Te Otinako 36 - Kiribati New Version Bible

1E a tia te UEA n angan Betarera, Ooriaba, ma ake tekorakina taiani konab'ai aika kainanoaki i bukin karaoan te tabo n taromauri, ao a riai n iri ana kaetieti te UEA.

2Ao e bootia taan m'akuri Moote aika a kukurei nanoia ni karaoa te m'akuri,

3ao e anganiia te m'ane ake a tia n anga aomata i bukin karaoan te tabo n taromauri. Ni koauana, a bon tia n anga aomata te m'aiti ni m'ane ae e rangi ni m'aiti ni katoa ingabong,

4n tokina a katoka aia m'akuri aomata nako

5ao a taku, “Moote, e a bon rangi ni m'aiti te m'ane i aon are ti tangiria i bukin te b'ai are E a tia n anganiira te UEA b'a ti na karaoia.”

6Ma ngaia are, e a kanakoa ana taeka Moote b'a a na katoka aia angab'ai aomata, ao a karaoa arei.

7Ao e a bon tia n reke ae e rangi n raka i aon are e tangiraki i bukin katiaan te m'akuri.

Karaoan te Um'antabunrianna ma B'aina nako Irouia Taani M'akuri aika Bairaoi(Te Oti 26.1-14)

8Ao a bootaki taani m'akuri ake a bairaoi ni karaoa te um'antabunrianna ma keetenna taian riinen aika a rarangaaki ma buraen te tiibu aika buru, uraro, ao a uraura ma ni katamaroaaki n te korooti ae tamneia baike a maiu aika iai baiia ni kiba.

9Bon tebwiina m'aitin taian m'akorokoro ni kunnikai aika tebwi ma uoua te miita ab'akiia ao uoua te miita raababaia n tatabeua nako.

10Ao a ituuaki n ti teuana ni karaoaki b'a rooki aika uoua aika nimaua m'akorokoroia.

11Ao i mwiina, kanim nimabwi taian taninga ni kimoa

12aika a karaoaki n te kunnikai ae e buru ni kabutaa iteran te keeten are e ab'ab'aki riki,

13ao manga kabaeai taian keeten akana uoua akanne n taninga ni kimoa akanne n taiani matau aika koora aika nimabwi m'aitiia.

14I bukin ngkanne b'ain nako te auti n rianna,

15e na kamanenaaki buraen te kooti ni rarangaaki iai m'akoro ake tebwi ma teuana b'a tebwi ma tenua te miita ab'akina ao uoua te miita raababana n tatabeua nako.

16A na tomaaki taian m'akoro aikai ni karaoaki b'a uoua te keeten, are teuana bon nimaua m'akorona, ao are teuana bon onoua m'akorona,

17A kanim'aki taian taninga ni kimoa n iteran te keeten are e anaanau riki,

18ao a kabaeaki taian keeten ake uoua n taian taninga ni kimoa ma taian matau aika buraonti aika nimabwi.

19A karaoaki naba taian rabuna ake uoua-are teuana e karaoaki n te riinen ae e tamaroa ao are teuana man kunin te tiibu mm'aane ae e kaurauraaki.

Riin te Um'antabunrianna(Te Oti 26.15-30)

20E kamanenaaki te kai te aketia ni karaoaki iai kain oon te Um'antabunrianna.

21Kain oon te Um'antabunrianna teuana bon aua te miita rietana ao onobwi ma onoua te tientemiita raababana

22ma uoua taian beke i rarikin ooia.

23Ao a katukaki uoua taian kaintei aika taian tirewa i aan kain te oo n tatabeua nako ma nib'aia i bukin taian beke,

24b'a a aonga ni konaa n tomaaki n tii teuana.

25Uabwi mai buakon kain te oo aikai ake a kamanenaaki

26n iterana are maiaki ao uabwi riki n iterana are meaang.

27Onoua kain te oo a kamanenaaki n oo ake mai buki n iterana are maeao

28ao uoua riki ake n iterana are koona maiaki maeao ao meaang maeao.

29A tomaaki kain te oo aikai mai taubukina nako oina.

30Bootan kain te oo ake a nim man te oo are mai buki bon wanua ao uoua taian kaintei aika a tirewa i aaia n tatabeua nako.

31Nimaai taian kai ni kamatoa aika a karaoaki

32i bukin teuana kain te oo,

33teuana te kai ni kamatoa are e ira ab'akin te oo.

34A kabiraki kain te oo ni kabane ao taian kai ni kamatoa n te koora, ao taian m'am'a ake nim ma kain te oo i bukin karinan taian kai ni kamatoa.

Rokin Nanon te Um'antabunrianna(Te Oti 26.31-37)

35A karaoi keeten man te riinen ae rarangaaki man te burae n tiibu ae e buru, ae e uraro, ao a e uraura, ao korotinaki bannan baike a maiu aika iai baiia ni kiba.

36A karaoi naba aai amona man te kai te aketia aika a kabiraki n te koora. Ao manga m'am'a aika a kanim'aki ma taian boua ake a kateaki i aon taian kaintei ake taian tirewa.

37A kamanena te keeten ae karaoaki man te riinen ae e tamaroa ae e rarangaaki man te burae n tiibu ae e buru, ae uraro, ao e uraura ao e katamaroaaki n te korooti ae e rangi ni tamaroa.

38A karaoi naba nimaai taian boua aika a kabiraki n te koora, ao a katei n tatabeua nako i aon te kaintei te buraonti are e kabiraki n te koora. Kabaneana raoi, a kanim ukin taian keeten.