1-3Ao a tewea boowin aia botannaomata Iteraera. Ao a karaoa aia kabowi n te tabo n taromauri are i Mitib'a i bukina ngke bon ana Aomata te Atua ngaiia. Ao a bane n roko m'aane aika a tau nakon te nakoa n tautia mai aon Iteraera ni kabane--mai Taan i meang, Beerateb'a i maiaki, ao Kireata i mainikun te Ioretan. 400,000 taiani m'aane ake a roko i Mitib'a, ao a bane n ti te bo aia namakin n aia m'akuri kaain te baronga are Beniamin.
Ao e roko rongorongon te kabowi arei irouia kaain te baronga are Beniamin.
Ao n te tai are a roko iai n aia tabo taani kairiiri man taiani baronga nako, ao a taku Iteraera, E kanga n riki te aro aei?
4ao e taku buun te aine are e tiringaki:
I nako ma bu nako Kibea i abaia kaain te baronga are Beniamin n te tairiki anne.
5Ngke e a bon b'akanako te tai n te tairiki arei, ao a roko m'aanen Kibea ni katobibia te auti. A tangiria ni kan tiringai, ma ngaia are, a anaa bu n taua ao a tiringnga.
6Bon te b'ai ae aki kakaraoaki te aro aei i aon Iteraera, ngaia are, I a korokorea rab'atana ma ni kanakoi m'akorokorona nako aon Iteraera ni kabutaa.
7Bon Iteraera ngkami, ao kam na riai ni iangoa te b'ai ae na karaoaki irouia m'aanen Kibea.
8Ao a bane ni bo nanoia kaain te taanga ni buaka, ao a taku, Akea ae na okira mwengana iroura.
9-10Ti na kanakoa teuana te katebwina m'aane man taian baronga nako b'a a na urakina te am'arake nakon te taanga ni buaka. Ao ti na titirakina te Atua b'a antai aika a na nako ni buakana Kibea, b'a a na bon riai ni katuaaeaki m'aane aikai i bukin te m'akuri ae rangi ni buakaka are a karaoia i aon Iteraera.
11A bane ni boraoi aomata b'a a na riai n katuaaeaki kaain Kibea.
12A kanakoia taan uarongorongo taani kairiiri mai Iteraera nakon taiani kaawa nako i aon Beniamin. Ao a taetae ni kaangai taani uarongorongo n taabo nako ike a nako iai, E aera ngkai a karaoa te m'akuri ae moan te buakaka m'aanen Kibea?
13Ti bon aki kona ni kariaia b'a e na aki katuaaeaki te bure ae moan te buakaka aei i nanon Iteraera. Kam na kanakomaia m'aane aikanne b'a ti na kamateia.
Ma a rawa kaain Kibea n ongo irouia Iteraera ake tabeman.
14Ao a bane ni m'ananga m'aanen kaain kaawan nako te aba are Beniamin nako Kibea ma n tauraoi ni buakana Iteraera.
15Tautian te aba are Beniamin bon 26,000 m'aitiia, n aki warekaki 700 tautian Kibea ake a rangi n rabakau ni buaka.
16Mai buakon te taanga ni buaka aei bon iai 600 m'aitiia aika a maing aika rangi n rabakau ni buaka, ao a kona ni bana n te b'a ni katetekea te b'ai ae kaanga i rarikin te irannatu n te atiibu ni katoa aia tai ni bana.
17Ao a karaua ni baairea aia taanga ni buaka Iteraera ao a kunea b'a 400,000 m'aitiia ana tautia aika rangi ni m'aatai n te buaka.
18Ma ngaia are, a nakon te tabo n taromauri i Betaera ao a titirakina te Atua ni kaangai, Antai te baronga ae te moan m'ananga ni buakaniia kaain te baronga are Beniamin?
19Ao a kam'ainga aia kaemb'a tautian Iteraera nakon te tabo ae kaan ma Kibea.
20Ao a kitana aia kaemb'a, ao a baaireia nakon aia tabo b'a a nang buakana Beniamin.
Buakan Iteraera ma Beniamin21Ao a otinako tautian Beniamin mai Kibea ni buakaniia Iteraera, ao ngke e a bong, ao 22,000 tautian Iteraera aika wene ni mate i aontano.
22-24Ao a nako Iteraera nakon te tabo n taromauri ao a tang ni karokoa bungin taai. Ao a titirakina te UEA ni kaangai, Tera arora, ti na manga buakana riki te baronga are Beniamin, e aoria ngkana bon ara koraki?
Ao E taku te UEA, Eng, manga buakanna riki.
Ao a kakorakorai nanoia tautian Iteraera n tatabemaniia nako b'a a na ninikoria ma ni kakorakoraia ni buaka. Ao n te bong are i mwiina, ao a manga nako n okira Kibea ao manga baaireia naba n aron are mai m'aaina.
25Ao ni bon te bong naba arei, ao a otinako tautian te baronga are Beniamin mai Kibea ni buakaniia, ma ni manga tiringiia 18,000 Iteraera i nanon te marae ni buaka.
26-28Ao a nakon te tabo n taromauri Iteraera i Betaera, te tabo ike e kaawakinaki iai te Atiniberita. A tekateka i aon tano, ao a tang ma n aki am'arake ni karokoa te bong. Ao ngke e nang bung taai, ao a angakarea nakon te UEA ao a bubutiia Ana kakab'aia. Ao e tataro Bineati are te ibonga ni kaangai, Ara UEA, bon ara koraki kaain te baronga are Beniamin. Ti nang katoka buakanakiia, ke ti na buakaniia riki?
Ao E taku te UEA, Buaka, ao N na katokanikaingkami nakon te ingabong.
29Ao a katobibia Kibea Iteraera, ma a karabaia n te aro b'a a na aki nooraki.
30Ao n te bong are i mwiina, ao a manga okiri naba baaireaia n aron are uoua te tai mai m'aaina,
31-41Ma e a bitaki aia kawai ni buaka n te tai aei. A taku, Ngkana a buakaniira tautian Beniamin, ao ti na birinako b'a aonga ni kakioira nako man te kaawa nakon taiani kawai.
Ao a buakaniia Iteraera tautian te baronga are Beniamin ma n totokoia rikaaki man te kaawa. A tiringiia e kaaniia 30 Iteraera i nanon te katawanang ao i nanon te kawai are i marenani Kibea ma Betaera. Ao a iango m'aanen Beniamin ao a taku, Ti a manga katotoroiia nako naba kaanga aron ake mai m'aaina.
Ao a birinako Iteraera, ma a birinako ni kaaitaraa te kaawa are B'aara Tam'a, ao a manga botiia. Ao a tia ni katauraoia aia taanga ni buaka aika karabaia, ao a kakoauaa b'a a na bon tokanikai. A tia ni karabaia 10,000 tautian Iteraera aika bane aroia i maeaon Kibea, ao n te tai naba are a kakioia iai Iteraera kaain te baronga are Beniamin nakon tinanikun te kaawa, ao a teirake naba tautia ake 10,000 ni buakaniia n te aro ae karina i mataroan oon te kaawa. Ao a kabirim'akaia n ninia Kibea ma n taua, ma n tiringiia kaaina ni kabane. Ao i mwiina, a kabuoka te kaawa b'a aia kanikina nakoia raoia ake tabem'aang b'a a nang riai n manga rairaki ni buakaniia tautian te baronga are Beniamin.
Ao e rangi ni matoatoa te buaka nakoia tautian te baronga are Beniamin n te aro are a aki ataia b'a a reke n te kaangaanga. Ao ngke a tanrikaaki ao a noora te bubu ae waerake mai aon aia kaawa. Ao ngke a taraa m'aaia ao a nooria tautian Iteraera b'a a manga rairaki ni buakaniia. Ao a rangi ni maaku, b'a a ataia b'a iai te b'ai ae riki ae moan te kakamaaku. Ao e bon rangi ni kakamaaku b'a a mate tautian te baronga are Beniamin ae ri aon 25,000 m'aitiia n te bong anne. Ao koraki ake a tiku ni maiu a ataia b'a E anga te tokanikai te UEA nakoia Iteraera.
42Ao a birinako m'aanen te baronga are Beniamin ni kaaitaraa te rereua, ni kataia ni birinako mai rouia Iteraera. Ma a birim'aaka Iteraera ni buakaniia mai akuiia. Ao a manga otinako kaain kaawa ake a kaan ma ngaiia ni buoka buakanakiia m'aanen te baronga are Beniamin,
43ake a buaka man itera aika kakaokoro. Ao a kakorakoraia Iteraera ni buaka. A kakioia man tiringiia aia taanga ni buaka kaaini Beniamin ni karokoa te tabo ae i mainikun Kibea,
44ni karokoa a mate 18,000 taani buaka.
45Ao a rairaki taani buaka man te baronga are Beniamin ni biririkaaki n te kawai are nako B'aan Rimmon i nanon te rereua. A tiringiia 5,000 mai buakoia i nanon te kawai, ao a kakioia ake nikiraia ni karokoa a manga tiringiia riki 2,000.
46A mate 25,000 m'aitiia tautian te baronga are Beniamin n te bong anne, ao bon angiia bon tautia aika bane aroia.
47Bon ti 600 ake a reke birinakoia n te rereua nakon B'aan Rimmon, ike a tiku iai i nanon 4 te nam'akaina.
48Ao a okirikaaki Iteraera nakon kaawan nako abaia kaain te baronga are Beniamin, ma n tiringiia aomata ma maan, ma ni kauraa te kaawa.
Who We AreWhat We EelieveWhat We Do
2025 by iamachristian.org,Inc All rights reserved.
