1N te ririki are e mate iai te uea are Utia, ao I noora te kaotioti i bukin te UEA. E tekateka i aon te kaintokanuea i eta, ao e kaona nanon te Tembora niiniirana.
2Ao a kibakiba ietana b'aai aika a maiu aika a ura aika kakaoneai baiia ni kiba n tatabemaniia nako. A rabuni mataia ni baiia ni kiba ake uaai ao a rabun rab'ataia n ake uaai, ao a kamanenai baiia riki ake uaai ni kibakiba iai,
3ngke a takaarua ni kaangai,
“E tabu, e tabu, e tabu,
te UEA ae Moan te M'aaka!
E on aonnaba
ni mimitongina.”
4Ao a ruru bouan nako mataroan te Tembora, ao e on te Tembora n te bubu.
5Ao I takaarua ni kaangai, “I a reke n te kabuanib'ai! A bane n on n te bure au taeka aika I atong, ao ai uana naba ma aia taeka aomata nako aika i rarikiu. Ma e ngae n anne, ma I a tia n noora te UEA ae Moan te M'aaka.”
6Ao e kiba nako iu temanna mai buakon b'aai ake a maiu ma te kooro ae e ura ae anaaki man te baonikarea n te karibai ae te biti.
7E riinga riau n te kooro are e kabuebue ao e taku, “E a tia ni boo ma riam. A kab'araaki am bure, ao akea am bure.”
8Ao i mwiin aei, ao I ongo ana taeka te UEA ae e kaangai, “Iai ae e konaa n nako? Iai ae e na nako i bukira?”
Ao I kaeka ni kaangai, “N na nako, kanakoai!”
9Ao i mwiina e a kanakoai te UEA ao I taekina te rongorongo aei nakoia aomata ni kaangai:
“Kam na ongo man ongo,
ma kam na aki ataa nanona.
kam taraia man taraia,
ma kam na aki nooria.”
Ao e taku naba te UEA,
10“Karaoaia aomata aikai b'a a na taningabono!
bonoti
taningaia,
rabun mataia,
karaoaia b'a a na aki ataa te b'ai teuana.
Tai katanimaia nako iu
b'a a na kamaiuaki.”
11Ao i mwiina, I a titirakina te UEA ni kaangai, “A toki n ningai baikai?”
Ao e kaeka te UEA:
Ni karokoa a mauna nako aia kaawa nako ao a rereua aia auti, ni karokoa akea kanoan aia tawaana,
12ao a tia ni kanakoaki nakon taabo aika a raroa nako, ma ni kiitan abaia aika a urubekebeke.
13E ngae ngkana ti teuana te katebwina aomata n tiku, N na bon tiringiia naba. A na riki b'a kaanga boton kaai aika a tia ni koreaki ni kab'akaaki, A na tiku tabeman au aomata aika a rineaki.
Who We AreWhat We EelieveWhat We Do
2025 by iamachristian.org,Inc All rights reserved.
