1N te tai aei, ao e a aoraki Etekia ao e a kaani mate. Ao e roko Itaia ni kawaria ao e taku nako ina, E taku te UEA b'a e na aki reke marurungim. Ko nangi mate, ma ngaia are, ko a riai ni waakina karaoani b'aai aika a riai ni katiaaki.
2Ao e rairaki Etekia nakon te o ao e tataro ni kaangai,
3Tai m'aninga te UEA are I a tia ni kakaonimaki nakoim. I a tia n ongotaeka iroum ma nanou ni kabane, ao I karaoi b'aai ni kabane ake Ko tuangai. Ao i mwiin arei ao e a tang ni korakai Etekia.
4I m'aain rokon Itaia i nuukan te bareti,
5ao E kaokia te UEA nakon Etekia ma te rongorongo ae kaangai:
Etekia, bon Au tia tautaeka ngkoe i aoia au Aomata, ao boni Ngai te UEA ae te Atua, are E taromauriaki iroun am bakatibu are Tawita. I ongo am tataro, ao I nooriko ngke ko tang. N na boni kamarurungko, b'a ko aonga ni konaa ni manga taromauriai n au Tembora i mwiin tenibong mangkai.
6N na kamaiuko i nanon tebwi ma nimaua riki te ririki, ma ni kaawakiniko ao te kaawa ae e buubura mairoun uean Aturia. N na kaawakina te kaawa aei b'a karineau ao karinean au toro are Tawita.
7Ao e taku Itaia nakon ana toro te uea, Uoti mai tabeua taiani biiku aika a tia ni kamantaki ao katokai i aon manekan te uea. E a marurung.
8E titiraki Etekia nakon Itaia ni kaangai, Ko konaa n anganai te kakoaua b'a E na kamarurungai te UEA, b'a I aonga n i konaa n taromauriia i nanon ana Tembora i nanon tenibong?
9Ao e kaeka Itaia ni kaangai, E na anganiko te kakoaua te UEA b'a E na boni kakoroa bukin ana Berita. E na waerake nuun bungintaai tebwiina te kainararake i aon te kaintam'arake ke e na keerikaaki tebwiina te kainararake?
10Ao e kaeka Etekia ni kaangai, E boni wawaerake taai ngkana e oti, ao e na kangaa ni manga okirikaaki?
11Ao e tataro Itaia, ao E karaoa te nu te UEA b'a e na okirikaaki tebwiina te kainararake i aon te kaintam'arake are e karaoia Aati.
E Teimatoa ni Memena Te UEA Iroun Etekia12E a uea ngkai i aon B'aburon Merotaake Baratan, are natin Baratan te m'aane. Ao ngke e a ataia ae e a aoraki Etekia, ao e a kanakoa te tia uarongorongo ma te reta ao te b'aintangira nako ina.
13E butim'aaia taan uarongorongo Etekia ao e kaoti nakoia taian tirewa ni kabane, ma koora ni kabane, boiarara ni kabane, ao taian b'a ake a mena n ana autinib'ai. Ao e boni kaota naba nakoia te tabo are e kaawakin iai ana b'ai ni buaka. Bon akea te b'ai teuana n ana bareti ao n abanueana ae e karabaa nakoia.
14Ao e titirakina Etekia Itaia ni kaangai, A roko mai ia m'aane aikai? Tera ae a tangiria?
Ao e kaeka Etekia ni kaangai, “A m'ananga n te kawai ae e raroa mai B'aburon.”
15Ao e titiraki Itaia ao e taku, Tera ae ko kaotia nakoia?
Ao e kaeka Etekia ao e kaangai, I kaoti b'aai ni kabane i nanon abanueau.
16Ao e taku Itaia nakon Etekia:
Iai te rongorongo nakoim mairoun te UEA.
17N te bong teuana ao b'aai ni kabane aika ko a tia ni kaawakin ma ake a tia naba ni kaawakin am bakatibu n te autinib'ai, a na manga bane ni uotaki nako B'aburon. E a tia ni berita te UEA b'a a na akea te b'ai ae e na tiku.
18A na uotaki nako naba ake bon oin natim m'aane, ao a na kab'ainrangaki ma ni karaoaki b'a taani m'akuri n ana bareti te uea.
19Ao e iango i nanona Etekia ao e taku i nanona, E na bon ti rau ara botannaomata i nanon te tai ae e uarereke. Ma ngaia are, e taku nakon Itaia, Akea te kaangaanga n te rongorongo ane ko uotia nako iu mairoun te UEA.
Maten Etekia(2 Rongo 32.32-33)20A tauaki rongorongon b'aai ni kabane ake e karaoi Etekia i nanon ana tai n uea n ikotaki ma arona ni karaoa te nei are i eta ao kawain te ran n rin nako Ierutarem, n te boki are Rongorongoia Uean Iuta.
21E mate Etekia ao e a manga uea natina te m'aane are Manate.
Who We AreWhat We EelieveWhat We Do
2025 by iamachristian.org,Inc All rights reserved.
