1.Rongorongo 26 - Kiribati New Version Bible

Anganakiia Taan Tantani n te Tembora Tabeia

1A bwenauaaki naba taan tantani n te Tembora nakon taiani m'akoro ni kaineti ma aia kaainga nako.

Meteremia are natin Kore te m'aane man te kaainga are Kora bon ana kariki Ataba.

2Bon iai natina m'aane aika itiman aika a bungiaki n aron aei man te karimoa nakon te karimwi: Tekaria, Ieriaera, Teb'aria, Iateniera

3Eram, Ieoanan, ao Erioenai.

4E a tia ni kakab'aiaki Obeta-Etom ma natina m'aane ake waniman:

5Temaia, Ieotabata, Ioa, Taka, Netanera, Ammiera, Itakara, ao Beuretai.

6Temaia bon tamaia Oteni, Reb'aera, Obeta, Eretabata, Eriu, ao Temakia.

7Bon taani kairiiri ngaiia aika a karineaki man aia kaainga.

8Bon onongaun ma uoman m'aitiia ana kariki Obeta-Etom aika a bon tau korakoraia n teiakina te Tembora.

9Tengaun ma waniman ana kariki Meteremia aika a rineaki i bukin te m'akuri aei.

10Ota are kaain te kaainga are Merari boni ngaia tamaia Timri, Irekeia, Teb'aria, ao Tekaria.

11E a tia Ota ni karika Timri b'a te tia kairiiri n te utu, e ngae ngke tiaki ngaia te karimoa te m'aane. Tengaun ma teniman man ana utu Ota ake a rineaki b'a taan tantani n te Tembora.

12A bwenauaaki taan tantani nakon taian m'akoro i aaia aia taani kairiiri n aia utu, ao a anganaki tabeia n te Tembora, n aroia kanoan Rewi ake tekorakina.

13Ao a anganaki tabeia te mataroa b'a a na tantani iai, ao a kakaea nanon te Atua b'a tera ae e tangiria b'a a na karaoia.

14E rineaki Teremia b'a te tia tantani n te Mataroa are i Mainiku. Natina te m'aane are Tekaria bon te aomata ae e wanawana ngaia are e rineaki b'a te tia tantani n te Mataroa are i Meang.

15Ao e a manga rineaki Obeta-Etom b'a te tia tantani n te Mataroa are i Maiaki, ao a rineaki natina m'aane b'a taani tantani n taian ruunib'ai.

16A rineaki Tubim ma Ota b'a taan tantani n te Mataroa are i Maeao ao te Mataroa are Tiareketa n te kawai are i eta.

Aikai kaetietin te m'akuri i bukin te m'akuri n te bong koraki i bukin tabeia taan tantani ake a anganaki:

17N te bong ae koraki ao a na tei onoman taan tantani i mainikun te Tembora, a na tei aman taan tantani n te itera are mai meang, ao aman man te itera are mai maiaki. Kakauoman taan tantani i bukin taian ruunib'ai ake uoua.

18Ao aman aika a na tantani n te kawai are e nakon katawanangin te Tembora are i maeao, ao uoman taan tantani aika a tiku n are bon katawanangin te Tembora.

19Ao aikanne tabeia m'aane man te kaainga are Kora ao Merari ake a anganaki.

Anganakiia Tabeia Taan Tantani n Taiani Kaub'ai ke taabo aika kakawaki

20A anganaki tabeia kanoan Rewi ake ana koraki kanoan Kora ma Merari tabeia b'a a na tantani ni kaub'ain te Tembora ao b'aintangira ake a tia ni katabuaki b'a a na b'ai te Atua.

21Ratan bon kaain te kaainga are Kerition ao bon taman Ieieri. Angiia ana kariki bon taani kairiiri man te utu i nanoni kaainga.

22Ieieri bon tamaia Tetam ao Ioera, ao tabeia bon te tantani n taiani kaub'ai.

23Taan tantani ake tekorakina ake n taiani kaub'ai bon kaain te kaainga are Koata ake kanoan Amram, Itiia, Eberon ao Utiera.

24Tebuera bon ana kariki Keritiom are natin Moote te m'aane. Bon ngaia te mataniwi i bukin b'aai aika kakawaki n te Tembora.

25Aikai ana kariki tarin Keritiom are Erietera: Reabia, Ietiaia, Ioram, Tikeri, ao Teromota.

26Tabeia Teremota ma ana koraki bon tararuaakin taiani b'aintangira ake a tia ni katabuaki b'a a na b'ai te UEA. A reitaki naba i nanon aikai b'aintangira ake e a tia te uea are Tawita ni katabui, n reitaki naba ma ake a katabuaki irouia taani kairiiri man taiani utu, ao mataniwi n taian taanga ni buaka.

27N taai nako are a reke iai b'ai aika a rangi ni boongana i nanon te buaka, ao a uoti m'aane aikai tabeua nakon te Tembora.

28Bon tabeia Teromota ma ana koraki tararuaakin taian b'aintangira aikai ake e a tia n anganaki te Tembora, n reitaki naba ma ake mairoun Tamuera are te burabeti, te uea are Tauro are natin Kiti te m'aane, Abenera, are natin Neera te m'aane, ao Ioaba, are natin Teruia te m'aane.

Anganakiia Mataniwi ake tekorakina Tabeia

29Kenania are kaain te kaainga are Itiia ma natina m'aane bon mataniwi n te tautaeka ao taani moti. A aki m'akuri n te Tembora.

30A anganaki Atiabia are kaain te kaainga are Eberon ao teuana te ngaa itibubua ana koraki aika bane aroia b'a taiani mataniwi ake a na tararua waakin te aro ni kabane ao taiani karikirake i nanon te tautaeka n aban nako Iteraera ake i maeaon te Karaanga are te Ioretan.

31E riki Ieriia b'a te tia kairiiri n te kaainga are Eberon. E anganna tabena Tawita n reitaki ma uoua te ngaa itibubua man ana koraki aika taani kairiiri man aia utu aika a karineaki b'a a na riki b'a taan tararuaa bootakin te aro ma ana karikirake te tautaeka n te baronga are Reuben, Kata, ao Manate Mainiku.

32E kunei taekaia m'aane aikai i nanon ana ka abwi n ririki n tautaeka Tawita, ngke e reke i rouna araia utu nako i nanon te kaainga ae Eberon. Boni kaain te kaawa ae Iatera n te aba are Kireata.