Itaia 41 - Kiribati New Version Bible

E Babaairea Aron Te Aomata Te UEA

1Tai kakarongoa ao kakauongo,

abam'akoro ni kabane i nanon te marawa.

Kakorakoraingkami ao kaaningkami,

aomata ni kabane aika taiani botannaomata.

Ti na iangoa aron te b'ai ae e riki aei!

2Antai ae e rinea te tia tautaeka

mai mainiku aei?

Antai ae e katokaia botannaomata ma aia uea

i aoni m'aakana?

E bita ana kabaang ma ana kainikatebe

nakon te taaurouro

are e ukaki nako n te ang.

3E rimwiia n te tai ae e waekoa

n te aro are toko waena

ma aontano

ao e aki roko naba n te namakina te maraki.

4Antai ae e kariki b'aai aikai?

Antai ae e baairea aron te aomata?

Boni Ngai! Bon te UEA Ngai.

I mena ikekei ngke e moani karikaki b'aai;

Ao N na manga mena naba iai ikekei n te toki.

5A noora te b'ai are I a tia ni karaoia

taian abam'akoro ao botannaomata aika ianena

ao a rurubenebene

ngke a tabe ni kaan.

Tera Ae A Konaa Ni Karaoia Bouannanti?

6A karauinanoia i bon imarenaia

taan taromaurii bouannanti,

ni kaangai, “Tai raraoma!”

7A kaungaia i bon irouia

taan karaobanna n taiani kai, taani karaoi biti,

ao taani m'akuri riki tabem'aang

ao a kaangai,

“Ti a tia ni karaoa te m'akuri ae e korakora!”

Ao i mwiina, a neerana te bouannanti,

b'a e aonga n aki b'aka.

Ana Tia M'akuri Te UEA Ae E Rineaki

8Iteraera, bon au tia m'akuri ngkoe

ae e rineaki,

ana utu

raoraou are Aberaam.

9I uotiko nako ikai man iteran te aonaaba

ae e raroa nako ao I kaangai,

“Bon au tia m'akuri ae e rineaki

ngkoe ae I aki konaa ni m'aninga taekam.”

10Ko na aki maaku. Bon raou ngkoe.

Ko na aki ruru ni maaku.

Bon Atuam Ngai.

N na kakorakorako,

ngkana I kamanoko ni baiu

ma n anganiko taian tokanikai.

11A na bane aika ribaiko

ni kam'aitaki mamaaia;

ao akana a buakaniko

a na mauna nako i nanon te ang.

12Ane ko na taratara nako

ni kakaaia am kairiribai aika a iowawa

ma ane ko na bon aki kunea temanna

b'a a tia ni bane nako.

13Bon Ngai te UEA ae te Atua.

I tautaua baim,

ma ngaia are, ko na aki maaku.

I roko ikai b'a N na buokiko.

14Kaain Iteraera kam na aki raraoma,

ngkana a kaangai tem'angina,

Bon ti te m'ata Iteraera!”

Bon Atuan Iteraera ae e tabu Ngai,

ae E kamaiuko ma ni kaawakiniko.

15N na kairiko kaanga te kai ae e

onrake n taian ing.

Ao ko na kamanti ma ni kamanatui

taiani maunga ma tabuki

ni karokoa a riki b'a te taaurouro.

16Ane e na kamaaenakoia te ang ae e korakora

nakon taabo aika a kakaokoro.

Ao i mwiina, kam na karaoa ami bootaki ni kukurei ibuku

ao kam na neboai, Ngai ae ami UEA,

ae Atuaia Iteraera ae e tabu.

E Buokiia Aika A Maiu ni Kainano Te UEA

17Ngkana a mate n taka

ma n aki konaa ni kakaaea te ran

aika a maiu ni kainano ao aika a tangira buokaia,

Ao N na roko ae Atuan Iteraera

ni buokiia.

N na bon aki m'aninga taekaia.

18N na karaangai taiani karaanga i aon

taubukin taiani maunga.

N na kanakoa taian raanga n ran

ni kaoni taiani m'arua.

E na onrake te aba ae e rereua

n raangan taian koburake n ran

ao a na riki b'a neei aika taian reke.

19N na kaonrakea te rereua

n aekaki n aroka nako

aika tiira, aketia, ma motere;

oriwa ma m'aiango;

ao bureen ma teatura.

20Ana bane aomata n noora te baei

ao a na ataia b'a boni Ngai

aia UEA Iteraera ae tabu,

ae e kariki b'aai nako.

Akea Boonganan Taian Bouannanti

21Bon te UEA Ngai

ae Atuaia Iteraera!

Nakomai kaetieti ma Ngai.

Kaoti am b'ai ni kakoaua.

22Nakomai nako rarikiu, ngkami aika taian bouannanti.

Tuangiira taekan boong aika a tia n nako,

b'a ti na iangoia.

Tuangiira taekan boong aika a na roko

b'a ti aonga n ataa

te b'ai ae e na riki.

23Anga te b'ai ni kakoaua b'a bon anti ngkami

n taekin b'aai aika a na bon

roko rimwi.

Karaoa te b'ai teuana ae e raoiroi ke e buakaka,

b'a ti aonga ni miimi iai

ma ni maaku.

24Bon akea boonganami ngkami aika taian bouannanti,

bon akea m'aakami.

E na riki b'a te b'ai ae e rangi n ribaaki

taromauriakimi.

25Boni Ngai ae te UEA ae I rinea te tia tautaeka

are i meang;

ao ngkai e a roko mai mainiku

b'a e na neboa arau.

E na toubekaia taiani uea kaanga te bokaboka,

kaanga taani karaoi m'angko aika a toubekaa te bokaboka.

26Iai mai buakoia ami bouannanti ae e konaa n taekin

baika a roko rimwi?

Iai i buakoia ae e etieti?

Bon akea mai buakomi ae e a tia n taekina aei

ke n taekina te taeka teuana.

27Boni Ngai ae e moan tuangiia

Iteraera ni kaangai,

“Nooria, e a koro bukina!”

Bon te moan Ngai ni katanoataa

te rongorongo ae e raoiroi aei nakon Tion.

28Bon akea mai buakoia taian bouannanti aikai

ae e konaa n anga ana reirei

ke ni kaekai titiraki.

29Bon akea boonganaia,

ao bon akea te b'ai teuana ae a konaa ni karaoia

akea manenaia nakon

te ang ae e a taonnako.