1.Tamuera 18 - Kiribati New Version Bible

1Ni banen aia maroroo Tawita ma Tauro, ao n te tai ae aki maan ao a riki b'a raao aika rangi n i tangitangiri Tawita ma Ionatan. E rangi n tabeakina Tawita Ionatan n aron tabeakinana i bon i rouna.

2Ao mai i mwiin te tai anne, e taua Tawita Tauro b'a raoia, ao e aki kakaokia nakoia ana utu.

3Ao e rangi n tangira Tawita Ionatan n te aro are e berita b'a e na riki b'a raoraona n taai nako.

4Ao e buuta te niiniirana Ionatan are e kunnikaina ao e karinna i aon Tawita. Ao e anganna naba kunnikaina ni buaka, ana kabaang, ana kainikatebe ma kanoana, ao ana bare.

5Ao e kokoro bukin b'aai ni kabane ake e kanakoaki b'a e na karaoi i roun Tauro, ma ngaia are, e karikia Tauro b'a te aobitia ae rietaata n te taanga ni buaka. Ao a bane ni kukurei aomata ni kabane, n reitaki ma ana aobitia Tauro ake tekorakina.

Rikin Tawita B'a Ana Kairiribai Tauro

6E a tia n tiringa Koria Tawita, ao e a b'ara te buaka, ao a bane n okirikaaki Iteraera nakon mwengaia. Ao ngke a tabe ni m'ananga n oki Iteraera, ao a otinako aine man kaawan nako Iteraera ni butim'aea te uea are Tauro. A anenei anene ni kukurei ao a m'am'aie n tangin taian timbere ma taian aabi.

7Ao a anene:

E a tia Tauro n tiringiia

tengaa te kairiribai;

Tawita e tiringiia

tebwina tengaa te kairiribai!

8Ao e rangi n un Tauro n te anene arei, ao e iango i nanona ni kaangai, “A taku b'a e tiringiia tebwina tengaa riki nakon are I a tia ni karaoia. Ao ane a na manga tangiria ni karikia b'a aia uea.”

9Ao e aki manga onimakina Tawita Tauro.

10Ao n te bong are i mwiina, E kanakoa te tamnei ae buakaka te UEA b'a e na niniia Tauro, ao e riki kaanga aron te rangirang i nanon ana auti. Ao e rin Tawita b'a e na katanga te aabi n aron are e boni kakaraoia mai m'aaina, ma iai ana kainiwai Tauro i nanon baina n te tai aei.

11Ao e taku Tauro, “N na ewara Tawita ni kanimm'a ma te o.” Ao e karetekea Tawita uoua te tai, ma e katuai kaina Tawita ake uoua.

12Ao e maaka Tawita Tauro i bukina b'a E buoka Tawita te UEA ao E a aki manga buokia.

13Ao Tauro, e karika Tawita b'a mataniwiin te taanga ni buaka ae teuana te ngaa kaaina ao e kanakoa b'a a na buaka.

14Ao e buoka Tawita te UEA, ao e aki toki n totokanikai Tawita ma ana taanga ni buaka.

15Ao aei te b'ai are a rangi ni maaka riki iai Tawita Tauro.

16Ma a bane aomata nako i aon Iuta ma Iteraera ni kakaonimaki nakon Tawita, i bukina ngke e kaira te taanga ni buaka nakon te buaka.

17Ao n te tai teuana, ao e tuanga Tawita Tauro ni kaangai, “Ngkana ko ninikoria ni buaka n ana buaka te UEA i buku, ao N na kaieiniko ma natiu te aine are te karimoa are Nei Meraba.” Ma e iango i nanona Tauro ni kaangai, “I aki tangiria n tiringa Tawita, ma ngaia are, N na kanakoa b'a a na tiringnga kaain Biritia i buku.”

18Ao e taku Tawita, “N na kanga ni iein ma natim te aine? Kai bon te aomata ngai ae akea arou, ao akea naba aron au utu.”

19Ma ngke a roko ana tai Tawita n iein ma natin Tauro te aine, ao Tauro e tuanga natina te aine b'a e na iein ma Ateriera are kaain te kaawa are Meorata.

20Ao bon iai riki natin Tauro te aine ae arana Nei Mikara, ao e a tib'a ataia Tauro b'a e tangira ma Tawita. Ao e rangi ni kukurei iai Tauro,

21ao e taku i nanona, “N na tuanga Tawita b'a e na iein ma ngaia, ao N na kam'anea i rouna b'a e aonga n tiringaki irouia kaain Biritia.” Ao e taku, “N na anganiko riki natiu te aine ae te kauoman b'a ko na iein ma ngaia.”

22Ao e tuangiia ana aobitia Tauro b'a ana maroroo ma Tawita n ti ngaia ma ngaia, ma ngaia are, a kawara Tawita ao a taku nako ina,

23“E aera ngkai ko aki bubutiia te uea b'a ko na iein ma natina te aine are Nei Mikara ao nooria, e tatangiriko te uea, ao a kakaonimaki ana aobitia ni kabane nako im?”

Ao e taku Tawita, “Bon te aomata ngai ae I aki kaub'ai ao akea naba kakannatou are N na kona iai ni iein ma te natinuea are Nei Mikara!

24Ao a okirikaaki taian aobitia nakon Tauro ao a tuanga raoi Tauro b'aai ni kabane ake a tia n taekin.

25Ao e kantaningaia Tauro b'a e na bon mate Tawita irouia kaain Biritia, ao e tuanga ana aobitia b'a a na kaangai nakon Tawita, “E aki tangira te koora ma te tirewa te uea. Te b'ai ae ti tangiria b'a e na boo mwiin aia m'akuri ara kairiribai. Ti te b'ai ae ko na karaoia, ko na uota te b'ai ni kakoaua b'a ko a tia n tiringiia tebubua kaain Biritia!”

26Ao a tuanga Tawita aobitia akekei, ao e a kukurei Tawita ni iein ma te ueanaine.

Ao e namata te tai te uea are Tauro, ao i m'aain koron te tai,

27ao a m'ananga nako Tawita ma ana m'aane. Ao a tiringiia uabubua kaain Biritia. Ao e uota rikaaki te b'ai ni kakoaua ma ni kaotia nakon Tauro, ao e a kona ni iein ma Nei Mikara. Ao e kariaia Tauro b'a e na iein Tawita ma Nei Mikara.

28Ao e ataia Tauro b'a e tangira Tawita Nei Mikara, ao e ataia naba b'a e buokaki Tawita iroun te UEA.

29Ma n ataakin baikai iroun Tauro, e bon kakorakora riki maakakin Tawita i rouna, ao e riki b'a a na kairiribai Tawita ni kabane bongin maiuna.

30Ao a aki toki n roroko kaain Biritia ni buakana Iteraera, ma e totokanikai Tawita ngkana e buakaniia. Ao e riki b'a te aomata ae kakannato i bukina ngke a m'aiti riki ana totokanikai n te buaka i aoia kaain Biritia nakon Tauro ma ana aobitia.