1E ataia Ioaba ae e aki konaa n toki iangoan Abetarom iroun Tawita,
2ma ngaia are, e kanakoa temanna b'a e na kaira te aine ae e wanawana are e maeka i Tekoa.
3Ao e taku Ioaba nakoina, “Karina i aom te kunnikai ni mate ao ko na aki katoka i aon moam te b'ai ni katikiraoi teuana. Naako nakon te uea ao bakaaea aongkoa ko a tia n tang n te tai ae e maan i bukin temanna ae e rangi n tangiraki.
4Ao e m'ananga ainen Tekoa arei nakon Tawita. E bobaraaki ni karinanoa ao e taku, “Te uea ae ko karineaki, taiaoka b'a ko na buokai!”
5Ao e titirakinna Tawita ni kaangai, “Tera ae e riki iroum?”
Ao e taku neirei:
E a mate buu, ao I a riki b'a te aine ae akea buuna.
6Bon iai natiu m'aane aika uoman, ma a un i nanon te tawaana ao akea temanna ae e na tautauia ni karokoa e a mate temanna mairouia.
7Ao a bane n roko irou au utu ao a kaangai nako iu, “Anga natim anne b'a e na tiringaki! Ti na tiringnga b'a e tiringa tarina.” Ma te b'ai ae e tangiria, a na kamaunaa aomata b'a a aonga n anaa abara.
Taiaoka kam na aki kataia ni kamaunaa au m'akaro n ai ae bon ti ngaia nikiran au kaantaninga! E na bon akea riki ae e na manga katokaa aran buu n te aonnaba aei.
8Ao e taku Tawita nakoina, “Okira mwengam, N na katoka te kangaanga anne i bukim.”
9Ao e taku te aine arei, “Bon au kaantaninga b'a e na aki karika te kangaanga nakoim am babaaire i bukin katokan te kangaanga aei. Ma ko na bukinai ngkana iai te kangaanga iai.
10Ao e taku, “Ngkana iai ae a karika te kangaanga nakoim, ko na kairiia mai nako iu, ao e na aki manga oki n riki!”
11Ao e kaeka neirei ni kaangai, “I tuea n aran te UEA ae Atuam b'a bon akea temanna ae e na kariaiakaki n tiringa natiu!”
Ao e kaeka ni kaangai, “I tuea n aran te UEA ae E maiu b'a bon akea temanna ae e na konaa n riinga irana naba teaina!”
12Ao e titiraki neirei nakoina ni kaangai, “Te Uea ae ko karineaki. I konaa n taekina riki te b'ai teuana?”
Ao e taku, “Eng, ko konaa.”
13Ao e taku te aine arei:
E aera ngkai ko karaoa te m'akuri ae e kaairua nakoia ana aomata te Atua? Ko bon kabuakakako n am taeka are ko a tia n taekinna, ngkai ko tuai man kaoka natim are e biri nako.
14Ti na bane ni mate ma ni mauna nako kaanga te ran ae e kab'aroaki i aon te tano. Ma E aki anai maiura te Atua, ma n onea mwiin anne, E a manga bon karekea te kawai are ti na manga oki iai ngkana ti biri nako.
15Te Uea ae ko karineaki, I roko ikai b'a N na taekina au kangaanga, b'a I maaku ngkana iai ae e na karaoa aei nako iu. I iangoia b'a N na kawariko b'a ko konaa ni buokai.
16I ataia b'a ko bon ongora raoi nakon au kangaanga ao ko kamaiuai ma natiu te m'aane mairouia ake a tangiria n anaa te aba are E anganiira te Atua.
17I a konaa ni motirawa raoi ngkai b'a ko a tia ni baairea arona. Ko ataa kaokoron te eti ma te kaairua n ai aron Ana anera te Atua, ao au tataro b'a e na meemena iroum te UEA ae Atuam.
18Ao e taku Tawita nakon te aine arei, “N nang titirakiniko ngkai te titiraki, ao ko na aki karabaa te koaua!”
Ao e taku te aine arei, “Uotiko, te Uea ae ko karineaki.”
19Ao e taku Tawita, “Bon Ioaba ae e tuangko b'a ko na karaoa aei?”
Ao e taku te aine arei, “Te Uea ae ko karineaki, I tuea n aram b'a bon akea ae e konaa ni karabaa te koaua mairoum. Eng, boni ngaia ae e tuangai te b'ai ae N na taekinna,
20b'a bon ti i bukin kaotan iteran te kangaanga are teuana nakoim. Ko wanawana kaanga aneran te Atua n atai b'aai nako aika a riki n te aba aei.”
21Ao e rairaki Tawita nakon Ioaba ao e taku, “E taraa n ae akea riki te b'ai ae N na baaireia b'a e a tia. Naako kaoka Abetarom.”
22Ao e boobaraaki Ioaba n rangi ni karinanoa ao e taku, “Te Uea ae ko karineaki, ko rab'a ngkai ko anganai te kariaiakaki. E teretere raoi iai b'a ko butim'aea au iango.”
23Ma ngaia are, e a nako Ioaba nako Keturi n anaa Abetarom. Ma ngke a okira Ierutarem,
24ao e taku Tawita nakon Ioaba, “I aki tangiria n taraa matan natiu ae Abetarom. Tuangnga b'a e na aki kaakawarai.” Ma ngaia are, e nako Abetarom nakon oin ana auti n aki manga kaokaoti nakon tamana.
Abetarom te Botonim'aane25Bon akea i aon Iteraera ae e orea botonim'aanen Abetarom.
26E kookoreaki iran atuuna teuana te tai n te ririki, ao ngkana e katineaki rawaawatan irana, e raka i aon uoua te kirokuraem rawawatana.
27Bon iai natin Abetarom aika teniman m'aane. Ao iai naba natina te aine ae arana Tam'aa, are e rikirake b'a te ataeinaine ae e rangi ni botonaine.
A Uaia Ni Kaitibo Abetarom ma Tawita n te kabanea28E maeka Abetarom i Ierutarem i nanon uoua te ririki ao e aki nonora tamana.
29E tangiria Ioaba Abetarom b'a e na taetae ma Tawita i bukina. Ma ngaia are, n te bong teuana, e kanakoa ana rongorongo ni buubutiia Ioaba b'a e na kawaria, ma e rawa Ioaba. E a manga kanakoa riki ana kauoua n rongorongo, ma e bon teimatoa naba Ioaba n rawa.
30Ao n tokina, e a tuangiia ana tia m'akuri Abetarom ni kaangai, “E kaan ana tawaana ni b'aare Ioaba ma ngai. Kam na nako ni kabuokia!” Ao a nako ni kabuokia.
31Ao e nako Ioaba nakon ana auti Abetarom ao e taku, “E aera ngkai a kabuoka au tawaana am taani m'akuri?”
32Ao e kaeka Abetarom ni kaangai, “B'a ko aki kan ongo ngke I kawaekoako. I tangiriko b'a ko na tuanga tamau b'a e aera ngkai e tangirai b'a N na oki mai Keturi. E raoiroi riki ngke I bon tiku ikekei. I tangiria ngkai n noora tamau! E na bon tiringai ngkana arona b'a I bon bure.”
33Ao e nako Ioaba ni kawara Tawita ao e tuangnga ana taeka Abetarom. Ao e kanakoa wetean Abetarom, ao e roko Abetarom. E bobaraaki n rangi ni karinanoa, ao e rab'atia Tawita ao e kiiti ma ngaia.
Who We AreWhat We EelieveWhat We Do
2025 by iamachristian.org,Inc All rights reserved.
