ao I a karaoa te kao aei mai iai.
25Ao e ataia Moote b'a akea ae e na kairiia aomata, ma ngaia are, bon ana bure Aaron. Ao ngkai a tia ni katei tamneia aika a nanobaba i mataia aia kairiribai nako.
26Ma ngaia are, e tei Moote ni mataroan aia maeka ao e takaarua ni kaangai, “Ngkami akana kam taku b'a kam mena n ana itera te UEA, nako mai ikai!”
Ao a bootaki mm'aane ake kanoan te baronga are Rewi i rarikin Moote,
27ao e taku nakoia. “E tuangkami te UEA b'a kam na kabaei ami kabaang ma n nako n niniia aia maeka, n tiringiia ami koraki, raoraomi, ao kaain rarikimi nako.”
28Ao a ira ana taeka Moote mm'aane ake kaain te baronga are Rewi, ao a tiringiia e kaaniia tenua te ngaa te mm'aane.
29Ao e taku Moote nakoia, “Ongotaeka iroun te UEA ao karaoa ae raoiroi, ao kam na m'akuri b'a ibonga ngkami i bukiia Iteraera. E bon matoatoa i roumi b'a kam na tiringiia oin natimi mm'aane ao tarimi, ma E a tia te UEA ni kakab'aiaingkami ma ni karikingkami b'a ana ibonga n te bong aei.”
30N te bong are i mwiina, e tuangiia aomata Moote ni kaangai, “Kam a tia ni karaoa te bure ae moan te kakamaaku. Ma N na nako ni kawara te UEA ni kakaaea te anga ae na konaa ni kab'araaki ami bure iai mai i roumi.”
31Ao e okirikaaki Moote nakon te UEA ao e taku, “A tia aomata ni karaoa te bure ae rangi ni kakamaaku. A tia ni karaoa te koora b'a te bouannanti are e na riki b'a antiia.
32Ma I a buubutiiko te UEA b'a ko na kab'araa aia bure. Taiaoka kamaunaa arau man am boki ngkana Ko aki kab'araa aia bure.
33Ao E kaeka te UEA ni kaangai, “N na kamaunaa araia aomata nako aika a tia ni bure nako iu man au boki.
34Ngkai ko na kairiia aomata nakon te tabo are I a tia n tuangko, ao e na kairiko Au anera. Ma N na katuaaia i bukin aia bure aei ngkana e roko te tai arei.
35Ma ngaia are, e katuaaia Iteraera te UEA n te aoraki ae e kakamaaku i bukina ngke a tuanga Aaron b'a e na karaoa aia bouannanti te koora.
Who We AreWhat We EelieveWhat We Do
2025 by iamachristian.org,Inc All rights reserved.
