1E weewete te wanawana,
ri nanon te ataib'ai ae e rangi ni korakora.
2Ngke e tei n te tuuta ni kawai
ao i aon taian tabuki.
3E tei i rarikin mataroan te kaawa
ike a rinrin iai aomata nakon te kaawa,
ao e takaarua ni kaangai;
4“I weeweteingkami
n tatabemaningkami nako!
5Te iangoraoi ma ana babaaire te nano
ana konaa n riki b'a am b'ai.
6Ongora, b'a a rangi ni boongana
b'aai aika I taekin.
7I aki toki n tataekina te koaua
ao I aki kan taekina te kewe.
8A bane n raoiroi baika I taekin,
bon akea teuana mai buakoia ae e na kaairua
ke na kam'aam'ane.
9“Ngkana iai iroumi te ataib'ai,
ao ane kam na noori au taeka
b'a boni b'aai raoi aika kam kainanoi.
10Ke a riki taian reirei ma taian rabakau
b'a baika a uaana riki nakoim
nakon te koora ae te kabanea n itiaki ke te tirewa.
11E kakaawaki riki te wanawana nakon
te b'ai ni katamaroa ae e raoiroi
ke b'aai nako aika a tangiraki.”
B'anaan te Wanawana12Bon te Wanawana ngai
bon raoraou ni koaua te iangoraoi;
Au b'ai te rabakau
ao te motikitaeka ae e raoiroi.
13Ngkana ko karinea te UEA,
ao ko na ribaa te buakaka.
I ribaa te kamoamoa ao te kainikatonga
ao te kewe ni kam'aam'ane.
14I korakora
ao I anga
te taeka n reirei ao te motiraoi.
15A kairiiri taiani uea ni m'aakau
ao a karaoi taian tua taan tautaeka
aika a eti.
16A bane n tautaeka taani kairiiri aika a raoiroi
i aan au buobuoki.
17I tangiriia aomata ni kabane aika a tangirai,
ao n na boni kuneaki irouia ni kabane
akana ukoukorai ma te nano ni koaua.
18I konaa ni karikiko b'a te kaub'ai ma n rangi ni kinaaki,
mani kakannato ao n teetekeraoi.
19E rangi ni kakaawaki
te b'ai ae ko karekea mairou
nakon naba te koora ae te kabanea n raoiroi
te tirewa ae te kabanea n itiaki.
20I aki toki ni kaakaraoa te raoiroi,
21ao I anga taiani kaub'ai aika a korakora
nakoia ni kabane aika a tangirai.
22E karikai moa te UEA i m'aain b'aai nako,
ana moan m'akuri, ni boong ake ngkoa.
23I karikaki ngke e moan karikaki b'aai,
i m'aain rikin te aonnaba, i m'aain b'aai nako.
24Ngke I bungiaki,
bon akea marawa
ke taian koburake n ran.
25I bungiaki i m'aain
rikin taiani maunga
ke katukan taian tabuki ni nneia.
26E riki aei i m'aain ae e karaoa
te aonnaba te Atua
ke ana katawanang nako
ke taian tanobon.
27I mena ikekei ngke e katikui
taiani karawa te UEA ni nneia
ma n taakina nako karawa
i aon taari.
28Bon raou ngke e katikui
taian nang i karawa
ao e kariki taiani koburake n ran
ake a kanoaa marawa.
29I mena ikekei ngke
e kawenea tian taari
b'a e na ongotaeka i rouna,
ao ngke e kawenei taian aana
ake a na bakatokoa te aonnaba.
30I boni mena raoi i rarikin te UEA
ma ni buokia ni baairei mani karaob'ai.
I kakukureia ni katoa bong,
ao I kukurei ngke I mena i rarikina.
31I rangi ni kukurei n te aonnaba aei
ao I kukurei naba irouia ana aomata.
32Ongora raoi irou, natiu!
Iri nanon au taeka n reirei
ao ane kam na kukurei.
33Kakauongo raoi
nakon au reirei nako,
ao ane kam na wanawana.
34Nakomai nakon au auti ni katoa bong
ao ongora irou.
Ao ane kam na kunea te kukurei.
35Ngkana kam kuneai ao kam na kunea naba te maiu,
ao ane e na kukurei te UEA
iroum.
36Ma ngkana kam aki kuneai,
ao kam bon kammarakiko i bon iroum,
ao ngkana ko ribaai,
ao kam tangira te mate.
Who We AreWhat We EelieveWhat We Do
2025 by iamachristian.org,Inc All rights reserved.
