Taian Areru 11 - Kiribati New Version Bible

(Te areru mairoun Tawita i bukin te tia kaira te katangitang.)Onimakinan te UEA

1I onimakina te UEA i bukini kamanoau;

kam rangi ni baba ngkae kam kaangai nako iu,

“Kiba nako n ai aron te mannikiba

nako aoni maunga,

2b'a nooria, a kareenai aia kainikatebe aomata ake a buakaka

b'a ana katebeia aomata aika raoiroi.

3Ngkana a uruaki tuua i bukin te botannaomata,

ao akea te bae e kona ni karaoia te aomata ae e raoiroi.”

4E mena te UEA

i nanon ana Tembora are tabu;

ao e mena ana Kaintokanuea i karawa.

E tarataraia aomata ni kabaneia n taabo nako,

ao E atai baika a karaoi.

5E neneri aroia aomata aika raoiroi ma aika buakaka;

ao E ribaia taani kakiriwe ma nanona ni koaua.

6E na kab'aka te ai ma te bubu n ai

ae korakora i aoia ake a bubuaka;

ao E na katuuaia n te ang ae kabuebue.

7E kaakaraoa ae e raoiroi te UEA,

ao E tangira karaoan te motikitaeka ae eti

A na noora matana

akana karaoi m'akuri akanne.