Iobi 38 - Kiribati New Version Bible

E taetae te UEAMai buakon te Angibuaka

1Ao e taetae te UEA nakon Iobi

mai buakon te angibuaka ni kaangai:

2Antai ngkoe ngkai ko nanououa ni wanawanau,

n aron am taeka aika akea nanoia?

3Teirake ngkai n aron te aomata,

ao kaekai titiraki aika N na titirakiniko iai.

4Ko mena ikekei ngke I karaoa te aonnaba?

Ngkana e bati am atatai i aon anne, ao taekinna nako Iu.

5Antai ae baairea buburana?

Antai ae katika te kora ni kaeti i aona?

Ko atai kaekaan akanne ni kabane?

6A tei i aon tera taiani boua ake a kamatoa te aonnaba?

Antai ae kawenei atiibun koonan te aonnaba?

7A ikotaki n anene itoi ni karangainan te bong arei,

ao a takaarua ni kukurei b'ain karawa.

8Antai ae kaina te mataroa n tuuka rinin taari

ngkana a b'aroa aonteaba?

9Boni Ngai ae I rabuna marawa n taian nang

ma n niniria n te rotongitong.

10I korea tian marawa,

ao I katikua i tinanikun te mataroa ae rokanaki n taiani b'auti.

11Ao I kaangai nako ina,

“Bon aio tokin naom aika korakora.”

12Iobi, Ko a tia n tuanga te kaarangaina

b'a e na kainga mainiku i nanon maium?

13Ko a tia n tuanga ootan te moaningabong

b'a e na kanakoi buraen taurani matana ni kaota te aonnaba?

14Ao i mwiina, e na kaota raoi te aonnaba ni katereterea

kanga te kunnikai ae m'arairai ae matan te rooti,

n ai aron tereteren te kanikina i aon te b'atua?

15E rangi n raka raneanean te ngaina i rouia aomata aika buakaka

n te aro are e tuukia man kaikoakaia aomata.

16Ko a tia n roko ni koburaken taari are i kabin marawa ake i nano?

Ko a tia n nakonako i kabin marawa?

17Iai ae a tia ni kaoti nako im

mataroan abaia maate ake a rotongitong?

18Ko ataia b'a buburara te aonnaba?

Ko na kaekaai ngkana ko ataia

19Ko ataia b'a e nako mai ia te oota,

ke tera oin rikin te rotongitong?

20Ko kona ni kaotia nako ia b'a ab'akira kawaia,

ke ni manga konaa ni kaokia?

21I taku b'a ko a boni kona, b'a ko a kara,

ao I taku naba b'a ko mena naba ikekei n te tai are E karaoa iai te aonnaba!

22Ko a tia n rin n taian ru ni kaawakinib'ai,

ike I kaawakina iai te tinoo ma te karau te atiibu?

23I kakaawakini i bukin taai ni kangaanga,

aika taai n un ao taai ni buaka.

24Ko a tia n roko n te tabo are e waerake mai iai taai,

ke te tabo are e kaakare mai iai te ang mainiku?

25Antai ae kakaraoa kawain te karau are e b'aro rikaaki iai

ma ni kaitiaka m'aain kawain te baa?

26Antai ae kab'aka te karau n te tabo are akea ae maeka iai?

27Antai ae teboka te aba ae b'atakataka ma ni m'auteretere,

b'a aonga ni bwebwerake taian uteute?

28E koaua b'a iai taman te karau ma te aoi?

29Antai tinan te aiti,

30are e onika te ran nakon te atiibu,

ao e kab'anina aontari?

31Ko kona ni kabaea itoin Nei Auti ni ikoti,

ke ni kabaea te Itua n Rereba?

32Ko kona n tuangiia taian itoi te tai are a riai n otioti iai,

ao ni kaeta aron te Bea are buubura ma bunna?

33Ko atai taian tua ake a kaira aron karawa,

ao ko kona ni kamanena naba nakon te aonnaba?

34Ko kona n takaarua n anga am taeka nakon taian nang

b'a a na kam'aim'aiko n te karau?

35Ngkana ko kanakoa b'anaam nakon te iti ni karawa b'a e na itiiti,

e kona ni kawariko man kaangai, “Ngaia.”

36Antai ae tuanga te mannikiba ae te aibiti b'a e na kaota te karaanga ae na taorake?

37Antai ae rabakau ni wareki m'aitin taian nang

ma ni karangai ni kab'aroi b'a taiani karau,

38te karau are kamatoa te tano b'a te b'ai ae b'anin?

39Ko kakaea te am'arake i bukiia taian raian

b'a a na kanna ma ni katoki bakiia taiani bun n raian

40ngkana a karabaia i nanoni b'angaia te nangananga ni b'a,

ke a wene n tataninga i nanon nneia?

41Antai ae kakam'arakeia taian reben

ngkana a kakaaenako ma bakiia,

ngkana a tangira kanaia nako Iu natiia aika uarereke?