1Ao e taku Iobi,
2“I a tia n ongo baikanne mai m'aaina, ao bon akea te kabebete ae kam anganai.
3Ma bukin tera ngkai kam aki toki ni karongoa? Tera te b'ai ae karika unimi?
4Ngke arona b'a I mena n tabo ane kam mena iai,
ao e nang baiti te aro ni kabuakaka
ke n anga taeka ni buobuoki.
5I kona ni kakorakorai ngkami ni wiiu,
ao ni karekea te rau nako imi n au taeka.
6Ngkana I taetae, ke ni kainab'aabu,
N na bon teimatoa n rawawata n tainako.
7E a tia te Atua n anaa korakorau;
E a tia n tiringiia au utu ni kabane.
8E a tia n raweai, ao E a riki b'a au kairiribai.
Ao I a tiku ni ngengenrii,
ao bon anne kakoauaana i rouia aomata b'a te tia bure ngai.
9E raebitiai n unna, ao E ribaai;
ao e kangengei wiina nako iu,
ao e katokai matana au kairiribai nako iu.
10A bane n ureki reben mataia aomata nako Iu,
ao a katobibiai ma n orotabaai.
11E anga ngai te Atua nako nanon baiia aomata aika buakaka,
ao E kaaki taekau i rouia aomata aika kam'araa.
12I bon maeka n rau,
ma E roko n aki karauai.
E koona roroau, ao E booa ketau.
E kateai b'a a na b'ai n taakete.
13A katobibiai ana taani katebe,
ao e teke marakin nuukau n ana kanoa ni katebe.
Bon akea Ana nanoanga,
ao E katiinakoa ariu i aontano.
14E aki toki uruan rab'atau,
ao E buakanai n ai aron te tia buaka ae riribai n ana iango.
15I a kunnikaiai n te kunnikai te baeki,
ao I tekateka ni konaaki i aontano.
16E a ura moau i bukin te tang,
ao a b'ata kunin matau.
17E ngae ngke bon akea te b'ai ae buakaka ae I a tia ni karaoia,
ao a itiaki au tataro.
18Te aonnaba O, tai karabai taiani kaairua aika a tia ni karaoaki nako Iu.
Ko na tai katoka tangiu i bukin te eti.
19Bon iai temanna i karawa
ae na tei i buku.
20A tinanikuai raoraou,
ao a tiinako rannimatau nakon te Atua.
21I tangira temanna ae na tei ni kauntaeka ma te Atua i buku,
kaanga aron temanna ae tei i bukin raoraona.
22A tabe ni waaki nako au ririki ngkai,
ao I m'ananga n te kawai ae aki manga okirikaaki.
Who We AreWhat We EelieveWhat We Do
2025 by iamachristian.org,Inc All rights reserved.
