Karikani B'aai 16 - Kiribati New Version Bible

Nei Aka ao Itimaera

1Ao e tuai mani karika natin Aberam Nei Tarai are buuna. Ma bon iai ana toro te aine Nei Tarai ae kaain Aikubita ae arana Nei Aka,

2ao e taku nakon Aberam, “E tuukai te UEA man te kariki. E aera ngkai ko aki wene ma au toro te aine? E na mena ngkoa, ao e na reke natiu i rouna.” Ao e kariaia Aberam ana taeka Nei Tarai arei.

3Ma ngaia are, e anga Nei Aka nakon Aberam b'a buuna ni kewe. (E riki aei i mwiin maekan Aberam i Kanaan i nanon tebwina te ririki.)

4Ao ngke e a tia ni wene Aberam ma Nei Aka, ao e a bikoukou Nei Aka, ao e a rangi ni kamoamoa, ao e a aki kubara Nei Tarai.

5Ao e taku Nei Tarai nakon Aberam, “E bon nako mairoum te b'ai aei ngkai e a manga aki kubarai Nei Aka. I bon anganiko ngkoa, ao ngkai e a ataia b'a e a bikoukou, ao e a aki kubarai. Ke E baairei taekara te UEA b'a antai ae bure mai roura, ngkoe ke ngai.”

6Ao e taku Aberam, “E rangi n tamaroa, bon am toro, ao e mena i aan am babaire; karaoa ane ko bon taku nako ina.” Ao e karaoa ae aki tau Nei Tarai nakon Nei Aka ni karokoa e a biri nako Nei Aka.

7Ao e kaitibo Ana anera te UEA ma Nei Aka n te koburake n ran are n te rereua are n te kawai nako Tiura

8ao E taku, “Nei Aka ae ana toro Nei Tarai, Ko nako mai ia, ao ko na nakea?”

9Ao e taku neierei, “I biri nako mairoun au toka.”

Ao e taku te Atua, “Naako okiria, ao bon ongotaeka naba i rouna.”

10Ao E a manga taku riki, “N na anganiko kanoam ae moan te m'aiti ae akea temanna ae kona ni warekia.

11E na riki natim te mm'aane, ao ko na aranna b'a Itimaera, b'a e a tia n ongo tangim te UEA.

12Ma e na riki natim ae kaanga maiun te aati ae aki manana, e na kaaitaraia aomata ni kabane, ao e na kaitaraki irouia aomata aika m'aiti. E na aki maeka i buakoia ana koraki.”

13Ao e taku Nei Aka i nanona, “I a kara ao I a noora te UEA, tao E kamaiuai b'a N na taetaekinna!” Ma ngaia are e arana te UEA are E a tia n taetae nakoina b'a, “Te Atua ae matairiki.”

14Ao boni ngaia anne bukina are a arana te m'anib'a aomata are i marenan Kateti ma Bereta b'a “Ana M'anib'a Teuare E Maiu ae noorai.”

15Ao e riki natin Aberam te mm'aane iroun Nei Aka, ao e aranna b'a Itimaera.

16Ao ai 86 ana ririki ni maiu Aberam n te tai anne.