Ioera 3 - Kiribati New Version Bible

E Na Katuaaia Botannaomata Te UEA

1N te tai anne, N na manga kaoka marin Iuta ma Iteraera ngai ae te UEA.

2N na manga ikotiia botannaomata ake a kamaaenakoia au Aomata n taabo nako n te aonnaba n te M'arua are Motikitaeka A na tib'a abau

3ma ni kemboronna ni kakaaea b'a antai ae e na reke i rouna au aomata; a kabonakoia ataeinim'aane ma ataeinaine i bukin kabooaia ainen matawa ao te wain.

4E aera ngkai kam karaoa aei ngkami aika kaain Turo ao Titon? Kam kataia ni karokoingkami Irou? N na kabooa mwiin ae ko karaoia i m'aain ae ko ataa te b'ai ae e na riki.

5Ko a tia n anai au b'ai aika a rangi ni bobuaka, n reitaki ma au tirewa ma au koora ma n uotinako nakon am tembora.

6Ko a tia ni katikitikiia nako kaain Iuta ma Ierutarem mai abaia ao ni kabooia nako nakoia kaain Kuriiti.

7Ma N na karekea nanoia kaain Iuta b'a a na iangoa okiran mwengaia, ao te b'ai are e riki nakoia e na manga riki nakoim.

8N na anga natim m'aane ma natim aine nakoia kaain Iuta, ao a na kabonakoia nakoia Tebean, aika a maeka i Kiraroa. Bon aei au taeka Ngai ae te UEA!

Te Motikitaeka N Te M'arua are Motikitaeka

9Ko na kaangai nakoia botannaomata nako:

“Katauraoi nakon te buaka!

karin angimi nakon te buaka.

Katea ami raian nakon te buaka

ao katauraoi nakon te buaka.

10Karaoi taiani kabaang man taian b'ai ni b'arau

ao karaoi taiani kainiwai man b'aini m'akurin te nne n aroka.

Kakorakorai taabo aika a mamaara.”

11Tai tab'ara, ngkami aika botannaomata nako!

Kawaekoaingkami.

Buubutiia te UEA b'a e na karokoia

ana taani buaka b'a a na iri.

12Kam na iri ngkai

nakon te M'arua are Motikitaeka,

ike E na motikitaekaia iai te UEA

botannaomata nako aika i rarikira.

13Bon tawaanan taian uita ngaiia aika a tawaa.

Uoti ni karin taian tai!

Bon taian kureebe aika a b'arikoriko ngaiia.

Ani moana toutouaia ngkai!

Ngkana arona b'a taian wain ara kairiribai,

ao a na bane n taonako taian tiaeki ni kabane.

14A kaona te M'arua are Te Motikitaeka aomata aika m'aiti.

E na roko ana bong n ana Motikitaeka te UEA

n te tai ae e aki maan ikai

15e na akea ootan taai ke nam'akaina,

ao a na toki raneanean taian itoi.

16E na bekorara te UEA kaanga te raian

mai nuukan Ierutarem

e na karurua aonnaba ma karawa.

Ma te UEA bon te nono,

te tabo ni katantan

i bukiia ana aomata aika Iteraera.

E Na Bon Kakab'aiaia Ana aomata te UEA.

17Bon te UEA Ngai ae Atuami.

Ao kam ataia b'a I maeka i aon Tion,

b'a e aonga n tabu Ierutarem,

ma n aki kuukuneaki n aia taanga ni buaka ianena.

18A na kaona aon te maunga n te bong arei

uaan taiani kureebe aika a kakaonimaki.

Ao a na kam'aita te miriki

ami kao ma ami kooti

aika a am'arake i aon taian tabuki.

A na aki konaa ni m'autakataka

taiani karaanga n ran i Iuta;

ao te raanga n ran are n au Auti

e na raanga n roko man te M'arua are Akatia.

19A iowawa ma n akiako

Aikubita ma Etom,

n te aro ae akea bukina.

Ngkai a na riki abaia b'a

taian rereua aika akea b'ain aona,

20ma a na teimatoa

n iai kaain Iuta ma Ierutarem.

21I maeka Ngai ae te UEA i aon te Maunga ae Tion.

N na katuaaia taani bure

ao N na tei i bukiia aika akea aia bure.