Neemia 5 - Kiribati New Version Bible

Tabetaben Nanon Neemia Irouia Kainano

1Ao a ngurengure tabeman m'aane ma buuia i bukiia I-Iutaia ake iai m'aakaia

2ao a taku, “A rangi ni buubura ara utu nako, ao bon moan te korakora m'aitin te uita ae e na kamaiuia.”

3Ao a taku ake tekorakina, “Inanon tain te rongo ao ti bon anga naba ara tawaana, nnenaroka ni kureebe, ao a ara auti nakoia b'a ara kabomwi i bukin ara roun b'a ti aonga ni konaa ni kabooi taiani uita.

4Ao a taku ake tekorakina, “Ti riai n tangoa te m'ane mairouia ake iai te m'aaka irouia i bukin kab'akaan te taekiti i bukin ara tawaana ao ara nnen aroka ni kureebe.

5Bon I-Iutaia naba ngaira n ai aroia, ao bon ti te bo naba raoiroia ara ataei ma aia ataei. Ma ti bon kaakabooi nako ara ataei b'a taian toro, ao a tia n tauaki natira aine tabeman. Bon akea buokara; ao a tia naba n anaaki mairoura ara tawaana ma nnen arokara kureebe.”

6Ao ngke I ongo ngurengureia ma aia boo, ao I a rangi n un.

7Ma ngaia are, I a manga karaua ni iangoia, ao I taku nakoia taani kairiiri ao mataniwi, “Kam na kanga n tuangiia aika bon ami aomata b'a a na kab'aka te raka nakoimi?”

Ma ngaia are, I a tewea te maungatabu ao I bukiniia taani kairiiri

8ni kaangai, “Ti a tia ni kataia ni kabooia ni kaokiia ara aomata ake a kaboaki nako nakon te kataenikaiaki. Ma ngaia are ai ngkami aikai, aika kam a manga kabooi nako riki tabeman b'a ti aonga ni manga kabooia ni kaokiia!” Bon akea te b'ai ae a taekinna taiani mataniwi ao taani kairiiri, i bukina b'a a bon ataia b'a e bon koaua.

9Ao I reitanako au taeka ao I taku, “E bure te b'ai ae kam a tia ni karaoia! Ti na karinea Atuara n arora ni maiu, b'a a aonga tientaire n aki noora te kaairua iroura.

10I bon anga naba te m'ane ao te uita ngai ma au koraki ao raoraou, ma ti na aki tangira boona.

11Kam na kaoki taian tawaana ngkai, nnenaroka ni kureebe, nnenaroka n oriwa, ao taian auti ake kam a tia n anai ao taiani bakao ake a tia ni kab'akaki nakoimi.”

12Ao a taku taani kairiiri, “Ti na karaoi b'aai ni kabane akana ko taekin ao ti na kaoki aia b'ai, ao ti na aki tangiri booia.”

Ma ngaia are, I tuangiia taani kairiiri b'a a na berita i mataia ibonga b'a a na kaoki aia b'ai aomata.

13Ao i mwiina, I kabaabanea kanoan au buua ao I taku, “Ngkana kam aki kakororaoa ami berita, ao anne te b'ai ae e na karaoia te Atua nakoimi. E na kabanei ami b'ai ni kabane akana iroumi ni kanakoi, ao e na bon uoti nako naba ami auti.”

Ao a taku aomata, “Ti na kakoroi raoi bukin ara berita.” Ao i mwiina, a neboa te UEA ao a karaoi baike a tia ni berita iai.

Ana Atataiaomata Neemia

14Bon te kowana ngai i aon Iuta man ana kauabwi n ririki ni uea Atatokititi ni karokoa te katenibwi ma uoua n ririki. Ao i nanon ririki aika tebwi ma uoua aikai, ao I rawa ngai ma au koraki ni kang am'arake ake kanan te koowana.

15Taian kowana ni kabane ake i m'aaiu a bon karawaawataia aomata ni karaoia aomata b'a a na kabooi kanaia ma nimaia ao a tangira abwi te m'ane te tirewa ni katoa bong. Ao bon taian mataniwi naba aika a karawaawataia aomata. Ma I karinea te Atua, ao I taku b'a e aki riai te karawaawataia aomata.

16I kabanea au tai ni manga karaoa te oo ao I aki kabooi taiani b'ai mairouia aomata. A bane naba aomata ake raou ni karaoa are I karaoia.

17I aki toki ni kakaam'arakeia tebubua nimangaun aika bon oin au aomata aika I-Iutaia ma aia taani kairiiri, n reitaki ma ianena ake a roko man aaba ake i rarikira.

18E katauraoaki temanna te kao, onoman taian tiibu aika a rangi n tamaroa, ao taiani moa aika a rangi ni m'aiti n teuana te bong. Ao e rooroko te wain ae moan te korakora ni katoa tebwina te bong, I ataia b'a bon te uota ae e rawaawata aei nakoia aomata, ma ngaia are, I aki tangira bakaon te am'arake n aroia koowana.

19I tataro b'a e na kakab'aiaai te Atua ni b'aai ni kabane ake I a tia ni karaoi nakoia au aomata.