1Kora bon natin Itiia te mm'aane, are kanoan Rewi, man te kaainga are Koata. Ao e weteia Ratan, Abiram, ao On man te baronga are Reuben n te bong teuana,
2ao a uaia ni baaireia ngaiia ake aman b'a a na kaitaraa Moote. Ma ngaia are, a bubuti uabubua nimangaun taani kairiri aika a kinaaki b'a buokaia, ao a bane n roko ni kawara Moote
3ma Aaron ao a taku, “E aera ngkai kam a bon rangi ni karietatai ngkami? Boni ngaira naba Ana aomata te Atua aika tabu, ao E boni mena naba i roura ni kabane. E aera ngkai kam taku b'a ti ngkami n onimakinaki?”
4Ao ngke e ongo taeka aikai Moote, ao e katorobubua n tataro.
5Ao i mwiina, e taetae nakoni Kora ma raona ao e taku:
E na kaota te aomata te UEA nakon moaningabongin te ingabong, ae e a tia n rineia b'a te ibonga, ao e na kakaonimaki ni m'akuri te mm'aane anne i bukina.
6Kora, ao aio te b'ai ae kam riai ni karaoia ma raom akanne: Anai tabeua baanin te ai ao kanoai nanoia n taiani kooro, ao te b'ai ni kaboiarara, ao katikui i rarikin te Um'antabunrianna.
7Ao e na riki b'a Ana ibonga te UEA te mm'aane ane E rineia. Kora, kam a tia n rangi n ri aon ae riai ngkami kanoan Rewi!
8Kam bon ataia b'a E a tia te Atua n rineingkami kanoan Rewi mai buakoia Iteraera b'a kam na m'akuri n te Um'antabunrianna,
9ao ni buokiia naba aomata ni kaeta raoi aron taromauriia. Ao tera riki ae kam a manga tangiria?
10E a tia te Atua n anganingkami tib'angami ae okoro, ao ngkai, kam a manga kan riki naba b'a Ana ibonga.
11Kam aki kamangao nakon Aaron ma kam boni kamangao nakon te UEA.
12Ao Moote, e kananako weteaia Ratan ma Abiram, ma a kaoka aia taeka ae kaangai, “Ti aki nakoati!”
13E bon buakaka arom ngkai ko a tia n anaira mai abara ake a tamaroa i Aikubita b'a ti na mate n te rereua aei. Ao ngkai ko a manga kani b'aotiniira n aki akaaka!
14Ko aki toki n taetae ni berita nako ira i bukin te aba ae maiureirei katawanangina, ao taiani nne ni kureebe iai. Ma a ngaa am b'ai aikanne? ani katoka am kewe nako ia aomata aikai. Ma ngaia are, ti rawa n nakoati ni kawariko.”
15Ao e a rangi n un Moote, ao e taku nakon te UEA, “Ko na tai ongora i rouia mm'aane aikai! I bon tuai ni karaoa te kaairua nako ia. I bon tuai naba man anaa aia aati temanna.
16Ao i mwiina, ao e taku nakon Kora, “Kam na nako ngkoe ma raom akanne n ira Aaron nakon te Um'antabunrianna nakon te ingabong.
17Kam na uoti n tatabemaningkami baanin te ai, ao te b'ai ni kaboiarara i nanona, ao kam na anga te b'ai ni kaboiarara nakon te UEA.”
18Ao n te bong are i mwiina, ao a nnei b'aai ni kaboiarara ma kooro mm'aane akekei i nanon aia baan are baanin te ai, ao a tei ma Moote ao Aaron i mataroan te Um'antabunrianna.
19Ao e anai nanoia Iteraera teuare Kora b'a a na kaaitaraia taani kairiri ake uoman akekei.
Ao ngke e riki arei, ao E kaoti te UEA ma mimitongina ae moan te korakora,
20ao E taku nakoni Moote ma Aaron,
21“Kam na kararoaingkami mai rarikiia Iteraera b'a N nang tiringiia n te tai aei!”
22Ma a uaia ni boobaraaki mm'aane ake uoman akekei, ao a kaangai, “Atuara, Ko anga te maiu nakoia aomata aikai. E aera b'a Ko na katuaaia aomata ni kabane aikai ngkana tao bon ti temanna are e karaoa te bure?”
23Ao E kaeka te UEA nakoni Moote ao E taku,
24“Ko na tuangiia aomata b'a a na kararoaia man aia auti n rianna Kora, Ratan, ao Abiram.”
25Ao e m'ananga Moote nakoia Kora, Ratan, ao Abiram, ao a ira Moote taani kairiri irouia Iteraera.
26Ao e tuangiia aomata ni kaangai, “Kam na kararoaingkami man aia auti n rianna mm'aane aika taani bure aikai! Kam na aki riiriing aia b'ai ni kabane b'a kam kaawa n raona aia bure ni kamaunaaki naba.”
27Ma ngaia are, a kam'awaia aomata mai rarikin auti n rianna akekei, ma ti Kora, Ratan, ao Abiram ma aia utu aika a na tiku.
28Ao e taku Moote nako ia aomata, “E a tia n rineai te UEA, ao E tuangai b'a N na karaoi baikai, bon tiaki au iango. Ao kam na noora koauana n te tai aei:
29Ngkana a mate mm'aane aikai n aron mateia aomata nako, ao ngkanne, ngaia e bon eti ae E aki rineai te UEA
30Tera ngke E karaoa te m'akuri teuana te UEA ae bon tuai man nonoraki mai m'aaina, ao tera naba ngke e a ti tabwena naba te tano, ao a b'aka naba mm'aane aikai ma aia utu nako nanona, ao a manga taunaki naba iai ngke a boni maiu, ma aia b'ai ni kabane? Ao ane kam na ataia n te aro anne b'a ngaia a bon tia uaakai n tannako mairoun te UEA!”
31Ao ngke e a tia n taekin taeka aikai Moote, ao e a uki naba te tano are i aaia mm'aane akekei
32ao e kab'autiia ngke a boni maiu, n ikotaki ma aia utu, ao aia b'ai ni kabane.
33Ao e a manga in te tano arei, ao a maunanako uakekei.
34Ao nikiraia Iteraera a ongo b'anaaia uakekei ngke a takaarua, ma ngaia are, a manga birinako naba, ao a takaarua, ao a taku, “Ti a boni maaku n te b'ai anne ngkana e a manga riki nako ira?”
35Ao n te aro ae a aki kantaningaia, ao E kab'aka te ai te UEA ni kabuokiia 250 te mm'aane ake a tia n anga te b'ai ni kaboiarara nako Ina.
36Ao i mwiina, ao E taku te UEA nakoni Moote,
37“Tuanga natin Aaron te mm'aane are Ereata b'a e na anaa baanin te ai mai nanon te ai are kab'aka te UEA. A tabu taiani baan aikai,
38i bukina ngke a tia ni kamanenaaki ni kabuokaki iai taiani b'ai ni kaboiarara nako Iu. Kam na amani ni kamanti ni manga kariki b'a rabunan te baonikarea. A mate mm'aane aikai i bukin aia bure, ao a na riki aia baan are baanin te ai b'a taiani b'ai n reirei nakon aia bootaki Iteraera.”
39Ao e rikoi taiani baan Ereata, ao e amani ni kariki b'a taiani buraonti aika mmani, b'a rabunan te baonikarea,
40n aron are E a tia te UEA n tuanga Moote. Ao a riki taiani baan akekei b'a b'aai n reirei nako ia Iteraera b'a bon ti Aaron ma kanoana aika kariaiakaki n anga te b'ai ni kaboiarara nakon te UEA. Ao ngkana iai ane kataia riki, e na manga katuaaeaki naba n aron Kora ma raona.
Kamangaoia Kaain Iteraera, ao Katuaaeaia41Ao n te bong are i mwiina, ao a manga ngurengure naba Iteraera nakoni Moote ma Aaron, ao a taku, “Kam a tia n tiringiia Ana aomata te UEA ngkami akana uoman!”
42Ao ngke a teibabaa aomata i rarikin Moote ma Aaron, ao Moote ma Aaron a tannako ni kaaitaraa te Um'antabunrianna, ao E kaoti te UEA ma mimitongina i nanon te nang are rabuna aon te Um'antabunrianna.
43Ma ngaia are, a m'ananga Moote ma Aaron nako matan te Um'antabunrianna,
44ike e taetae te UEA mai iai nako ia ni kaangai,
45“Kam'aawaingkami! N nang bon karokoa aia bong Iteraera n te tai aei.”
Ao a kawaekoaia ni bobaraaki n tataro.
46Ao e taku Moote nakon Aaron, “Anaa am baan are baanin te ai, ao kanoaia n te kooro ae m'aaka man te baonikarea. Kanoaia n te b'ai ni kaboiarara tabeua, ao kawaekoako ni uotia nakon te tabo are a mena iai aomata, ao aanga nakon te UEA b'a a aonga ni kab'araaki aia bure. E a rangi ni un te UEA, ao a tabe ni mate aomata!”
47Ao e karaoa te b'ai are tuangaki Aaron. E bon nako buakoia aomata, ao e tei i marenaia aomata ake a mate ma aomata ake a maiu.
48E katokaa te b'ai ni kaboiarara i aon te baan, ao i mwiina, e anga nakon te UEA ni butiia kab'araan aia bure aomata. Ao e rina n toki te aoraki arei, ao a akea riki ae manga mate iai.
49Ma a tia ni mate 14,700 Iteraera, n aki warekaki ma ake a tia ni mate are Kora ma raona.
50Ao e oki Aaron nakon te Um'antabunrianna n tei i rarikin Moote.
Who We AreWhat We EelieveWhat We Do
2025 by iamachristian.org,Inc All rights reserved.
