Ieremia 3 - Kiribati New Version Bible

Te Bure Ao Te Mamaa

1E taku te UEA nako ia Iteraera:

Ngkana e a manga mare te aine ae e raure ma buuna,

e konaa are moan buuna

ni manga mare riki ma ngaia?

E aki, i bukina

b'a e na kabuakaka aon te aba te baei.

Ma a bon m'aiti riki antimi ngkami aika Iteraera

nakon m'aitin ana tangira ainen mataawa.

Ao N na kangaa ni manga kaokingkami?

2Kam na ti kataia ni kakaaea tabukin te tabuki teuana

ike kam a tia n nako iai

n taromaurii anti tabem'aang

n aromi ni wene ni bure.

Kam tekateka i rarikin te kawai

kaanga te tia kimoa ae e karaoa te bakairaa,

bon ti ngkoe ae ko angaanga rab'atam

nako ia aomata aika a m'ananga.

E kabuakaka te aba

ami bure n aki kakaonimaki.

3Ma ngaia are, I rawa Ngai ae te UEA

ni kab'aka te karau n te aumeaang.

Ma ko aki mamaa naba

n te b'ai ae ko a tia ni karaoia

kaanga te aine ae ainen matawa.

4Kam aranai b'a tamami

ke raoraomi ae e a tia ni m'arua n te tai ae e maan;

5kam butiai b'a N na katoka uniu,

ma kam aki katoka karaoan te bure.

E Buubutiia Kaain Iteraera Te UEA

B'a A Na Oki Nakoina

6Ngke e uea Iotia ao E taku te UEA:

Ieremia, te abanuea are Iteraera ma te ainenum'a ae e aki kakaonimaki are e a manga riki b'a te aine ae ainen matawa i aon taian tabuki ao i aan nuun taiani kai aika a korakora.

7I ataia b'a e a tia n aki kakaonimaki te abanuea meang ao e a tia ni karaoi buure aika a m'aiti,

8ma e ngae n anne, ao I bon tangiria naba b'a e na okirai. Ma e aki, ngaia are I a kaakiia ma ni kanakoa.

E noora te b'ai ae e riki tarina are te abanuea are Iuta, ma e bon aki tabe naba iai, ao I tarataraia ngke e a manga moana naba ana aki kakaonimaki kaanga tarina.

9E bon aki raraoma te abanuea are Iuta ngkai e riki b'a ainen matawa, ao e aki tabe naba ngkai e kabuakaka rab'atana ao te aba n ana m'akuri n taromaurii taian bouananti aika a karaoaki n taian atiibu ao taian kai.

10Ao te b'ai riki ae moan te buakaka, te botannaomata ae Iuta ngke e bakaaea te okirai.

11A raoiroi riki Iteraera ngke a aki kataia ni bakaaea te okirai.

12Ieremia, ko na takaarua nako meang:

Iteraera, bon ami UEA Ngai

okirai!

Kam aki kakaonimaki

ao kam rangi ni kaunai,

ma I bon nanoanga,

ma ngaia ae, I kab'arai ami bure.

13Kam na ti kaotia raoi b'a kam bon kamangao

ao kam taromaurii antiia ianena

i aan kaai aika a korakora n taabo n aki akaaka.

14Bon ataei ngkami aika kam aki kakaonimaki,

ma bon au b'ai ngkami.

Okira mwengami!

N na anaa temanna ke uoman

man ami kaawa n tatabeua nako ao ami kaainga

ao N na uotiia nako Tion.

15Ao i mwiina, N na rineia taan tautaeka aika a wanawana

aika a na ongotaeka irou,

ao a na kakaawakiningkami

kaanga taan kaawakintiibu.

16E na riki rake m'aitimi,

ao e na akea manenan

uringakin te Atiniberita

ke ni manga karaoa ae e boou.

17E na riki te kaawa ni kabane ae Ierutarem

b'a au kaintokanuea.

A na bane n nakomai botannaomata

n taromauriai,

ao a na aki manga iri nanon taningamatoaia

ao nanoia aika a buakaka.

18Ao i mwiina, n aaba aika i meang,

ngkami aika kaain Iuta ao Iteraera

kam na manga ikotaki,

ao kam na oki nakon te aba

are I anganiia ami bakatibu.

19I aki toki n tangiria

b'a N na karaoingkami b'a kaanga bon au ataei

ma n anganingkami te aba ae te kabanea n tamaroa,

te aba ae te kabane n tikiraoi i aon te aonnaba.

I tangiringkami b'a kam aranai b'a “Tamami”

ao kam na aki rairaki nako mairou.

20Ma n onea mwiin anne, kam riki b'a kaanga te ainenum'a

ae e urui taiani berita ni mare.

Kam a tia n aki kakaonimaki nako iu.

Bon aio au taeka Ngai ae te UEA.

A raraoma n aia bure aomataE taku te UEA:

21Kakauongo nakon taian karongoa

mai aon taian tabuki!

Bon aomatan Iteraera

aika a tang ma ni buubutiai

b'a N na kaekai aia tataro.

A m'aninga taekau

ao a rinea te kawai ae e kaairua.

22N na kaangai nako ia, “Okirai,

N na kamaiungkami

man ami aki kakaonimaki.”

Ao a kaeka ni kaangai,

“Ti na okiriko, b'a bon

ngkoe ara UEA ao Atuara.

23Ti taromaurii bouannanti i aon taian tabuki

ao e korakora karongoaara,

ma bon akea manenaia

boni Ngkoe ae Ko konaa ni kamaiura.

24Ni moa man aia bong ara bakatibu

ngke te botannaomata ngaira ae e uarereke,

e a tia n anai ara uita ara nanai ni man

ma natira mm'aane ao natira aine

B'aara are te kananoanga.

25Ti a tia ni kakaaitarako

kaanga aroia ara bakatibu,

ao ti a mamaa n ara bure.”

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help