Te Tua-Kaua 10 - Kiribati New Version Bible

Karekean Tuua Ake Tebwina Te Kauoua N Tai(Te Oti 34.1-10)Ao e taku Moote nakoia aomata:

1E tuangai te UEA b'a N na manga korei taeka i aon atiibu n te unika, n aron ake E anganai mai m'aaina. Ao E tuangai naba b'a N a karaoa te Atiniberita te kai, ao i mwiina, N na kawaria ni kaitibo ma Ngaia i aon te maunga.

2E tuangai b'a E na koroi taeka aika ti te bo ma ake a m'akoro i aon atiibu ake I urui i aon atiibu aika boou, ao N na kaawakin n te Atiniberita.

3Ma ngaia are, I karaoa te Atiniberita man te kai ae te aketia, ao I karaoi taian atiibu aika uoua aika raababa ni katotoong ake I urui. Ao i mwiina, I tam'arakea te maunga

4ike E koroi iai tuua ake 10 te UEA i aoia, n aron are E a tia ni karaoia n te moan tai. Bon ti te bo raoi tuua aikai ma ake E anga man te ai, ngke kam ikotaki n te maunga.

Ao ngke a tia te UEA n anganai taian atiibu,

5ao I uotirikaaki n iteran te maunga are teuana, ao I karin i nanon te Atiniberita, n aron are E mwiokoai iai. Ao bon ake a mena ikekei.

Maten Aaron(War 20.22-29)Ao e taku Moote nakoia Iteraera:

6Ao e maan i mwiina, ao ti a manga katei maeka i rarikin taiani m'anib'a ake aia b'ai kanoan Iaakan ao i mwiina, ti a manga m'ananga nako ao ti a manga katei maeka i Motera, ike e mate iai Aaron ma n taunaki naba iai, ao e a manga riki ni ibonga natina are te m'aane are Ereata.

7Ao i mwiina, ti a manga katei maeka i Kutekota, ao i mwiina, manga i Ioteb'ata, ike a mena iai taiani karaanga n ran.

Rineakiia Kanoan Rewi B'a Taan Uouota Te AtiAo e taku Moote nakoia Iteraera:

8Ao i mwiin karinan atibu ake a tabu i nanon te Atiniberita, ao te UEA E rineia kanoan Rewi b'a tiaki ti taan uouota te Atiniberita, ma a na riki naba b'a taiani ibonga n te tabo n taromauri, ao a na kakab'aiaia naba taiani baronga n Arana. Ao a bon karaoi naba baikai ngkai.

9Ao E berita te UEA b'a E na teimatoa ni karekei aia b'ai kanoan Rewi, ao boni ngaia anne bukina ae E aki anganiia iai abaia, ngke E tib'atib'a te aba i aoia taiani baronga.

Kaekaakin Ana Tataro Moote Iroun Te UEA(Te Oti 34.9,10,27-29)Ao e taku Moote nakoia Iteraera:

10Ao ngke I a tia ni uoti taiani kauoua n atiibu ni waerakea te maunga, ao I kabanea 40 te bong ma te ngaina ikekei, n aron are I karaoia naba ngkoa. Ao E a manga kaeka naba au tataro te UEA, ao E aki tiringingkami.

11Ao E kaangai nako iu, Moote, katauraoiko b'a ko na kairiia aomata nakon te aba are I a tia n berita iai nakoia aia bakatibu. Te B'ai Ae Tangiria Te UEAAo e taku Moote:

12Kaain Iteraera, tera te b'ai ae tangiria te UEA mairoumi? E tangiria te UEA b'a kam na karinea ma n iria, ao n tangiria ma ni m'akuri i bukina ma nanomi ao tamneimi ni kabane,

13ao n ongotaeka nakon ana Tua ma ana Reirei ake I a tia n anganingkami n te bong aei, ao a na nakoraoi b'aai ni kabane i bukimi.

14Ana b'ai te UEA ae Atuami b'aai ni kabane, tiaki ti Ana b'ai te aonnaba ma kanoana ni kabane, ma bon Ana b'ai naba eta ma taiani karawa ake kabanea n rietaata.

15Ma e bon rangi ni korakora tangiraia ami bakatibu iroun te UEA, ao E tangiria ni karikiia b'a Ana b'ai. Ma ngaia are, E rineia ma kanoaia mai buakoia botannaomata ake tabeua, ao n te bong aei kam bon teimatoa naba n riki b'a ana Aomata.

16Uringa ami boraraoi ma te UEA, ao katoka ami taningamatoa.

17E m'aaka riki te UEA ae Atuami nakoia atua ao uea tabeman, ao E na riai ni maakaki m'aakana are rangi ni korakora. A bane n eti n taai nako Ana babaire ni kabane, ao kam aki kona ni kamaraatona b'a E aonga ni bita Ana iango.

18E teetei te UEA i bukiia ataei aika akea aia karo, ao aine aika a mate buuia. E kakawakiniia iruwa ma n anganganiia kanaia ao kunnikaia.

19Ao kam bon riai naba ni kaawakiniia, b'a bon taiani iruwa naba ngkoa ngkami i Aikubita.

20Karinea te UEA ae Atuami, m'akuri i bukina, ao kam na berita n arana n ti Ngaia.

21Aanga ami nebonebo nakoina, b'a kam a tia n nooria ni karaoi kakai aika kakamaaku i bukimi.

22Ngke a moani m'ananga ami bakatibu ni maeka i Aikubita, ao ti itingaun m'aitiia. Ma E a tia te UEA ni kakab'aiaingkami, ao ngkai kam a rangi ni m'aiti riki nakon taiani itoi i karawa.