Itaia 63 - Kiribati New Version Bible

A Na Tokanikai Te UEA I aoia Taian Botannaomata Nako

1Antai ae aei ae roko

mai Botira i Etom

ma kunnikaina ae e kakiriurauraaki?

Antai te aomata ae e kakannato aei ae e m'ananga

ma ana kaboraoi ae e mimitong?

2Te naan raa kiri uraura aikai?

E Kiri uraura am kunnikai

i mwiin toutouan taian kureebe.

3“Bon ti Ngai ae I toutoui taiani kureebe!

Bon akea riki botannaomata aika a i buobuoki. I toutouia botannaomata nako i bukin marakin nanou

ao e kiri uraura au kunnikai

n raraaia.

4I karaoa aei i bukina

b'a I irantaanga

e a roko te tai i bukin

kamaiuaia au aomata.

5Bon akea ae e mena ikekei ni buokai

ke ni boutokaai,

e tokanikai n te buaka anganibaiu ae

e korakora man uniu.

6I toutouia botannaomata ni bonon nanou

ao I karaoia b'a a na koro ni manging;

a tii nako raraaia

nakon taabo nako n te aonaaba.”

Ana Raoiroi Te UEA Nakoia Ana Aomata

7N na taekin aron ana m'akuri

te UEA aika E a tia ni karaoi.

A bon riai n nebonebo!

E a tia ni kaota ana akoi te UEA

nakoia Iteraera;

e a tia n akoi ao ni karaoa ae e raoiroi.

8E kamaiuia ana Aomata te UEA,

ao e taku,

“Bon Au b'ai.

A aki konaa ni kam'aneai.”

9E mwengabuaka te UEA

ngkana e noori aia kaangaanga,

ma a kamaiuaki iroun ana Anera.

E nanoanga ni koaua te UEA,

ai ngaia are, e kamaiuia ana Aomata.

E m'aneia ni baina

ao e uotia i nanon ririki aikai ni kabane.

10Ao i mwiina a rairaki ana Aomata te UEA

ni manga kaitaraa

ao a kananokawakaki

Tamneina ae e Raoiroi ae e Tabu.

Ma ngaia are, e a manga riki b'a aia kairiribai

ao e a manga buakaniia.

11Ma ana aomata a uringa

te b'ai are e riki ngkoa

n ana tai Moote

E bon aki uotiia ngkoa te UEA

ma aia taani kairiiri nako

ma ni kaawakiniia raoi i nanon taari?

E bon aki anganiia ngkoa

Tamneina ae e Raoiroi?

12E M'aati m'aakan te UEA

i rarikin Moote.

E na neboaki te UEA n aki toki

i bukin bwenauaakin taari.

13E kairiia ana Aomata i aon taari

kaanga taian aoti aika a biri i nanon te ang

n aki tokitoki waeia.

14E anga te motirawa Tamneina are e Raoiroi nakoia,

kaanga nanai ni kao aika a motirawa

ngkana a kairaki nakon te m'arua.

E neboaki aran te UEA

i bukin karaoan b'aai ni kabane.

Te Tataro I bukin Te Akoi Ao Te I Buobuoki

15Taiaoka te UEA, taratara rikaaki

man am tabo ane e tabu ma ni mimitong

ane mwengam ane n taiani karawa

ao noora te b'ai ae e riki.

Ko a aki tangiria?

E ngaa m'aakam?

Kaotia b'a ko bon tabeakiniira

ao ko nanoangaira!

16A tia ni kaai ni katinanikuira

ara bakatibu ake Aberaam ao Iakob'a.

Ma Ko bon teimatoa naba n riki b'a Tamara;

Ko a tia n riki b'a te tia kaawakiniira

man taai ake ngkoa.

17E aera ngkai ko karaoira b'a ti na tannako

mairoum, ara UEA?

E aera ngkai ko karaoira b'a ti na

aki tangiria n ongotaeka iroum?

Taiaoka bita nanom!

Bon am taani m'akuri ngaira,

ao bon am aomata ni koaua ngaira.

18E aki rangi ni maan ni b'ainaki

am tembora iroura.

ao ngkai a tia ara kairiribai

ni kab'aka.

19Ti karaoa aron ae kaanga

ko aki tautaekaniira

ke ti tuai aranaki b'a am Aomata.