1Ao ngke e ongo te rongorongo arei Etekia, ao e raeuaa ana kunnikai i bukin rawawatan nanona, ao e karin kunnikai aika a mangaingai. Ao i mwiina, e nako n rin n ana Tembora te UEA
2E tuanga te mataniwi n te bareti are Eriakim, ana kauoman are Tebena, ao mataniwiia ibonga b'a a na kunnikaiia ni kunnikai aika a mangaingai ao e tuanga te burabeti are Itaia ni kaangai:
3Bon taai ni kangaanga ao taai n nanokawaki taai aikai. Kaanga ai aron te aine ae e ngore ni bungiia natina, ngke e a roko ana tai ni bungiia natina.
4Taiaoka tataro i bukira ngaira aika nikira ni maiu. E kanakoa ana taanga ni buaka uean Aturia b'a e na kakaewenakoa te Atua ae e maiu. E na mena ngkoa ao E ongo te UEA te b'ai ae e taekinna ao E na karaoa te b'ai teuana, ngkana ko tataro.
5Ngke a m'ananga nakon Itaia taani kairiiri aikai,
6ao e tuangiia Ana rongorongo te UEA aikai nakon Etekia:
Bon te UEA ngai. Kam na aki kakiriwei nanomi n taian taeka ni kakaewenako ibuku mairoun ana tia uarongorongo uean Aturia.
7N na kab'araa nanona n taiani maningongoo i bukin ana kaawa. Ane e na oki, ao N na karaoia b'a e na mate ikekei n te mate ae e rangi ni kakamaaku.
8Inanon te tai anne, ao e ongo mataniwiin ana taanga ni buaka Aturia ae e a tia ni kiitana te kaawa are Rakiti te uea ao e a buakana ngkai Ribena. Ma ngaia are, e a manga nako ikekei.
9Ni bon te tai naba ae ai aron arei, ao e a ataia uean Aturia ae e nang roko Tikeraka are uean Itiobia ni buakanna. Ai ngaia are, e a kanakoa ana tia uarongorongo ma ana taeka nakon Etekia:
10Ko na aki onimakina Atuam ke ni kaburababaaki n ana taeka are aongkoa E na kaawakina Ierutarem mairou.
11Ko a bon tia n ongo rongorongora ngaira aika uean Aturia ni kamaunaiia botannaomata ake tabeua ni kabaneia. Tera ae kam taku b'a kam a boni mano iai?
12Uean Aturia ake mai m'aaiu, a kamaunai kaawan Kotan, Aran, Reteba, ma kaain Eten ni kabane ake a maeka i Terata. Tera ae a karaoia antiia nakoia?
13A tia ni mauna nako uean Amata, uean Arebata, uean Tebarewaim, uean Ena, ao uean Iwa.
Ana Tataro Etekia(Itaia 37.14-20)14Ao ngke e a tia ni wareka ana rongorongo uean Aturia te uea are Etekia, ao e uotia nakon te Tembora ao e taakinna i matan te Atua b'a e na nooria.
15Ao e tataro:
Te UEA ae Atuan Iteraera, e mena am kaintokanuea i aoia b'aai aika a maiu aika iai baiia ni kiba. Ko karaoa karawa ma aonnaba, ao bon ti ngkoe ae Ko tautaekani abanuean te aonnaba aei.
16Ma Ko na tii taraa ana m'akuri Tennakeriba ni kakaewenakoko, ngkoe ae te Atua ae Ko maiu.
17E boni koaua ara UEA b'a a tia uean Aturia n karikii taian botannaomata b'a taian rereua.
18A urui taiani bouananti ake taiani kai ao taian atiibu ake a karaoi aomatan taian botannaomata aikai man taromaurii.
19Ma boni ngkoe ara UEA ao Atuara. Ti bubutiiko b'a ko na kamaiura mairoun uean Aturia. Ao ane a na ataiko iai aomata n taian abanuea ni kabane n te aonnaba ae bon ti ngkoe te Atua.
Ana kaeka Te UEA Nakon Ana Tataro Etekia20Ao e nako Itaia ni kawara Etekia ma n tuangnga te b'ai are E taekinna te UEA ae Atuan Iteraera:
Etekia I ongo am tataro i bukin Tennakeriba are uean Aturia.
21Ao aei te b'ai ae I taekinna nakon te uea arei:
“A ribaiko kaain Ierutarem
ao a b'ainingareiko;
a ngareakiniko mai akuum.
22Tennakeriba, ko taetae ni karereanti,
ko takaarua, ao ko b'ainingareai,
Ngai ae Atuan Iteraera ae e Tabu
23Ko kariaia am mataniwi b'a a na
kakaewenakoai, Ngai ae te UEA.
Ao aei te b'ai
ae ko a tia n taekinna bon i bukim,
“I kairiia au kaanibuaka
nakon kabanean rietaatani
maungan Reb'anon.
I rinnakoa kabin buakonikaina,
ma ni koroi ni kab'akai tiira ake kabanea n tamaroa,
ao kaai aika m'aiango.
24I kaorai taian karaanga ni kabane ake
n te aba are Aikubita,
ao I nim ranin
taiani m'anib'a ake I a tia ni ken.”
25‘Tennakeriba, ongora ngkai
irou ngai ae te UEA.
I baairei b'aai aikai n taai aika a b'akanako.
Ao ko bon aki roko naba n te ataia
ae bon ti ngai
ae I baaireia b'a
ko na karaoi b'aai aikai.
Bon ngai ae I karaoiko b'a ko na urui
taiani kaawa aika a buubura aika a nonoaki.
26A rikirake ni mamaara aia aomata,
a rangi ni mangaongao.
Kaanga ai aron uteuten te tawaana ngaiia
ke uteute aika a ubuubu
aika a maiu i taubukin te auti ae e boraoi,
aika a rai i m'aain ae a ikawai.
27“I atai rongorongom ni kabane,
I ataia naba ma aron
korakoran unim irou.
28I a tia n noora kainikatongam
ma ribaakiu
ae moan te korakora iroum.
Ao ngkai N na karina te matau
i nanoni b'airim,
ao te m'akoro ni biti i nanoni wiim,
ao i mwiina I a kaokiko
nakon te tabo are ko nako mai iai.
29Etekia, N na tuangko te b'ai ae e nang riki. N te ririki aei ko na kang taian uita aika a riki bon irouia, ao n te ririki ae e na roko ko na manga kang b'aai aika a na bwebwerake mai mwiin uita aikai. Ma n te katenua n ririki, ko na uniki taiani uita ao taian kureebe, ao ko na kana ae ko bon taia.
30A na riki koraki ake taian nikira ni maiu i aon Iuta b'a kaanga taiani nne n aroka ni kureebe aika a nene wakaaia ma ni kariki uaa.
31Bon te UEA Ngai ae Moan te M'aaka ae N na bon nooria ni kakoauaa b'a a na maiu koraki ake nikira ni maiu i aon Ierutarem.
32I berita b'a e na aki rin i Ierutarem uean Aturia, ke ni katebea ana kainikatebe nako nanon te kaawa, ke ni katobibia ma ni katauraoia nakon buakanakina.
33Ngkai bon te UEA, ao e na manga okira kawaina are e nako mai iai ao e na bon aki rin naba i Ierutarem.
34N na bon kaawakinna bon ibuku, ao i bukin au toro are Tawita.
Maten Te Uea Are Tennakeriba(Itaia 37.36-38)35E kanakoa te anera te UEA n te tairiki naba arei nakon aia kaemb'a kaain Aturia, ao E tiringiia 185,000 mai buakoia. Ma ngaia are, e a wenerua taiani mate n te ingabong are i mwiina.
36I mwiina arei, ao e a okira Aturia Tennakeriba ni maeka n te kaawa are Ninewe.
37N te tai teuana e taromauri n ana tembora antina are Nitiroka, ao e a tiringaki irouia natina m'aane ake Aterammereka ao Tiaretera n aia kabaang. A biri nakon te aba are Ararata, ao e uea i mwiina natina te m'aane are Etaraaton.
Who We AreWhat We EelieveWhat We Do
2025 by iamachristian.org,Inc All rights reserved.
