1Ao e ongo Atoniteteka are uean Ierutarem, aron Iotua ngke e taua te kaawa are Ai, ma ni kamaunaa ma n tiringa te uea n ai aron are e karaoia naba ngkoa nakon te kaawa are Ieriko ma ueana. E ongo naba rongorongoia aomatan Kibeon are a raoi ma Iteraera ao a maeka i buakoia Iteraera.
2Ao a rootaki n te maaku ae korakora aomatan Ierutarem i bukina ngke e buubura te kaawa are Kibeon b'a e iorooro buburana ma kaawa ake iai ueaia; e buubura riki nakon Ai ao a rangi n rabakau ni buaka m'aanena ni kabane.
3Ma ngaia are e kanakoa ana taeka Atoniteteka nakon Oam are uean Eberon, nakon Biram are uean Iaremuta, ao nakon Iabia are uean Rakiti, ao Tebia are uean Ekiron ao e kaangai,
4“Nakomai b'a kam na buokai ni buakana Kibeon b'a a tia ni karaoa te boraraoi n raoi ma Iotua ao aomatan Iteraera.”
5Ao a ikoti aia taanga ni buaka uean Amoraite ake niiman; are uean Ierutarem, ma uean Eberon, ma uean Rakiti, ao uean Ekeron ao a katobibia Kibeon ao a buakanna.
6A kanakoa aia taeka aomatan Kibeon nakon Iotua ngke e kaemb'a i Kirekara ao e kaangai, “Tai kitaniira, taiaoka kawaekoa n nakomai ni kamaiura, b'a a kabooi nanoia uean Amoraite ake aaba akea tabukibuki ni buakaniira.”
7Ma ngaia are a nako Kibeon Iotua ma ana taanga ni buaka ni kabane, n reitaki naba ma ana taanga ni buaka aika a rangi ni korakora.
8E taku te UEA nakon Iotua, “Tai maakuia I a tia n anganingkami te tokanikai i aoia. Bon akea temanna mai i buakoia ae e na konaa ni kaaitarai ngkami.”
9Ao a nakonako n te tairiki arei mai Kirekara nako Kibeon, ao a buakaniia taian Amoraite n te aro ae a aki kaantaningaaki.
10E kabuai aia iango taian Amoraite te UEA, ao a roko aia taanga ni buaka Iteraera n tiringiia man te angaatai ke te angamaing. Ao a kakioia nako aia taanga ni buaka taian Amoraite nakon te kawai are i Beta-oron man tiringiia ni karokoa a roko ni kaawa ake i Ateka, ao Maketa.
11Ngke a tabe ni birirake n te kawai are i Beta-oron tautian Amoraite, ngke a birinako mai i rouia aomatan Iteraera, ao e kab'aka te karau te atiibu aika a korakora te UEA i aoia ni karokoa rokoia i Ateka. A m'aiti taian Amoraite ake a mate n taian atiibu ake a b'aka nakoia ake a mate n aia kabaang aomatan Iteraera.
12Ao e buokiia aomatan Iteraera te UEA n te bong arei b'a aonga n tokanikai i aoia taian Amoraite. Ao ngke e a tia n tataro Iotua nakon te UEA ao e taetae ni kanenea b'anaana i mataia Iteraera ni kaangai,
“Taai ko na tei n aki kakam'akuri i aon Kibeon,
ao ngkoe ae nam'akaina, ko na tei naba n aki kakam'akuri i aon te m'arua are Aiiaron.”
13Ao e tei n aki kakam'akuri taai ma nam'akaina ni karokoa tokanikaia Iteraera i aoia aia kairiribai.
14E tuai man ririki aei ma ngkoa ae E na ongotaeka te UEA i roun te aomata, ao e tuai naba man riki man te tai arei ni karokoa te bong aei. B'a E tei te UEA i bukiia ana aomata.
15Ao i mwiin anne ao e oki rikaaki Iotua ma ana taanga ni buaka nakon aia kaemb'a i Kirekara.
Taenikaia Uean Amoraite Ake Niiman Iroun Iotua16Ao ngke a tabe ni kakioaki taian Amoraite i rouia aomatan Iteraera, ao a birinako ni karabaia uean Amora ake niiman n te b'angani matang are i rarikin M'aketa.
17Ao iai tabem'aang tautia ake a nooriia ao a tuanga Iotua.
18Ao e taku Iotua, “Karabinoi atiibu aika a korakora ni bonota matan te b'angani matang ao katikuia tabeman tautia b'a a na teiakiniia.
19Ao nikirami kam na nako n reitanako kakioaia taian Amoraite b'a a na aki manga reke aia tai n okira aia kaawa. E a tia n anganingkami te UEA ae Atuami te tokanikai i aoia.”
20Ao a bane n tiringiia aomatan Amoraite Iotua ma ana tautia, ma ti tabeman mai i buakoia ake a reke maiuia ngke a biri nako ni karabaia n nonon aia kaawa.
21Ao a bane n oki rikaaki tautian Iteraera nakon aia kaemb'a i M'aketa ma te rau. Ao bon akea riki ae manga taetae n eekaanako Iteraera man te tai arei n te aba arei.
22Ao e taku Iotua, “Kauka matan te b'angani matang ao uotiia mai uea ake niiman nako iu.”
23Ao e kaukaki matan te b'angani matang ao a anaaki uean Ierutarem, ma Eberon, ma Iaremuta, ma Rakiti, ma Ekeron,
24ao a uotaki nakon Iotua. Ao e weteia aomatan Iteraera ni kabane Iotua ao e tuangiia ana mataniwi ake a iria n te tai arei b'a a na katokai waeia i aon roroaia uea aikekei. Ao a karaoa anne mataniwi.
25Ao e a manga taku Iotua nakoia ana aobitia, “Kam na tai maaku, ao tai koerikaaki. Kam na korakora ao kam na ninikoria, b'a bon aio te b'ai ae E na karaoia te UEAnakoia ami kairiribai ni kabane.”
26Ao e kabaei roroaia uea aikekei Iotua; temanna i aon tekaina te aroka, ao e katinetinei rab'ataia ikekei ni karokoa te bong.
27Ao e tua Iotua b'a a na anaaki rab'ataia ngke e a bung taai, ao a na karenakoaki rab'ataia n te b'angani matang are a bon karabaia ngkoa iai. Ao a anaaki atiibu aika a korakora ao e bonotaki iai matana. Ao bon akekei naba ni karokoa boong aikai.
Tauan abaia taian Amoraite riki tabeua i roun Iotua28Ao e a manga buakana Maketa ma ueana Iotua ma n taua n te bong naba arei. E tiringiia aomatan te kaawa ni kabane. Ti te bo te m'akuri are e karaoia nakon uean Maketa ma are e karaoia naba ngkoa nako uean Ieriko.
29I mwiin anne ao e a manga m'ananga nako Iotua ma ana taanga ni buaka mai M'aketa nako Ribena; a katobibia te kaawa ao a buakanna.
30Ao e a manga katokanikaia naba aomatan Iteraera te UEA i aon te kaawa arei ma ueana. Bon akea temanna ae kamaiua, a bane n tiringiia kaain te kaawa ni kabane. Ao a manga karaoia naba nakon Ribena te b'ai are a karaoia naba ngkoa nakon uean Ieriko.
31I mwiin anne, ao e a manga m'ananga nako Iotua ma ana taanga ni buaka ni buaka mai Ribena nako Rakiti; a katobibia te kaawa ao a buakanna.
32E anga te tokanikai te UEA nakoia Iteraera i aoia Rakiti n te bong are i mwiina. Bon akea temanna ae a kamaiua; a tiringiia kaain te kaawa ni kabane, n ai aron are a karaoia naba ngkoa nakoia aomatan Ribena.
33Ao e roko uean Keeta are Oram b'a e na buoka Rakiti, ma e konaaki naba n te buaka i roun Iotua.
34I mwiina riki, ao e a manga m'ananga naba Iotua ma ana taanga ni buaka mai Rakiti nako Ekeron, a katobibia te kaawa ao a buakanna.
35A taua te kaawa n te bong naba arei, ao a tiringiia kaaina ni kabane, n ai aron are a karaoia naba ngkoa nakon Rakiti.
36I mwiin anne ao e manga m'ananga naba Iotua mai Ekeron ma ana taanga ni buaka ri aon tabuki nako Eberon, ao a buakanna,
37ao a taua te kaawa. A tiringa te uea ma aomatana ni kabane ake iai, n reitaki naba ma kaawa ake i rarikina nako. Ao e urubekea te kaawa Iotua n akea nikirana, n ai aron are e karaoia naba ngkoa nakon te kaawa are Ekeron. Bon akea temanna ae e reke maiuna.
38Ao e a manga rairakiia Tebira Iotua ma ana taanga ni buaka ni buakanna.
39E taua te kaawa ma ueana, ma kaawa nako ake i rarikina. A tiringiia aomata ni kabane. Bon ti te arona are e karaoia Iotua ngkai ma are e karaoia naba ngkoa nakoia uean ma aomatan Eberon ma Ribena.
40E taua aonteaba ni kabuta Iotua. E bane ni konaia uean aaba ake a tabukibuki, ma aaba ake a rinano ake i maeao, ake n Rereuan Maiaki ao n te aono are e karaabee rikaaki nakon Taari are Mate. Bon akea ae e kamaiua, b'a e bon bane n tiringiia b'a bon ana mwioko te UEA ae Atuaia Iteraera.
41E taui aaba Iotua ni moa mai meang mai Kateti B'anea ni karokoa Kata i rarikin taari n reitaki naba ma aaba ake i Koten ni karokoa Kibeon i meang.
42E buakan ma n taui kaawa aikai Iotua ni m'anangana ae ti teuana, kioina ngke E raonna te UEA ae Atuaia Iteraera ni buaka i bukiia.
43I mwiin anne ao a oki Iotua ma ana taanga ni buaka nakon aia kaemb'a are i Kirekara.
Who We AreWhat We EelieveWhat We Do
2025 by iamachristian.org,Inc All rights reserved.
