1I a kua n te maiu aei!
Ongora nakoni ngurengureu ae kai nanou iai.
2Ko na tai kabuakakaai te Atua.
Tuangai b'a tera tuuau?
3E koaua b'a e raoiroi b'a Ko na iowawa?
E riai i Roum b'a ko na ribaa te aomata are ko bon karaoia?
Ao ni kariaia aia waaki aomata aika buakaka?
4Ti te arona nanom
ma nanon te aomata?
5E koaua b'a e uarereke maium n ai arora?
6Tao anne bukina ngkai Ko wareki m'aitin au bure ni kabane,
ma ni kakaei au kaairua ni kabane ake I a tia ni karaoi?
7Ko bon ataia b'a I aki bure,
ma antai temanna ae kona n tei
i buku ni kaaitarako?
8Ko karaoai ma ni buabuaai ni baim,
ao ngkai, Ko a manga tiringai ni baim naba akanne.
9Uringnga b'a Ko bon karaoai man te bokaboka,
ao Ko nang manga urua rab'atau ni kaokia nakon te tano?
10Ko angan tamau te korakora ni karikai,
ao Ko karikirakeai i nanon biroton tinau.
11Ko karaoa rab'atau n taian ri ma taian toma n ri,
ao Ko rabun n te ia ma te kun.
12Ko a tia n anganai te maiu ao te tangira ae teimatoa,
ao e kateimatoa maiu Am kakawakin.
13Ko karaoi b'aai akekei ni kabane,
ma I ataia ngkai b'a Ko bon baaireia b'a Ko na kaikoakai.
14Ao Ko tataraai b'a Ko taku b'a n na bure,
b'a Ko aonga n aki kab'ara au bure.
15Ni bon te tai naba are I bure iai, ao e a bon reke naba te kangaanga i marenau ma Ngkoe.
Ma ngkana I karaoa ae e raoiroi, ao I aki kubaraki.
I taonaki n te nanokawaki, ao I rootaki n te mamaa.
16Ao ngkana tao I tokanikai,
ao Ko aki ti torokaraniai kaanga te raian,
ma Ko karaoi naba taian kakai ni kaikoakai.
17Ko aki toki ni karerekei taiani b'ai ni kakoaua i bukin kaaitaraakiu.
E rikirake man rikirake unim i rou,
ao Ko aki toki ni babaairea aron buakanakiu.
18Te Atua, bukin tera ngke Ko kariaia b'a N na bungiaki?
N na riai n tia ni mate i m'aain ae noorai temanna.
19Te m'ananga mai biroton tinau nakon te ruanimate,
kaanga ai aron raoiroin te aki bungiaki i Rou.
20Tiaki e a bon kaan toki maiu? Katukai n arou!
Ani kamaiua nanou n nikiran au bong aika ti tabebong.
21N na waekoa n nako, ao I aki manga oki rikaaki
N na nakon te aba ae roo ma n rotongitong,
22are aban te roo, te nuu, ao te mangaongao,
are kanga ai aron te rotongitong otana.
Who We AreWhat We EelieveWhat We Do
2025 by iamachristian.org,Inc All rights reserved.
