1-3E tuangai te UEA ae te Atua b'a n na kaangai nako ia kaain Iuta ao Ierutarem:
I kauringngkami Ngai ae te UEA b'a N na kamaraiaa ane e aki kaawakina te boraraoi are I karaoia ngkoa ma Iteraera. Ma ngaia are kam riai ni kakauongo raoi nakon te b'ai ae I taekinna.
4E tuai man bitaki au babaaire man te tai are I kaotinako ia iai ami bakatibu mai Aikubita, te botannaomata ae kaanga ai aron te ura ae korakora are e karanaki iai te biti. I tuangiia ami bakatibu b'a ngkana a ongotaeka nakon Au tua, ao N na riki b'a Atuaia, ao ngaiia a na riki b'a Au aomata.
5Ao i mwiina, I karaoa te b'ai are I a tia ni berita iai ao I anganiia te aba ae moan te tamaroa, ae ngaia ae kam a maeka i aona ngkai.
Ao I kaeka ni kaangai, “Eng te UEA. E boni koaua anne.”
6Ao i mwiin anne, e a manga tuangai te UEA b'a N na kaangai nako ia aomata ni kabane ake a mena i nanon kaawain Ierutarem ao i nanon kaawan nako Iuta:
Kam na karaoa raoi nanon te boraraoi are I karaoia ngkoa ma ngkami.
7I a kaman tuangiia ami aomata man te tai are I kaotinakoa ami bakatibu mai Aikubita, b'a a na ongotaeka i Rou. Ma kam a tia n taningabono
8ngkami ma ami bakatibu. Kam a tia n rawa n ongo, ao kam onea mwiina ni karaoi b'aai aika a tangiri nanomi aika a onrake n te bure.
Kam a tia n aki kaawakina te boraraoi are I a tia ni karaoia ma ngkami, ma ngaia ae N na kamarakingkami n taiani maraia ake a reke mai iai.
9E taku te UEA nako iu:
Ieremia, a iaiangoa kam'aneau kaain Iuta ma Ierutarem.
10A a bon tia naba ni bure n aroia aia bakatibu, n aroia ngke a rairakinako mairou ao a manga taromauriia anti tabem'aang. E a tia te abanuea meang are Iteraera n urua te boraraoi are I karaoia ngkoa ma aia bakatibu, ao ngkai e a manga karaoa naba anne te abanuea maiaki are Iuta.
11Aio te b'ai ae baaireia b'a e na karaoia. N na karokoa te rawaawata i aoia kaain Iuta ao Ierutarem, ao e na akea ae e na reke birinakona. Ane a na buubutiai buokaia ma N na aki ongo aia tataro.
12Ao i mwiina, a na anga taiani karea nako ia anti tabem'aang ma ni kakaaea buokaia mairouia. A rangi ni m'aiti riki antiia kaain Iuta nakon aia kaawa,
13ao a m'aiti riki aia baonikarea i bukin B'aara nakon m'aitin kawain nanon te kaawa i Ierutarem. Ma a bon aki konaa ni kamaiuia kaain Iuta antiia aikai man te kabuanib'ai.
14Ieremia, ko na aki tataro i bukiia aomata aikai ke ni buubutiai kamaiuia. Ngkana ko buubutiai i bukiia ao N na bon aki kan ongo, ao N na bon aki naba kan ongo ngkana a tataro!
15Ao i mwiina, e tuangai te UEA b'a n na taetae ni kaangai nako ia kaain Iuta:
Bon Au aomata ngkami aika kam rineaki,
ma bon akea riaimi
ni mena ikai i nanon au Tembora,
ni karaoi m'akuri aika a buakaka.
A na bon aki konaa ni kamanoingkami man taian kabuanib'ai
ami karea akana kam anga nako iu,
ma ngaia are, kam riai ni katoka karaoan ami bootaki.
16N te tai teuana kam riki b'a te kai te kureebe
ae e onrake n te uaa.
Ma n te tai ae e aki maan ao N na kanako ia taani kakiriwe aika a kakarongoa
b'a a na urui m'aangam
ma ni kaurarakei n te ai.
17Bon te UEA Ngai ae Moan te M'aaka. Ngkami aika kaain Iuta bon te aroka ngkami ae I a tia n unikia, ma kam a tia ni kamaraka nanou ngke kam a manga anga karea nakon B'aara, n aron are a tia ni karaoia kaain te abanuea meaang. N na nang kouti ngkami mani waakami.
Iangoan Tiringan Ieremia18Iai tabem'aang aomata ake a iangoa tiringau.
Ti te bo ngai ma te tiibuteteei
ae e kairaki nakon te tia tiri tiibu,
bon akea te b'ai ae I ataia
n aron te babaaire arei.
19Ma E tuangai te UEA
b'a a tia n iaiangoa koreau ni kab'akaaki
kaanga te aroka
uaana ma b'aina ni kabane
b'a e aonga n ae akea ae e na manga konaa
ni manga ururingai riki.
20I tataro nakon te UEA ni kaangai, “Te UEA ae Moan te M'aaka,
Ko bon kaakaraoa ae e raoiroi,
ao Ko atai iango ni kabane.
Ma ngaia are, I onimakiniko b'a ko na buokai
n irataangau.”
21Ao i mwiina, e taku te UEA:
Ieremia, a taku tabeman m'anen Anatota b'a a na tiringko, ngkana ko teimatoa n taetae i buku.
22Ma N na katuaaia. Ane a na mate aia rorobuaka n ataei n te buaka, ao ane a na mate ni baki natiia.
23Ao ngkana e tia ae N na karaoia, ao a na bon akea temanna man aia utu ae e na tiku ni maiu.
Who We AreWhat We EelieveWhat We Do
2025 by iamachristian.org,Inc All rights reserved.
