Karikani B'aai 47 - Kiribati New Version Bible

1Ma ngaia are, e kairiia tarina aika niman Ioteb'a, ao e nako ma ngaiia ni kawara te uea, ao e taku nako ina, “A tia n roko tamau ma tariu mai Kanaan ma aia nanai ni man, ma aia nanai n tiibu, ao aia b'ai ni kabane. Ao a mena ngkai n aonon te kaawa are Koten.”

2Ao i mwiina, e a uotiia tarina ni kaotiia nakon te uea.

3Ao e taku te uea nako ia, “Tera ami m'akuri ae kam aki toki ni kakaraoia?”

Ao a taku, “Bon taan kaawakin tiibu ngaira n ai aroia ara bakatibu.

4Ti roko ngkai b'a ti na maeka i abam b'a e a rangi korakora te rongo n te aba are Kanaan, ao a bane ni mate taian uteute i bukin kanaia ara nanai ni man. Taiaoka, anganiira te kariaia b'a ti na maeka n aonon Koten.”

5Ao e taku te uea nakon Ioteb'a, “Ngkai a tia n roko tamam ma tarim

6ao a na inaomata n te aba ae Aikubita. Ke a tekateka n aonon Koten, are boni ngaia kabanean raoiroin te aba aei. Ngkana iai i buakoia ana aomata aika a konab'ai, ao tuangiia b'a a na kaawakiniia nanai ni man.”

7Ngaia are, e a kaira tamana ma tarina Ioteb'a nakon te uea, ao e anga ana taeka ni kakab'aia Iakob'a nakon te uea,

8ao e taku te uea nakoina, “Ai iraua ngkai am ririki?”

9Ao e taku Iakob'a, “M'aitin au ririki i nanon maiu ae te m'am'ananga bon tebubua tenibwi te ririki. Ao ririkini maiu aikai a bon kimototo, ao a kamaamate, tiaki aron anaanaun ririkin maiuia au bakatibu i nanon maiuia naba ni m'am'ananga.”

10Ao e angan te uea ana katekeraoi ni kabo, ao e nako.

11Ao e kamaekaia tamana ma tarina Ioteb'a i Aikubita, ma n anganiia raoiroin aon te aba arei ake i rarikin Rameteti, n aron ana mwioko te uea.

12Ao e katauraoa te am'arake Ioteb'a i bukin tamana, ma tarina, ao ana utu tamana ni kabane, n reitaki naba ma teuare te bina.

Te Rongo

13Ao e a roko ni korakorana te rongo n te aro are ai bon akea te am'arake n taabo ni kabane, ao a rikirake ni kerikaaki korakoraia kaain Aikubita ma Kanaan i bukin te baki.

14Ao ngkana a kabooi kanaia, ao e anai mm'aane ni kabane ni uoti nakon te baareti.

15Ao ngke e a boni bane m'anen Aikubita ma Kanaan, ao a roko kaain Aikubita ma ni bubuti nakon Ioteb'a ma n taku, “Taiaoka anganiira te am'arake, ti a kaani mate. Buokiira. A bane ara m'ane.”

16Ao e taku Ioteb'a, “Uoti mai ami nanai ni maan aika kawakawa; N na kabooa kanami n ami man ngkana arona b'a a boni bane ami m'ane.”

17Ma ngaia are, a uoti aia man aika taian aoti, tiibu, kooti, kao, ao taian aati nako ina b'a booni kanaia. Ao e anganiia aomata kanaia n te ririki anne, ao e anai aia man ni kabane b'a boon kanaia.

18Ao n te ririki are i mwiina, ao a manga roko iroun Ioteb'a, ao a taku, “Ti a bon aki karaba te b'ai teuana Ioteb'a b'a a bon bane ara m'ane, ao a bane ni mena ara man aika kawakawa iroum. Ai bon akea riki ara b'ai n tiku ma ai bon ti rab'atara, ao abara.

19Taiaoka, buokiira, ti a mate. Tai kariaia b'a a na riki ara tawaana b'a taian rereua. Kabooira ma abara n te am'arake. Ti na riki b'a am toro, ao ko na aban naba abara. Anganiira karara te uita b'a ti aonga ni maiu, ao anganiira naba taian ati b'a ti na uniki n ara tawaana.”

20Ao e kabooi aaba ni kabane ake i Aikubita Ioteb'a b'a aban te uea. Ao bon akea te I-Aikubita ae e na aki kabooa nako abana i bukin korakoran te rongo arei, ao a bane aaba n riki b'a aban te uea.

21Ao e karikiia aomata ni kabane Ioteb'a b'a tooro mai tabon Aikubita nako tabona.

22E ti aki reke i rouna kabooan te aba are aia b'ai taian ibonga. A bon aki kabo nakoa abaia, b'a e bon anganiia te kariaia te uea b'a a na maiu iai

23Ao e taku Ioteb'a nako ia aomata, “Kam nooria ngkai b'a I a tia ni kabooingkami ma abami ni kabane b'a ana b'ai te uea. Ao aikai taian ati i bukin unikakin kanoan ami tawaana.

24Ao ngkana e roko tain te tai, ao kam na anga kanimam'akoron ami tai nakon te uea, ao kam kona ni kabongana nikiran ami ati, b'a kanami ma ami utu.”

25Ao a taku, “Ko a tia ni kamaiura. Ko a tia ni karaoa te m'akuri ae e raoiroi nako ira, ao ti kukurei n riki b'a a na toro te uea.”

26Ma ngaia are, e karaoa tuan te aba are Aikubita Ioteb'a ae e na b'aini kanimam'akoron taian tai te uea.” Ao e boni b'ainaki naba ni boong aikai te tua aei. Bon ti abaia ibonga ae aki b'ainna te uea.

Ana kabanea ni bubuti Iakob'a

27Ao a maeka Iteraera i Aikubita n aonon Koten, ike a riki b'a aomata aika kaub'ai ma ni karikiia natiia aika m'aiti.

28Ao e maeka Iakob'a i aon Aikubita i nanon tebwi ma itiua te ririki, ni karokoa tebubua abwi ana ririki ni maiu.

29Ao ngke e a kaan ana tai ni mate, ao e a wetea natina are Ioteb'a, ao e taku nako ina, “Kaamai baim b'a N na taubai ma ngkoe, ao ko na berita nako iu b'a ko na aki tauna rab'atau i aon Aikubita.

30I tangiria n taunaki n te tabo are e taunaki naba iai tamau ma au ikawai.”

Ao e taku Ioteb'a, “N na karaoa ane ko taekinna.”

31Ao e taku Iakob'a, “Berita nako iu b'a ko na karaoa anne.” Ao e berita Ioteb'a nako ina, ao e anga ana kaaitau Iakob'a mai aon ana kainiwene.