Otea Taekan Te Boki Aei - Kiribati New Version Bible

Taekan Te Boki AeiTe burabeti ae Otea e maiu ni katautauaki ma te tai are maiu naba iai te burabeti are Itaia n aia kabanea n ririki te abanuea meaang are Iteraera, i m'ain tauakina iroun Aturia n te ririki 721 BC. Aia bure Iteraera n aki ongeaba nakon te Atua boni ngaia ae uotiia nakon te katuaeaki ao te karawawataki. Otea e kabonganai bannan te maiu n taanga b'a kawain kamatataan reitakin te Atua ma ana tangira ae akea tiana ma tokina nako ia ana aomata. Ni moan m'akoron te boki ae Otea ao e bon kab'arab'araa aron maren Otea nakon Nei Komera, te buu ae aki kakaonimaki. Te burabeti e kabongana te aekaki ni banna ae kananokawaki aei b'a kabotauan bannaia aomata aika aki kakaonimaki nakon te Atua. E kauntaeka Otea b'a i bukin aia aki kakaonimaki aomata, ao ana bon riai ni butim'aea katuaeaia mairoun te UEA. Ma e bon taorimwiin naba aio Otea n anga taeka ni kaunga; e ngae ngke Iteraera a tia n aki butim'aea te Atua, ma te Atua e na bon manga butim'aia ngkana a rairaki nako ina ao e na bon kab'arai bureia. N te kauoua ni m'akoro n te boki ae Otea bon bobotan ana taetae ni burabeti Otea. E kab'arab'arai aron aia bure aomata Otea, n reitaki ma aia bure aia uea, aia ibonga, ma aia burabeti. E bon kauringiia aron katuaeakiia iroun te Atua ae na tauraoi n riki, ao ni kaungaia b'a a riai n oki nakon te Atua, b'a ana kona ni karekea te kantaninga i bukin ana nanoanga ma ana kab'arabure te Atua.Oi n iango i aon te boki aeiAna mare Otea ao ana utu 1.1—3.5

Rongorongo n ekianako Iteraera4.1—13.16

Rongorongon te rairannano ao te berita 14.1-9