2.Rongorongo 30 - Kiribati New Version Bible

Ana Katauraoi Etekia Nakon Bukamaruan Te Toa are te Riao

1E aki karaoaki te Toa are te Riao n te moan nam'akaina, are bon te tai are e kaakaraoaki iai,

2i bukina ngke a m'aiti ibonga ake a tuai n itiaki ao a aki tau ni m'akuri, ao i bukina naba b'a a m'aiti kaain Iuta ake a tuai n roko i Ierutarem i bukin te Toa anne.

3Ma ngaia are, a boraraoi Etekia ma ana mataniwi ao aomata b'a a karaoa te Riao n te kauoua n nam'akaina.

4Ao e kanakoa ana rongorongo Etekia nakoia aomata ni kabane i aon Iteraera ao Iuta, n reitaki naba ma ake a mena n te aba are Eberaim ao Manate Maeao ni kaoiia nakon te Tembora i Ierutarem i bukin bukamaruan te Toa are te Riao i bukin karinean te UEA ae Atuan Iteraera.

5A bane ni kaoaki aomata nako ni moa mai Beera Teba i maiaki nako Taan i meang. Ai tib'a aio te kabanea ni korakora iai m'aitiia aomata aika a bukamarua te Toa are te Riao, n aron are e tauaki mwiina n te rongorongo ae e eti.

6E m'ananga ni kabutai taabo nako ana tia ua rongorongo Etekia i aon Iteraera ao Iuta ma taian reta aika a kaangai kanoaia:

Kaain Iteraera, ngkai e reke maiumi man aia buaka uean Aturia, e a roko te tai ae kam a riai n tanrikaaki iai nakon te UEA ae te Atua are e taataromauriaki irouia ara bakatibu ake Aberaam, Itaaka, ao Iakob'a. E na toki unna ngkana kam karaoa aei.

7Kam na aki kakairi n aroia ami bakatibu ao ami koraki n Iteraera ake i meang. A aki kakaonimaki nakon te UEA, ao E bon katuuaia n ae e kakamaaku.

8Kam na aki taningabono n aekakiia ami bakatibu. Iangoia ngkai b'a kam na ongotaeka iroun te UEA ae Atuara! Nakomai nako Ierutarem ao taromauria i nanon te Tembora are bon ana b'ai n aki toki. Ao ane e na toki iai unna,

9ane a na kaota te nanoanga ami kairiribai ake a tauia ami utu ao ane a na kaokiia nakon mwengaia. E akoi te UEA ae te Atua ao e nanoanga, ngkana kam tanrikaaki nako ina, ao E na bon aki tannako mairoumi.

10A nako taan uarongorongo ni kabutai kaawan nako Eberaim ao Manate Maeao nakoiang ni karokoa aban Teburun, ma a bane aomata ni ngare ma ni kakanikoia.

11Bon ti tabeman aomata man baronga ake Atera, Manate Maeao, ao Teburun ake a nanorinano ma ni m'ananga nako Ierutarem.

12Ao te Atua e karaoia aomata ni kabane i Iuta b'a a na rangi ni kan karaoi b'aai ake a tuangaki irouia Etekia ma ana mataniwi.

Bukamaruan te Toa are te Riao

13I nanon te kauoua n nam'akaina, a bootaki iai aomata aika moan te m'aiti i Ierutarem b'a a na kauringa te Toa are te Kariki ae Aki Karikaki.

14A anai aia baonikarea ianena ni kabane ao baonikarean te b'ai ni kaboiarara are aia b'ai naba ianena i Ierutarem ao a tewenakoi ni M'aruan Kiteron.

15Ao i mwiina, ni katebwi ma auan bongin te nam'akaina naba arei, ao a moana tiringan taiani kao teteei kanoan Rewi i bukin te Toa are te Riao,

16i bukina b'a a m'aiti taan taromauri aika a tuai n itiaki ao a aki kariaiakaki b'a a na tiring oin aia tiibu teteei. I nanon te tai anne, iai tabeman taian ibonga ao kanoan Rewi ake a tiku naba ni mamaa i bukina ngke a tuai n ri nanon te bootaki i bukin kaitiakaia.

17A kawaekoaia ni kaitiakia ri nanon te bootaki arei ma n nakon te Tembora n anga taiani karea i bukin kakukureian te UEA. Ao i mwiina, a kakioi nneia ibonga ma kanoan Rewi n aron are n ana Tua Moote, are ana toro te Atua.

Ngke a tiring taian tiibuteteei n te Riao kanoan Rewi, ao a anga teutana te raraa nakoia ibonga, ao ibonga a katimtim'a i aon te baonikarea.

18Angiia aomata ake a roko mai Eberaim, Manate Maeao, Itakara, ao Teburun a bon tuai kaitiakia, ma a aki kubara ana Tua te Atua ao a boni kana naba te tiibu teteei are b'ain te Toa are te Riao.

19A reke iroun Etekia, ao e a ataa te b'ai ae a tia ni karaoia ao e tataro: “Te UEA ae te Atua, a tuai n itiaki n aron tuan baika a tabu. Ma a bon taromauriiko naba n aron are a karaoia aia bakatibu. Taiaoka, kab'arai aia bure.”

20E kaeka ana tataro Etekia te UEA ao e aki katuaaia.

21Ao a rangi ni kukurei taan taromauri i Ierutarem ao a bukamarua te Toa i nanon itiua te bong. A anene n nebo kanoan Rewi ao taiani ibonga nakon te UEA ni katoa bong ao katangi aia b'ai ni katangitang.

22Ao Etekia e kaaitauia kanoan Rewi i bukin karaoan taian m'akuri ae e raoiroi, are kairiia aomata i nanon waakin te bootaki.

A bukamarua te Toa taan taromauri i nanon itiua te bong n anga taian karea, ao ni kang taian am'arake ake a tabu, ao n neboa te UEA are Atuaia aia bakatibu.

23Ao a bane n rangi ni kukurei aomata ni kabane ao a kukurei ni bukamarua riki aia bootaki i nanon itiua riki te bong.

24Ma ngaia are, e anga Etekia teuana te ngaa te kao ao itiua te ngaa taian tiibu aika a na kareanaki ma ni kabonganaaki b'a te am'arake are e tabu. Ao ana mataniwi a anga teuana te ngaa taian kao ao tebwina te ngaa taian tiibu, ao a manga m'aiti riki ibonga ake a kukurei nanoia b'a a na ri nanon te bootaki i bukin kaitiakaia.

25Ao a bane ni kukurei aomata ni kabane, reitaki ma aomata ake mai Iuta ao Iteraera, ake taiani ibonga ao kanoan Rewi, ibonga, ao iruwa ake a maeka i Iuta ao Iteraera.

26Bon te kabanea ni buubura ni bootaki i Ierutarem man ana tai te uea are Toromon, are natin Tawita te m'aane.

27Ao a bubutiia te Atua ibonga ao kanoan Rewi b'a e na kakab'aiaia aomata, ao e karaoa anne mani mwengana are i karawa.