Itaia 49 - Kiribati New Version Bible

Ana M'akuri Ana Toro Te UEA

1Kakauongo aomata ni kabane,

e ngae ngkana kam mena n abaia ianena

n taabo aika raroa nako i nanoni marawa.

E rineai te UEA

ao e anganai arau

i m'aain bungiakiu.

2E kakangii au taeka

n ai aron kabaang

ke tabon te kanoanikatebe;

ke kaawakinai raoi ni karabaai

i nanoni baina.

3E taku te UEA nako iu,

Iteraera, bon au tia m'akuri ngkoe;

N na bon rangi ni karineaki i bukim.”

4I taku i bon irou,

“I a rangi ni korakai;

ao e a tia ni banebuaka au tai.

Ma I karaoa aei i bukin te UEA ae te Atua,

ao E na anganai kaniwangau.”

5E a kaman rineai te UEA ae te Atua

i m'aain bungiakiu

b'a N na m'akuri i bukina ao ni kaokiia

Iteraera.

Ma ngaia are, e a tia ni karineai te UEA

ma ni kakorakoraai.

6Ao ngkai E taku te UEA nako iu

“E aki tau nakoim am m'akuri ae ti

au toro ngkoe.

Ko na riai naba ni karaoa ae e m'aiti riki nakon anne ni kaokiia

ake nikira ni maiu

man barongan

nako Iteraera.

I a tia ni kaakiko ikai b'a kaanga te taura

i bukiia botannaomata nako;

ko na riai n anaa m'aakau ni kakamaiu

nakoia aomata nako n te aonnaba.”

E Na Kamaiuia Ana Aomata Te UEA

7Iteraera, bon te UEA Ngai ae te Atua ae e tabu,

are e kamaiuko.

Bon te toro ngkoe irouia taan tautaeka

ao taian botannaomata

ake a kabuaakakako.

8Aei ana taeka te UEA:

N na kaekai am tataro

b'a I a tia n namata te tai

are N na i buobuoki iai

ngkana I roko ni kamaiuko.

I a tia n rineiko

b'a ko na uota au berita i bukin te kaantaninga

nakoia botannaomata ni kabane.

Ko na manga karaoa te aba

ma b'aina nako ake a uruaki,

ao ane a na roko aomata

ni maeka ikekei.

9Ko na kainaomataia buure

man taiani kakai ake a rootongitong

b'a a na noora ootan te ngaina.

Ana kunei kanaia aika a m'aiti

i aon kawaia n okira mwengaia,

e ngae ngkana a mena i aon tabuki aika akea kain aoia.

10A na bon aki konaa ni baki

ke n taka;

a na aki namakina

kabuebuen taai

ke angin te rereua aika a kabuebue

N na bon aki nanoanga

ngkana I kairiia

i nanon karaangan raan.

11N na kaboraoi taiani maunga

ao ni karaoi taiani kawai;

12Ao i mwiina, a na oki au aomata

man aaba aika a raroa

mai meang ao maeao

ao man te kaawa ae e buubura are Tiene. Ana Akoi Te UEA

13Tuangiia taiani karawa ao aonnaba

b'a a na anene ni kukurei;

tuangiia taiani maunga

b'a a na ira buakon te anene.

A tia ni karawawataaki ana Aomata te UEA

ma E a tia ni kaota ana akoi

ao e anganiia te mwengaraoi.

14A taku kaain Tion,

“E a tia n tannako te UEA

ma ni m'aninga taekara.”

15E taku te UEA,

“E a tia ni m'aninga taekan natina te tina

are e nanoanga natina ni mammana?

E konaa n aki tangira te ataei

ae e bon nako man oin rab'atana?

Ngkana e konaa ni m'aninga te tina,

ma Ngai N na bon aki m'aninga taekam.

16E na koreaki taamnein am kaawa are e buubura

i nanoni baim.

Ko meemena n taai nako n au iango nako!

17“E na waekoa ni karaoaki am kaawa

nakon waekoan uruana

A na keerikaaki ao a na nako

akana a buakanna.

18Noora rarikim nako! Ko na noori

aomata aika a tabe n okira mwengaia.

B'a ngkai I bon maiu,

Ngai ae te UEA, ao I berita

b'a e na rangi n taatangiraki

n ai aron te kainrou te aine

ae e taabianna ni bai ni katamaroa.”

Ana Bong Ierutarem Aika A Na Roko Aika A Raneanea

19E a maenikun ngkai Ierutarem!

Bon akea te b'ai teuana ae e tiku n te kaawa.

Ma e na manga moan karaoaki

ao e na manga waekoa n onrake n te aomata;

ao a na kairiribai aika a iowawaa

a na bane n nako n taabo aika a raroa.

20Bon te aine Ierutarem

aika a bungiaki natina

ngke e mena i nanon te rawaawata ae moan te korakora

i mwiin buan kainabana.

Ao ngkai a nang roko

ataei aikai ni kakaei nneia n

te kaawa ae e a onrake irouia aomata,

21ao e titiraki Ierutarem ni kaangai,

“Bon tinaia ngai?

N na kaanga ni bung

ngkana I bon teimatoa naba n tangitang

i abaia ianena?

Antai ae e kaikawaia ataei aikai?

ao a roko mai ia?”

22E taku te UEA ae te Atua:

“N na anga te kanikina n te tai ae e waekoa

nakoia botannaomata nako

b'a a na kaokiia natimi m'aane

ao natimi aine

nako nanoni bain Ierutarem.

23A na roko ni boobaraaki

ueanim'aane ma ueanainen

taiani botannaomata aikai

ake a kaikawaia.

A na kaawakiningkami

kaanga te toro

ae e kaawakina te ataei.

Ao ane ko na ataia iai

b'a bon am UEA Ngai.

E na aki b'ara nanom

ngkana ko onimakinai.”

E Mena Te UEA N Ara Itera

24Bon akea kangaangan kamaiuan temanna

mai roun temanna ae e korakora

ae e iowawaa?

25Ma E a tia te UEA ni berita

b'a E na tei man ara itera

ao E na kamaiuia ara ataei

mai rouia ara kairiribai

aika a korakora ma n tiritiri aikai.

26E na karaoia aomata aika a iowawaa aikai

b'a a na bon kana irikoia

ao a na mooi

boni man raraaia.

Ao ane a na ataai aomata nako

b'a bon ara Tia kamaiu te UEA;

Atuan Iteraera ae Moan te M'aaka

are e kamaiuia ana aomata.