1Ao e ongo Tawita b'a a buakana te kaawa are Keira kaain Biritia ao a iraei taian koon aika a tib'a taiaki
2Ma ngaia are, e titirakina te UEA ni kaangai, “E riai b'a N na nako ke N na aki nako ni buakaniia kaain Biritia?”
Ao E kaeka te UEA ni kaangai, “Eng, ko na nako ni buaka ni kamaiua Keira.”
3Ma a taku ana rorobuaka nakoina, “Ti a bon maakuia naba kaain Biritia mai ikai, ao e na bon rangi ni korakora riki makura ngkana tia nako riki ni buakana ana taanga ni buaka Biritia i Keira!”
4Ma ngaia are, e a manga titirakina riki te UEA, ao E taku te UEA nakoina, “Ko na nako ni buakaniia kaain Biritia i Keira, b'a N na anganingkami te tokanikai i aoia kaain Biritia.”
5Ma ngaia are, a nako Tawita ma ana rorobuaka nako Keira ao a buakaniia kaain Biritia; a tiringiia aika a rangi m'aiti mai buakoia ao a anai aia nanai ni man. Ao anne aron Tawita ni kamaiua te kaawa.
6Ao ngke e biri nako ngkoa Abiata are natin Aimereka te rorobuaka n raona Tawita i Keira, e uota nako te ebota.
7Ao e ongo Tauro te rongorongo b'a e nako Keira Tawita, ao e taku, “E a tia te Atua ni kaaki Tawita i aani m'aakau. E kam'anea i bon i rouna n rin te kaawa ae e ooaki ma nonona aika iai mataroana.”
8Ma ngaia are, e weteia ana taanga ni buaka nakon te buaka Tauro, b'a a na m'aati nako Keira ma ni katobibia n tauia Tawita ma a na rorobuaka.
9Ao ngke e ongo Tawita ana iango Tauro b'a e na buakanna, ao e taku nakon te ibonga are Abiata, “Uotaamai te ebota ikai.”
10Ao i mwiina, e taetae Tawita ni kaangai, “Te UEA ae Atuaia Iteraera, I a tia n ongo b'a e iangoa rokona Tauro i Keira ikai ni kamaunaa ibuku, ngai ae am toro.
11A na konaa kaain Keira n anga ngai nakon Tauro? E na bon roko Tauro n aron ae I a tia n ongo? Te UEA ae Atuaia Iteraera, I butiiko b'a ko na kaekaai!”
Ao E kaeka te UEA ni kaangai, “E na roko Tauro.”
12Ao e manga titiraki Tawita ni kaangai, “A na anga ngai ma au rorobuaka kaain Keira nakon Tauro?”
Ao E taku te UEA, “A na bon karaoa anne.”
13Ma ngaia are, a kawaekoaia n nako Tawita ma ana rorobuaka ake e kaaniia 600 m'aitiia ni kabane. Ao e b'ara nanon Tauro ngke e ongo Tauro b'a a tia ni biri nako mai Keira.
Tawita N Aaba Ake A Tabukibuki14Ao e tiku ni karabaa Tawita n aaba ake a tabukibuki, n te rereua are i rarikin Tiba. Ao e a m'aiti te tai ae e kuri n reke iai iroun Tauro, ma E aki anga Tawita te UEA nakon Tauro.
15E ataia Tawita ae e ukoukoraki ngkai iroun Tauro b'a e na tiringnga.
E mena Tawita i Oreti n te rereua are i rarikin Tiba.
16E m'ananga Ionatan ni kawaria ikekei ao e kakorakoraa i aan ana kakawakin te Atua,
17ao e taku nakoina, “Ko na aki maaku. E na bon aki konaa n tiringko tamau are Tauro. E a ataia raoi b'a boni ngkoe ae ko na riki b'a uean Iteraera ao Ngai N na riki b'a am kauoman.”
18Ao a kaai ni karaoa aia berita n iraorao imarenaia ni kauoman, E tiku Tawita i Oreti, ao e okira mwengana Ionatan.
19Ao a nako tabeman mai Tiba nakon Tauro i Kibea ao a taku, “Are e karabaa Tawita i aban Oreti n te Maunga are Akira, ni m'akoron rereuan Iuta are i maiaki.
20I ataia te uea ae ko karineaki b'a ko rangi ni kan karekea iroum; ma ngaia ae ko na nako mai nako abara, ao ti na kam'anea nakoim.”
21Ao e kaeka Tauro ni kaangai, “E na kakab'aiaingkami ngkai kam rangi karaoa ae e raoiroi nako iu!
22Ma ngaia ae, kam na nako, ao manga kakoauaa raoi riki; kakaea riki b'a e mena ia ao antai ae e a tia n nooria ikekei. I ongo b'a e rangi n rabakau ni kam'aningaa te aba.
23Kakaaea raoi te tabo are e boni karabaa iai, ao kakoauaa raoi b'a kam na kaongoai raoi rongorongona ni kabane. Ao i mwiina, N na iringkami, ao ngkana e bon mena n te aono anne, N na kam'anea, e aoria ngkana N na kakaaea ni kabutaa aon aban Iuta ni kabane.”
24Ma ngaia are, a nako n okira Tiba n rimoan Tauro. Ao a mena Tawita n rereuan Maon, n te m'arua ae e okoro ni m'akoron te rereua are Iuta i maiaki.
25Ao a m'ananga nako Tauro ma ana rorobuaka n tarataraa Tawita, ma e ongo b'a a mena n taian tabuki ake a kirib'aa n rereuan Maon ao e tiku ikekei. Ngke e ongo aei Tauro ao e nako n ri mwiin Tawita.
26Ao a mena Tauro ma ana rorobuaka n iteran te tabuki are teuana, ao Tawita ma ana rorobuaka n iterana are teuana. A kawaekoaia ni biri nako mairoun Tauro Tawita ma ana rorobuaka, ake a bon rangi ni kaan i rarikiia ao a kaan reke irouia.
27Ao e a ti roko naba te tia uarongorongo ao e taku, “Kam na kawaekoaingkami n oki! A buakana abara kaain Biritia!”
28Ma ngaia are, e katoka kaean Tawita Tauro, ao e a oki ni buakaniia kaain Biritia. Ao anne bukina ngkai e aranaki te tabo arei b'a Te Tabuki ni Kaokoro.
29Ao e nako Tawita nakon aonon Enkeri, ike e tiku iai ni karabaa.
Who We AreWhat We EelieveWhat We Do
2025 by iamachristian.org,Inc All rights reserved.
