Etita 7 - Kiribati New Version Bible

Maten Aaman

1Ma ngaia are, e a nako te uea ma Aaman n am'arake ma Nei Etita

2te kauoua n tai. Ao e a manga titirakina riki neierei te uea ni kaangai, Nei Etita ae te ueanaine, tera ae ko tangiria? Tuangai b'a N na karaoia i bukim. E aoria ngkana iteran abanueau.

3Ao e kaeka te ueanaine are Nei Etita ni kaangai, Ngkana ko kukurei iai te uea ae ko karineaki, ao te b'ai ae I tangiria, I tangiria b'a N na kamaiuaki ma au aomata.

4I a tia ni kabooaki nako ma au aomata b'a ti na tiringaki. Ngke tao arona b'a ti kabooaki nako b'a ti na toronaki, ao N na bon aki karongoaa, ao N na bon aki katabetabeko iai. Ma ngkai i aoni kawaira n tiringaki.

5Ao e kaekaa te ueanaine te uea are Keatiti ni kaangai, Antai ane e konaa ni karaoa te m'akuri anne? E ngaa te aomata anne?

6Ao e taku Nei Etita, Bon ara kairiribai, bon te tia karawaawataira, te m'aane ae e buakaka ae Aaman.

Ao e taraa te uea, ma te ueanaine Aaman ma te maaku.

7Ao e teirake te uea i bukin marakin nanona, e kiitana te ru arei, ao e otinako nakon nnenarokan te bareti. E kakoauaa raoi Aaman b'a te uea e na bon katuaaea i bukin te b'ai aei. Ma ngaia are, e tiku i rarikin te ueanaine ni buubutiia b'a e na kamaiua.

8E eeinako nako aon ana kaintekateka Nei Etita, b'a e na buubuti nanoangaana, ao ngke e oki te uea nakon te ru man te nne n aroka, ao e nooria n arona arei, ao e takaarua ni kaangai, Tera ae e kataia ni karaoia te m'aane ae e buakaka aei? E na kataia n taua te ueanaine i matau ikai, i nanon oin au bareti?

Ngke e tabe n taetae te uea, ao e a roko naba te toro temanna n rabuna atuun Aaman.

9Ao e taku Arebona ae temanna mai buakoia oin ana toro te uea, Te uea ae ko karineaki, e a tia ni karaoa te kainikabaeroroa ae uabwi ma uoua te miita rietana i rarikin ana auti, b'a e na kabaea roroan Moretekai i aona. Ao bon ti Moretekai ae e kaoti rongorongo ao e kamaiuko.

Ao e taku te UEA, Kabaea roroan Aaman i aon oin ana kainikabaeroroa.

10Ao e anaaki Aaman ni kabaeaki roroana i aon te kainikabaeroroa are e na kabaea iai roroan Morotekai, ao e a toki unin te uea.