1Kanoan te boki aei bon ana taetaenikawai Moote ake e karaoi ngke a mena Iteraera n te aba are Moaaba. A boni kaemb'a i rarikin te tabo ae Tuba i nanon te rereua i mainikun te karaanga are Ioretan. E mena te kaawa are B'aran n iteran aia maeka are teuana, ao kaawa ake Tobera, Rab'an, Aterota, ao Ritaaba n iteraia are teuana.
2Tebwi ma teuana te bong kawaran Kaatetib'aania mai Oreb'a n te kawai are Tabukin Teira.
3Ni moanibongin te katebwimateuana n nam'akaina, n te kaabwi n ririki, ao Moote e tua b'aai ni kabane nakoia Iteraera n aron are e tuangnga te UEA.
4E karaoa aei imwin tiringan te uea are Taion, are aia uea Amoraite, are e tautaeka ngkoa i Etibon; ao te uea naba are Oka, are aia uea kaain Batian, are e tautaeka ngkoa i Atiterota ao i Eterei.
5Ngke a mena i tani mainikun te Ioretan n aonon Moaaba, ao Moote e a tib'a kab'arab'arai ana tua ma ana kaetieti nako te Atua.
E taku,
6“Kaain Iteraera, ngke ti kateimaeka n te Maunga are Tinai, ao E tuangiira te UEA ae Atuara ni kaangai:
‘E a bati n tau maanimi n tiku ikai.
7Kam na kiitana ikai nako abaia kaain Amora ma kaain rarikiia ake kaain Kanaan. A reke i nanon te aba aei aaba aika M'aruan te Karaanga are te Ioretan, te aba are e tabukibuki, aaba ake a rinano ake i maeao, Rereuan Maiaki, mataniwiin Taari are te Mereterenian, Maungan Reb'anon, ao aaba ni kabane ni karokoa te Karaanga are te Iuberetiti.
8I anganingkami ngkai te aba aei n aron are I a tia ni berita iai nakoia ami bakatibu ake Aberaam, Itaaka, ao Iakob'a. Kam na nako ngkai n taua te aba.’ ”
Rineaia Taani Kairiri(Te Oti 18.13-27)Ao e taku Moote:9“Mai mwiin tuangakira iroun te UEA b'a ti na kiitana te Maunga are Tinai, ao I kaangai nakoimi:
‘Te m'akuri ae te kairiiri iroumi Iteraera, bon te b'ai ae rangi n rawawata nakon te aomata ae ti temanna.
10E a tia te UEA ae Atuara ni kakab'aiaira, ao ngkai ti a bon rangi ni m'aiti n ai aron itoini karawa.
11Ao E a manga tia riki ni berita te Atua b'a E na kakab'aiaira teuana riki tengaa rakan m'aitira nakon are mai m'aaina, ao I tataro b'a E na boni kakoroa bukina.
12Ma I a bon aki kona ni karaoi ami kangaanga ma ngurenguremi ni kabane n ti ngai.
13Kam na karekeia ami aomata man ami baronga nako akana kam taku b'a a boni wanawana ma n ataib'ai, ao N na karaoia m'aane akanne b'a taani kairiiri i aomi nako.’
14Ao kam kaekaai ni kaangai, ‘Ngaia, bon te iango ae e raoiroi anne.’
15Ao i mwiina, I anaia m'aane akanne, ao I rineia b'a ami tia kairiiri. Tabeman mai buakoia a riki b'a mataniwi n tautia i bukiia teuana tengaa te tautia, tabeman, i bukiia tebubua te tautia, tabeman, i bukiia nimangaun te tautia, ao tabeman, i bukiia tengaun te tautia.
16Ao tabeman naba, a riki b'a taani moti. I angania taani moti tuua aikai:
“Ngkana kam ongoraai taian tangitang, ao kam na karaoa raoi te babaaire ae eti. Kam na katitebooi aron ami babaaire nakoia aomata ni kabane aika Iteraera, ke iruwa akana a maeka i buakomi.
17Kam na katitebooi naba ami babaaire nakoia aomata aika mangori ma aika korakora. Kam na aki maaka te aomata temanna. E aoria ngkana iai ae kakannato ae e kaoti n te bowi. E na buokingkami n anganingkami mooti aika raoiroi te Atua.
Ngkana e rangi ni matoatoa te tangitang nakoimi, ao kam na uotia nako iu b'a N na baaireia.”
18Ao ngke I a tia n anganiia taani moti kaetieti aikai, ao I a manga kab'arab'araa nakoimi ana Tua te UEA.
Kanakoakiia Mm'aane B'a A Na Tuoa Te Aba Ake A Tabukibuki(War 13.1-33)Ao e taku Moote nakoia Iteraera:19“E a tia te UEA n tuangiira b'a ti na kiitana te Maunga are Tinai ma ni kawari aaba ake a tabukibuki ake abaia kaain Amora. Ma ngaia are, ti a m'ananga nakon te rereua are rangi ni korakora. I taku b'a kam bon uringa makura n te tai anne, ma ti waekoa n roko i Kaatetib'aania,
20ao I tuangngkami ni kaangai, ‘Ti a roko ngkai n aaba ake a tabukibuki.
21A b'ainna ngkai kaain Amora, ma E a anganiira ngkai ara UEA ae te Atua. Bon te Atua naba are a tataromauria ara bakatibu, ao E a tia n tuangiira b'a ti na anaa te aba aei, ma ngaia are, kam na aki raraoma, ke ni maaku.’ ”
22Ao kam bane ni kawarai ao kam taku, “I m'aain are ti nako n ninia te aba, a na kanakoaki moa tabeman m'aane b'a a na tuoa te aba. Ao ngkana a okirikaaki, ao a na kona n tuangiira rongorongon te kaawa arei, ao ti na kona iai n ataa te kawai are ti na toua nako ikekei.’
23“E tara n ae te iango ae e raoiroi, ma ngaia are, I rineia tengaun ma uoman m'aane, kakatemanna man taian baronga nako.
24Ao a tuoi aaba ake a tabukibuki ni karokoa M'aruan te Amwi
25ao a uoti rikaaki naba tabeua amwi ni uaa. Ao a taku, “E a anganira abara ae e raoiroi te UEA ae Atuara.”
Rawaia Kaain Iteraera N Ongotaeka Nakon Te UEA(War 14.1-45)Ao e taku Moote nakoia Iteraera:26Kam rawa n rin n te aba, ao kam rawa naba n ongotaeka iroun nakon te UEA ae Atuami.
27Kam ngurengure i nanon ami autinrianna, ao kam taku, “E a bon ribaira te UEA—E kaotinakoira mai Aikubita b'a E na anga ngaira nakoia kaain Amora b'a a aonga n tiringiira.
28Ti a rangi ni maaku i bukina b'a a taku koraki ake a nako n tuoa te aba b'a a rangi ni buubura kaawa akekei, ma ooia aika rietaata nako karawa. Ao a ab'ab'aki man korakora riki aomata ake a maeka ikekei nakoira, ao bon taian Anakim tabeman mai buakoia. Bon akea te tabo ae ti na nako iai.”
29Ao I taku nakoimi, “Kam na aki raraoma.
30E na kaira te kawai te UEA ae Atuara, E na buaka i bukira, n aron are ti nooria ngke E karaoi b'aai ni kabane nakoia kaain Aikubita.
31Ao kam bon ataia b'a E boni kaawakiniira te UEA n taai nako ngke ti mena n te rereua, n aromi ngkana kam uouota natimi temanna.”
32Ma kam bon teimatoa naba n aki onimakina te UEA,
33e ngae ngke E a tia ni memena iroura n te rereua. E mena te UEA i nanon te nang n te ngaina, ni kairiira nakon te tabo ike ti na nako iai, ao ni kaota naba nakoira te tabo are ti na kateimaeka iai. Ao n te tairiki, E mena i nanon te ai.
34Kam kauna te UEA, ao E taku:
35“Kam rangi ni buakaka ngkami kaain te roro aei, ao I bon aki kariaia b'a kam na rin n te aba ae e raoiroi are I berita iai nakoia ami bakatibu.
36Bon ti Kareb'a are natin Iebunne te m'aane ae I kariaia mai buakoia ami roro aei ae na rin. E ongotaeka raoi irou ni b'aai ni kabane, ma ngaia are, N na anganna ma kanoana te aba are e a tia n tuoa.
37Ao E bon un naba nako iu te UEA i bukimi, ao E taku, “Moote, N na bon aki kariaia b'a ko na rin naba n te aba arei.
38E na onea mwiim Iotua, N na kariaia Iotua are te tia buokiko b'a e na kairiia Iteraera n taua te aba. Ma ngaia are, ko na kaungaa nanona.”
39Ao i mwiina, E a manga taetae te UEA nakoimi ni kaangai:
“Kaain Iteraera, kam taku ngkoa b'a a na tauaki natimi aika uarereke b'a taenikain te buaka i bukin te aba. Ma n te bong teuana, ao N na kariniia n te aba, ao a na taua te aba arei n Au buobuoki ao a na maeka ikekei.
40Kam na tanrikaaki ngkai ma n oki nakon te rereua ni kawain Taari are Uraura.”
41Ao i mwiina kam a manga taku nako iu, “Ti a tia n aki ongotaeka nakon te UEA ae Atuara, ma ngkai ti tangiria n ongotaeka i rouna. Ti na nakon aaba ake a tabukibuki ma ni buaka, n aron are E a tia n tuangiira.” Ao kam anai ami b'ainibuaka, b'a kam taku b'a e bebete anaakin aaba ake a tabukibuki.
42Ma E taku te UEA nako iu, “Moote, tuangiia b'a a na aki m'ananga nakon aaba ake a tabukibuki ni buaka. N na bon aki buokiia, ao ane a na konaaki irouia aia kairiribai.”
43Ao I tuangngkami Ana taeka te UEA, ma kam aki tabe iai. Kam aki ongotaeka i rouna, ao kam boni m'ananga naba nakon aaba ake a tabukibuki. Kam rangi ni kantiab'ai.
44Ma ngke a buakaningkami kaain Amora man aaba ake a tabukibuki man aia kaawa, ao kam birinako mairouia kaanga ai aron ae kam birinako mairouia te taanga ni manibeeru. Ao a kakioia ami taanga ni buaka kaain Amora nako Teira ni karokoa Orema, ao a tiringiia i nanon aia tai ni kakioia.
45Ao i mwiina, kam okira te tabo n taromauri are i Kaatetib'aania ma n tanginiwenei iai, ma E aki ongora te UEA nakon ami tataro.
Ririkin Tikuia Kaain Iteraera N Te RereuaAo e taku Moote nakoia Iteraera:46“Ao i mwiin tikura i Kaateti i nanon tabeua nam'akaina, ao ti a ongotaeka nakon te UEA, ao ti a okira te rereua ni kawain Taari are Uraura.
Who We AreWhat We EelieveWhat We Do
2025 by iamachristian.org,Inc All rights reserved.
