1Bon te UEA ae e tararuaia taan tautaeka,
n aron raangan taiani karaanga
aika e a tia ni baairei aroia.
2N tabetai, ti iangoia
b'a ti karaoa ae e raoiroi,
ma e atai baike inanora
n taai nako te UEA.
3Karaoan ae e raoiroi ao ae e riai
e boni kakukureia riki te UEA
nakon te angab'ai.
4A kainikatonga aomata aika a buakaka
ao a kamoamoa,
ma bon akea riki arokaia
ae a unikia i rarikin te bure.
5Ngkana kam baaire raoi ma ni m'akuri korakora,
ao a na m'aiti ami b'ai;
ngkana kam ienikuri,
ao tokimi bon te maiu ni kainano.
6Bon te mii ae e nanobaba
karekean te kaub'ai man te aonikai
kaanga ai aron te bakabure.
7Kam bon uruana aromi i bon iroumi
ngkana kam iowawa man tiritiri
ma n rawa ni maiuakina te raoiroi.
8A bane ni kewetaia taan aonikai,
ma a na boni karaoa ae e raoiroi
akana akea aia bure.
9E raoiroi riki te maeka i tinaniku
i taubukin te auti
nakon te maeka i nanon te auti
ma te ainenum'a ae e meremere n taai nako.
10A tangiria aomata aika a buakaka ni karaoa te kaairua,
ni bon nakoia naba raoraoia nako.
11A reirei aika a nanobaba aika akea aia iango
ni katuaeakiia tem'angina;
e reirei te aomata ae e iangoraoi
n taian taeka n reirei.
12E babaaire raoi te Atua n taai nako!
E atai baika a karaoi aomata aika a buakaka
ao e na bon katuaaia.
13Ngkana kam aki buoka te aomata ae e maiu ni kainano,
tai iangoia b'a a na ongo b'anaam aomata
ngkana kam tang ni buubuti buokami.
14E na kamaiungkami mairoun ane e rangi n un
te kamaraato ae e raba.
15A na kukurei kaain te aba,
ao a na maaku taan aonikai
ngkana e karaoaki te motikitaeka ae e eti.
16Ngkana kam katoka kamanenaan ami iangoraoi,
ao kam na kuneingkami
i nanon te ruanimate.
17Taani mooi manging ao tabem'aang
aika a ti kakaaea te kukurei
a na bane n akea aia b'ai aike irouia.
18E na reke maiuia ana aomata te Atua,
ma a na kab'akai mwiin b'aai nako
aomata aika a buakaka.
19E raoiroi riki te mena i nanon te rereua
nakon te mena n te mwenga ma te ainenum'a, ae e meremere
ma ni ngurengure.
20B'aina te iangoraoi ao kaikoa
te kaub'ai aika a kakaawaki—
kam na aki bakataei
n ai aron te nanobaba.
21Ngkana kam kataia ni karaoa te akoi ma te raoiroi,
ao kam na kakab'aiaki n te maiu
ma te raoiroi ao te karineaki.
22E konaa ni kataenikaia te kaawa ae e on n taian tautia
ao n taua te nono
ti temanna te aomata ae e wanawana.
23E konaa ni kamaiungkami man
taiani kangaanga aika a bati
te taratara raoi n te b'ai are kam na taekinna.
24Ngkana kam kainikatonga ao kam kamoamoa,
ao ane a na atongko aomata ni kaangai,
“Te kakan rietaata!”
25Ngkana e aki tootoki nanomi
ao kam taningaroti ni m'akuri,
ao e na bon uotiko nakon te kangaanga.
26Ma a tituaraoi n taai nako,
aomata aika a ongotaeka iroun te Atua.
27E aki tabeakin aia angab'ai
aomata aika a buakaka
ma aia iango aika a buakaka te UEA.
28Ngkana kam taekina te kewe n te kabowi,
ao kam na aki kakoauaaki;
bon te tia kakoaua ae e onimakinaki
ae a butim'aeaki ana taeka.
29A bakan atai kawaia aomata aika a buakaka,
ma a iango ana aomata te Atua
i m'aain eutakin waeia.
30Kam bon aki konaa ni konaa te UEA
e ngae ngkana e m'aiti ami atatai
ke tera ami kawai.
31E bon teimatoa n tokanikai te UEA,
e ngae ngkana iai aia aoti ami taanga ni buaka
aika a tauraoi nakon te buaka.
Who We AreWhat We EelieveWhat We Do
2025 by iamachristian.org,Inc All rights reserved.
