1Te UEA, I nakoim i bukini kamanoau;
N na bon aki maneang iroum.
Kamaiuai ngkai te Atua
ae e raoiroi Ngkoe.
2Ongo irou, bareiko ni kamaiuai!
Ko na riki b'a au b'a ae rietaata
ae nneu ni katantan, ao au nono ni kamaiu.
3B'a bon au b'a ae rietaata ma nneu ni kamaiu Ngkoe;
Ko na kairiirai ma n tuatuangai arou
n aron are ko a tia ni berita iai nako iu.
4Kawakinai b'a N aki m'ane n te
b'ai ni kam'am'ane ae kamenaki i m'aiu;
5I kaaki taekau i nanoni baim;
B'a Ko kamaiuai, te UEA
ae te Atua ae Ko kakaonimaki.
6Ko ribaia akana taromaurii atua tabeman
ma I onimakiniko.
7N na kukurei ma ni kim'areirei i
bukin am Tangira ae teimatoa.
Ko noori marakiu;
ao ko atai au kanganga
8Ko aki anga ngai nako nanoni baiia taan ribaai;
Ko a tia ni kainaomataai b'a N na nako ike I kan nako iai.
9Te UEA, nanoangaai;
b'a e kai nanou;
A kainano matau i bukin te tang ae bati;
Akea angin rab'atau.
10Ti te nanokawaki ngai n taai nako ni maiu;
Ao e kakimototoaki maiu i bukin te tang ni korakai.
I a mamara i bukin au bure;
A n tangorengore toman riu.
11A taku ake a ribaai b'a akea wareu,
ai moa ra riki ake a maeka i rarikiu;
ao a makai te koraki ake a ataai;
a biri nako ngkana a norai n te kawai.
12A bane aomata n aki uringai, b'a kanga ai aron ae I a tia ni mate;
Ai aron te b'ai ngai ae teweaki nako b'a akea bonganana.
13I ongo b'anaaia ni wirikiriki taan ribaai aika m'aiti;
I otab'aniniaki n te kakamaaku.
A kario iango b'a a na eekainako.
A iangoa kamateakiu.
14Ma iai irou onimakinam, te UEA;
Bon Atuau Ngkoe.
15E mena iroum mwiokoni maiu;
Kamaiuai mairouia taan ribaai,
ake taani b'ainikirinai.
16Taraai, ngai ae am Toro, ma moam n akoi;
Kamaiuai n am Tangira ae Teimatoa.
17Te UEA, I weteiko;
N na aki b'ainrang iroum.
Kab'ainrangiia akana buakaka,
ao kanakoia nako Tiore n aki karongoa.
18Kaini wiia taani kewekewe,
ake a taetae ni kainikatonga n taku
b'a akea manenaia aomata aika raoiroi.
19Ai kamimiira baika raraoi
ake Ko kakawakin i bukiia ake a karineko!
A bane aomata nako n ataiko b'a Ko raoiroi,
Ao a ataa naba ae a mano raoi i Roum akana onimakiniko.
20Boni neia ni karabaia Ngkoe
man aia m'akuri ni kakam'arua aomata;
Ko karabaia n te tabo ae a mano raoi iai
man taian taetae n iowawa.
21E na karaoiroaki te UEA!
B'a E kaota kamimiin ana tangira ae teimatoa nako iu,
Ngke kanga ai aron te kaawa ngai are niniaki ni buakanaki!
22I maaku, ao I taku
b'a I a tia ni kararoaki nako mai Rouna.
Ma E ongo au bubuti,
Ngke I weteia b'a E na buokai.
23Kam na bane n tangira te UEA, ngkami akana ana Aomata akana onimakinna;
E kawakinia akana kakaonimaki te UEA,
Ma E kabatia kain ane kainikatonga.
24Kam na korakora ao kam na ninikoria,
ngkami ni kabaneingkami akana kam kaantaninga te UEA.
Who We AreWhat We EelieveWhat We Do
2025 by iamachristian.org,Inc All rights reserved.
