Taian Areru 53 - Kiribati New Version Bible

(Ana Areru Tawita i bukin aia Mataniwi taan anene.)Aomata ake a Taku b'a Akea te Atua

1E taku te nanobaba i nanona,

“Akea te Atua.”

Aomata aika aroia aio bon aomata aika a bure aroia,

Ao a karaoi baika bati n ribaki:

akea temanna ae karaoa ae e raoiroi.

2E baraaki te Atua mai karawa n tarataraia aomata,

ni kan noriia b'a antai i buakoia

ae wanawana ae ukoukora te Atua.

3Ma bon akea i buakoia,

bon akea naba temanna:

A bane ni bure aroni maiuia.

4E taku te Atua, “A aki ataia?”

A nanoroo nakana taani kakaraoa ae buakaka?

A maiu mani kurib'aiaia au aomata,

Ao a tuai man tataro nako iu.

5Ma ane kam na taonaki n te maaku

ae korakora ae akea n ai arona rimoa.

Te Atua e na kamaenakoi riia

aia kairiribai ana aomata

ao ko na bon mamaa

ngkana e aki butim'aiko te Atua.

6E bia reke maiuia Iteraera mai Tion!

Ai kukurei ra Iteraera ngkana E a

manga kakab'aiaki iroun te Atua!

Ana kim'areirei ana utu Iakob'a

ao ana kukurei Iteraera.