Itaia 44 - Kiribati New Version Bible

Ana Berita Te UEA Nakon Iteraera

1Kaain Iteraera,

I a tia n rineingkami

b'a au tia m'akuri.

2Bon ami tia karikib'ai Ngai.

I tararuaingkami

ngke kam tuai naba bungiaki.

Iteraera, kam na aki maaku!

Bon au tia m'akuri ngkami ae kam rineaki,

maamaten nanou.

3N na kakab'aia te aba ae e m'autakataka

ni kanakoa taiani karaanga n ran,

N na kakab'aia ami kariki

n anganiia Tamneiu

4A na bwebwerake kaanga taiani uteute

ke kaai aika wiiro

aika a mena i rarikin taiani karaanga n ran.

5A na taromauriai

ao a na riki b'a au aomata.

Ane a na korea arau

i akuun baiia.

6Bon te UEA Ngai ae Moan te M'aaka,

Te moa ao te toki,

ae ti Ngaia te Atua ae ti temanna.

Iteraera, I a tia ni kamaiuko!

Bon am Uea Ngai.

7Iai ae e konaa ni kabotauaki ma ngai?

Ngkana iai, ao ake a taetae

tuangai n te tai aei.

Tuangiia b'a a na taekina te b'ai ae e a tia n riki

man te tai are I karaoa iai au botannaomata

n taai ake ngkoa,

ao ke a taekin b'aai aika a na riki

8Kam na aki ruru ni maaku!

I bon aki taekinna nakoimi n taai ake ngkoa?

Kam bon aki ongongora irou?

Bon ti Ngai te Atua

bon akea ai aron te b'aa ae e korakora. Akea Te B'ai Ae A Konaa Ni Karaoia Taian BouanantiE taku te UEA:

9Bon akea manenaia aomata aika

a kaakaraoi taian bouannanti,

ao taian bouannanti aika a kariki b'a kaub'aia

boni baika a akea maneia.

A matakii, akea kanoan aia iango, ao a baba

taan taromauri taian bouannanti.

10E aera ngkai kam karaoa te bouannanti ke bannan te b'ai teuana

ae e aki konaa ni karaoa te b'ai teuana?

11Aomata ni kabane aika a karaoi taiani bouannanti

ma koraki akana a taromauri

bon aomata

aika tokiia

bon te b'arannano ae e kananokawaki.

Kanakomaia b'a a na kaitaraai n te kabowi

n ruru ni maaku.

Bouananti Ao Kanaan te Ai

12E katea tamnein te bouannanti te tia karao biti

n te aama

ao ni kabuebuen te ai.

E taua te aama

ni baina ae e korakora,

ngkana e orea te biti

nakon teina are e tangiraki.

Ma e a manga baki ao e taka

ao e a manga akea korakorana.

13Taani m'akuri n te kai tabem'aang a baairei taiani m'akoro ni kai,

ao i mwiina, a korea aia m'aake i aona.

Ao e a kenaki te kai ma te karaurau

nakon tamneina ni koaua.

Ao ngke e a tia ao e a riki b'a kaanga taraan te aomata

ao e a karinaki i nanon te Tembora.

14E na rineaki man te buaka

tao te aroka te tiira, te m'aiango, te oke,

ke aekaki n aroka tabeua.

Ke tao bon te aroka te m'aiango

ae e unikaki irouia taani korobanna n te kai

ao e tebotebokaki n te karau.

15A kamanenaaki tabeua taiani kai i bukin

ain te kabuebue

ke te kuuka.

E karaoaki m'akoron te kai teuana b'a te bouannanti,

ao e boobaraaki te tia korobanna n te kai nako iai

ao e taromauriia.

16E kukurei nanona n te ai ae kabuebue

ao te irikomaiu are e tinimaki iai

i aon taian kooro aika a kabuebue.

17Ao i mwiin, anne e bobaraaki

n taromauria te bouannanti te kai.

ao e taku, “Kaawakinai,

bon antiu ngkoe.”

18A matakii ao a nanobaba koraki aika a taromauri taian bouannanti!

19Bon akea kanoan aia iango n ataa ae e kaangai, “I kauraa te ai ni iteran te kai ao I kuukana kanau te kariki ao te irikomaiu i aona. Ao I a manga karaoa te b'ai ae akea manenana ni m'akorona are teuana. Ao e aera ngkai I taromauria te m'akoro ni kai?”

20E kaanga te aomata n akea kanoan ana iango n taromauria te b'ai ae e konaa ni kabuokaki ni kamannangaki? Bon akea ae e konaa ni kamaiuia n aron anne. A bon aki ataia b'a te bouannanti are a taui i nanoni baiia bon tiaki taian atua ni koaua?

E Bon Aki M'aninga Taekaia Ana Aomata Te UEA

21Kaain Iteraera,

bon au taani m'akuri ngkami;

ma ngaia are, kam na uring b'aai aikai ni kabane.

Iteraera, I karikingkami,

ao bon au taani m'akuri ngkami.

I bon aki m'aninga taekami.

22Kam na okirai?

I a tia ni kamaiungkami

ao I kaitiaki ami bure nako

ngke a matenten kaanga taiani karau.

Anene N Nebo Nakon Te UEA

23Kam na tuangiia taiani karawa ma aonaaba

b'a a nang moana aia anene!

Tuangiia taiani maunga

ao taian aroka ni kabane n te buakonikai

b'a a na ira buakon te anene!

E a tia te UEA ni kamaiuia ana Aomata;

ao ngkai a nang taromauria.

E Karaoi B'aai Nako Te UEA

24Iteraera, bon ami UEA Ngai.

Boni Ngai boton maiumi.

ao I a tia ni kamaiungkami.

I kariki b'aai nako

ma i karawa i eta

nakon te aba i nano.

25I kariki aia kewe burabeti ni kewe

ao nanobabaia taani kaiwa.

I anaa wanawanan te aomata

ao I karikia b'a te b'ai ae akea nanona.

26N na kakoroi bukin aia rongorongo

au burabeti.

A taku, “E na kaonaki

i rouia aomata,

ao e na manga karaoi

kaawan nako Iuta te UEA.”

27Bon Ngai ae I baairea

taari ma karaangana nako

b'a a na m'autakataka.

28Boni Ngai naba are I kaangai,

“E na kairiia au aomata Tairati

ao e na ongotaeka nakon au babaaire.

E na manga karaoaki Ierutarem

ao te Tembora.”