Nakoaia Ibonga 8 - Kiribati New Version Bible

Katabuakiia Aaron ma natina

1E taku te UEA nakon Moote,

2“Kaira Aaron ma natina m'aane nako mataroan te Um'antabunrianna, ao uoti naba taian kunnikai ni ibonga, ao te b'aa ni katabutabu, ao te kao m'aane te teei i bukin te karea ni kab'arabure, ao uoman naba te tiibu m'aane, ao te b'aene ni kariki are e aki karikaki.

3Ao weteia Iteraera ni kabane nako mataroan te Um'antabunrianna.”

4Ao e karaoi b'aai ni kabane Moote n aron are E tuangnga te UEA, ao ngke a bane n roko Iteraera,

5ao e taku nako ia, “Te b'ai are N nang karaoi ngkai bon ana mwioko te UEA.”

6Ao e kairiia Aaron ma natina m'aane nako mooa, ao e kateboteboia.

7Ao e katokaa te kabaraaki, ma te niiniira i aon Aaron, ao te roo i aon babatina, ao te ebota ae taona aona n te kabae n nuuka ae rarangaaki raoi i aon koreana.

8Ao e katokaa te ub'a i aona ao e karin taian urim ma tummim i nanona.

9Ao e katokaa te b'ara are te m'aita i aon atuuna, ao e kanim'a te b'ai ni katamaroa i moan b'arana ae kanikinaean ana b'ai te UEA, n ai aron tuangana iroun te UEA.

10Ao e anaa te b'aa ni katabutabu Moote, ao e kab'aroa teutana i aon te Um'antabunrianna, ma b'aai ni kabane ake a mena i nanona, ao e katabui b'aai ni kabane n te aro anne nakon te UEA.

11E anaa riki te b'aa, ao e a manga katimtim'a itiua te tai i aon te baonikarea, ma b'aina nako ma te beetin, ma nangoana, b'a e katabui nakon te UEA.

12Ao E katabua Aaron ni kab'aroa te b'aa teutana i aon atuuna.

13Ao i mwiina, e a manga kairiia natin Aaron m'aane nako mooa, ao e karin aia kabaraaki, e katokai aia roo i aon babatiia, ao e katokai b'araia i aon atuuia n ai aron ana mwioko te UEA.

14Ao e a uota te kao m'aane ae te tei Moote i bukin te karea ni kab'arabure, ao a katokai baiia Aaron ma natina m'aane i aon atuun te man.

15Ao e tiringa te man Moote, ao e anaa raraana teutana, ao e kateboa tabonibaina iai, ao e kararaaea koonan te baonikarea ake aua iai, b'a kaanga katabuana. Ao e a kabanea ni kab'aroa nikiran te raraa i oin te baonikarea. Ao anne arona ni karaoa te katabu ma te kaitiaki.

16Ao e anai taian nenea Moote ake i aon te kanoannano, ma b'ain nako te ato aika a raraoi, ma tain kirine ma nenea ake i aona, ao e kabuoki i aon te baonikarea.

17Ao e anaa te kao m'aane ni kabane, ma kunna, irikona, kanoannanona, ao e kabuoki i tinanikun te maeka, n ai aron ana mwioko te UEA.

18Ao i mwiina, e a manga anaa te tiibu m'aane Moote i bukin te karea ni kabuokaki, ao a katokai baiia Aaron ma natina m'aane i aon atuuna.

19Ao Moote, e tiringnga, ao e tatauriia iteran te baonikarea ake aua n raraana.

20E korokorea te tiibu m'aane ni kauarerekea, man teboki kanoannanona, ma rangana ake mai buki n te ran, ao e na kabuoka atuuna ma neneana, ma b'ain rab'atan nako te tiibu m'aane ni kabane i aon te baonikarea, n ai aron ana mwioko te UEA nako ina.

21Anne te karea ni kabuokaki are te karea are te am'arake, are e rangi ni kakukureia te UEA boiararana.

22Ao e a manga uota riki te tiibu m'aane Moote are te kauoman, i bukin katabuaia ibonga, ao a katokai baiia Aaron ma natina m'aane i aon atuuna.

23Ao e tiringnga Moote, ao e anaa raraana ni kararaaea iai reben taningan Aaron are te angaatai, ma waebuan baina are te angaatai, ao waebuana are te atai naba. Ao e anaa nikiran te raraa Moote ni kabanea ni kab'aroa ni koonan te baonikarea ake aua.

24Ao e a manga kairiia natin Aaron m'aane nako mooa, ao e kabiri reben taningaia naba ake ataiia n te raraa, ma waebuan baiia te atai, ao waebuan waeia naba te atai. Ao e kabanea ni kab'aroa nikiran te raraa i aon rarikin te baonikarea ake aua.

25Ao e anaa te nenea, nenean aon te kanoannano ni kabane, ma b'ain nako te ato aika a raraoi, ma taian kirine, ma nenean aona, ao rangan te man are te atai are mai buki.

26Ao e a manga anaa kaka teuana taian kariki ake tenaekaki mai i nanon te b'aene ni kariki are e a tia ni katabuaki nakon te UEA; e anaa teuana man te kariki are e renganaki ma te b'a, ao teuana man te kariki are e manii, ao e katikui i aon te nenea, ao waen te man are te angaatai are mai buki.

27Ao e kabane n anganiia Aaron ma natina m'aane te am'arake, b'a a na bon uota aia karea nakon te UEA.

28Ao i mwiina, e a manga anaa te am'arake Moote mairouia ni katokaa i aon te karea ni kabuokaki are i aon te baonikarea, ma ni kabuokia b'a te karea ni katabutabu. Bon anne te karea are te am'arake, ao e rangi ni kakukureia te UEA.

29Ao i mwiina, e anaa b'ab'aan te man Moote, ao e anga b'a te karea nakon te UEA. Ao bon anne tib'an Moote man te tiibu te tei are te karea ni katabutabu. E karaoi b'aai ni kabane Moote n ai aron ana mwioko te UEA.

30Ao Moote, e anaa te b'a ni katabutabu teutana ao te raraa teutana ake a mena i aon te baonikarea, ao e katimtim'a i aon Aaron ma natina m'aane, ao i aon naba kunnikaia. Ao aei ngkanne arona ni katabuaia ma kunnikaia nakon te UEA.

31Ao e taku Moote nakon Aaron ma natina, “Uota irikon te man nako mataroan ana Um'antabunrianna te UEA, ao kaburoa ikanne, ao kanna ma te kariki are i nanon b'aenen te karea ni katabutabu, n ai aron ana mwioko te UEA.

32Kabuoka nikiran te iriko ke te kariki ane e tiku.

33Ko na aki otioti nako mai nanon ana Um'antabunrianna te UEA ni uaa banen raoi bongin katabuakim ake itibong.

34Ti a tia ni karaoi b'aai ni kabane ake E tuangiira te UEA b'a ti na karaoi n te bong aei, i bukin kab'araan am bure.

35Ko na tiku i nanon mataroan ana Um'antabunrianna te UEA ni bong ao ni ngaina i nanon itiua te bong, ni karaoi b'aai ake E tuangko te UEA b'a ko na karaoi. Ma ngkana ko aki, ao ko na mate. Bon anne ana mwioko te UEA nako iu.”

36Ma ngaia are, a karaoi b'aai ni kabane Aaron ma natina m'aane n ai aron Ana mwioko te UEA are e tuangiia Moote.