Iobi 34 - Kiribati New Version Bible

Ana kauoua n taetae Eriu.Kam taku Ngkami B'a kam Wanawana

1Ao e taku Eriu:

2Boni ngkami aomata aika kam wanawana,

ao kakauongo nako Iu!

3Kam ata te am'arake ae kangkang ngkana kam katoongnga,

ma kam aki atai taeka n rabakau ngkana kam ongo.

4E bon nakoira ataakin te eti ma te raoiroi.

5E kamatoa Iobi n taekinna b'a tiaki te tia bure ngaia,

ma e bon rawa te Atua ni karaoa te motikitaeka ae eti nako ina.

6Ao e taku, “N na kanga ni kewe n taekinna b'a I bure?

I a kaani mate ma I bon tuai bure naba.”

7Ko a tia n nonora te aomata ae aekakin Iobi?

E aki kukubara te Atua.

8E tatangiriia raoraona aika aomata aika buakaka,

ao e airiiri ma taani bure.

9Ao e taku b'a bon akea

manenan kakaraoan nanon te Atua.

10Ongora i Rou ngkami aika taani wanawana!

E koaua b'a E kona ni karaoa te b'ai ae kaairua te Atua ae m'aaka?

11E anganiia aomata kaniwangaia n te b'ai are a boni karaoia,

ao E karaoa nako ia te b'ai ae bon riai n reke nako ia.

12E aki karaoa ae buakaka te Atua ae m'aaka;

E aki kona ni karaoa ae aki raoiroi nakon temanna.

13E koaua b'a E karekea m'aakana te Atua mai roun temanna?

E koaua b'a iai ae anga te aonnaba nakon te Atua b'a E na taua taekana?

14Ngkana E a manga anaa te ikeike ni maiu te Atua are E a tia n anga,

15ao a na bane ni mate aika maiu

ma ni manga oneaki rab'ataia ni manga okira te tano.

16Ao ko na ongora i Rou ngkai ngkana ko taku b'a ko wanawana.

17Ko kabuakaka te Atua ae raoiroi?

Ko taku b'a E riba te motikitaeka ae eti?

18E kabuakakaia uea ma taan tautaeka te Atua

ngkana akea uaaia, ke ngkana a buakaka.

19E aki tei n aia itera taan tautaeka,

ke n raoniia riki aomata aika kaub'ai nako ia aika kainano,

kioina ngke E bon karikia aomata ni kabane.

20Ti na karina ni mate n te tairiki.

E oroira te Atua ao ti mauna nako.

E tiringiia aika korakora ao akea Ana kangaanga iai.

21E nooria aomata n taabo nako ike a nako iai.

22Bon akea te rotongitong

ae kona ni karaba te tia bure mai roun te Atua.

23E aki kainanoa te tai teuana te Atua

are E na motiki iai taekara.

24E aki tangira te kareke rongorongo

ngkana E na kakerikakiia taan kairiiri man aia tabo, ni manga onei mwiia.

25I bukina ngkae E atai baika karaoi,

ngaia are E karaanga nakoia, ao E kamanatuaia n te tairiki.

26E oroia tani bure i mataia aomata,

27i bukina ngke aikoa onimakinna,

ma n aki tabe ma Ana tua.

28A imanonoia aomata aika kainano b'a a na tang nakon te Atua,

ao E ongo b'anaaia ni kan buokiia.

29Ngkana e bon taku te Atua b'a akea te b'ai ae na karaoia,

ao akea temanna ae kona n tiribureia.

Ngkana E karaba matana, e na aki reke buokaia aomata.

30E na bon akea te b'ai ae a na kona ni karaoia botannaomata

n totokoia taan karawawataia aomata ake akea atuaia man aroia n tautaeka i aoia.

31Iobi, ko a tia ni kaoti am bure nakon te Atua,

ao ni berita b'a ko na aki manga bure riki?

32Ko a tia ni butiia te Atua b'a E na kaoti am kaairua nako Im?

Ao ko a tia ni kariaia b'a ko na katoka te m'akuri ae buakaka?

33Ko tiriburei baika E karaoi te Atua,

ao ko iangoia b'a E na karaoa te b'ai ae ko tangiria?

E mena te baaire i roum ao tiaki i Rou;

tuangiira ngkai te b'ai ae ko iangoia.

34E na kariaia aei te aomata ae iai ana iango,

ao e na taku te aomata ae wanawana ae ongo i Rou

35b'a e taetae n nanobaba Iobi,

ao bon akea nanon baika e taekin.

36Iangoi b'aai ni kabane aika e taekin Iobi,

ao ane kam na nooria b'a e taetae n aron te aomata ae buakaka.

37E aki ti bure nakon te Atua, ma e katei naba nako Ina;

e b'ainingarea te Atua i matara ngaira aikai ni kabane.