2.Uea 14 - Kiribati New Version Bible

Uean Iuta Are Amatia

1E uea teuare Amatia are natin Ioati i aon Iuta i nanon ana kauoua n ririki ni uea Ieoaati i aon Iteraera.

2Ai tib'a 25 ana ririki ni maiu Amatia ngke e uea, ao e tautaeka i nanon 29 te ririki mai Ierutarem, are bon ana kaawa naba tinana are Nei Ieoarin.

3E katotoonga tamana are Ioati teuare Amatia b'a e ongotaeka iroun te UEA ni kaakaraoa ae e raoiroi. Ma tiaki aron kakaonimakin ana bakatibu are Tawita.

4E aki urui baangotan Iteraera Amatia, ao a boni kamanenaaki naba b'a taabo n angakarea.

5Ni bon te tai naba are e tautaeka iai Iteraera Amatia, ao e katikiia naba n tiringiia taian aobitia ake a tiringa tamana.

6Ma a aki tiringaki natiia aobitia akekei. E a tia te UEA ni kaotia n ana tua i nanon ana tua Moote b'a a na ti katuaaeaki aomata ake a karaoa te bure, ao a na aki katuaaeaki aia utu ke natiia.

7E tiringiia 10,000 tautian Etom te uea are Amatia i nanon te M'arua are Taari. E taua te kaawa are Tera, ao e a manga aranna b'a Ioketeera, are ai bon arana naba ni karokoa te bong aei.

8N te bong teuana, e kanakoa ana rongorongo nakon te uea are Amatia are uean Iteraera: “Ko na otinako b'a N na bo ma ngkoe n te buaka.”

9E kaoka ana kaeka Ieoati ao e taku:

N te bong teuana, ao e katanoata te buakoako ni kai ae e uarereke i Reb'anon b'a e nang mare natina te m'aane ma te nati te aine ae natin te kai ae te tiira. Ma e ti roko naba te man ae e aki manana n toubekaa te buakoako ni kai are e uarereke arei.

10Tao ko taku Amatia b'a ko a rangi ni korakora i bukina ngke ko a tia ni kataenikaia Etom. Waaki nako, karaoa ami bootaki ni kukurei. Ma ko na aki tiku n am auti. Ngkana iai te kakiriwe ae ko karaoia ao ko na kaai ni kamaunaaki ma abanueam are Iuta.

11Ma e aki kan ongo Amatia, ma ngaia are, a m'ananga Ieoati ma ana taanga ni buaka nakon te kaawa are Betatemeti i Iuta ni buakana Amatia ma ana taanga ni buaka.

12Ao e taenikai ana taanga ni buaka Iuta. A bane ni biri rikaaki n okiri aia auti tautian Iuta,

13ao e tauaki Amatia iroun Ieoati.

I mwiina, e a manga m'ananga Ieoati nako Ierutarem ao e urua oon te kaawa are e buubura arei ni moa man mataroan Eberaim ni karokoa mataroan Koona, te m'akoro are 180 te mita ab'akina.

14E anai taiani koora ao taian tirewa, ao ai uana naba ma b'aai ni kabane aika a kakaawaki man ana Tembora te UEA ao kaub'ain te uea. E anaiia aomata aika b'aai ni kakoaua, ao e okira Taamaria.

15A koreaki taekan b'aai ni kabane ake e karaoi Ieoati ngke e uea, n reitaki na ana m'akuri n ninikoria ni kataenikaia uean Iuta are Amatia n te boki are Rongorongoia Uean Iteraera.

16E mate Ieoati ao e taunaki i Taamaria i rarikiia uean Iteraera ake tabeman. E a manga uea natina te m'aane are Ieroboam.

17Tebwi ma nimaua te ririki i mwiin maten Ieoati,

18ao iai tabeman aomata i Ierutarem ake a iangoa tiringakin Amatia. E reke angana ni biri nakon te kaawa are Rakiti,

19ma e a manga reke irouia aomata tekorakina ao a taua ao a tiringnga ikekei.

20Ao e uotaki rikaaki rab'atana nako Ierutarem i aon akuun te aoti ao e taunaki i rarikiia ana bakatibu.

A tauaki rongorongoni b'aai ni kabane ake e karaoi Amatia n ana tai ni uea i nanon te boki are Rongorongoia uean Iuta.

21I mwiin matena, a manga kauea natina te m'aane are Ataria are kaain Iuta, e ngae ngke ai tib'a 16 ana ririki ni maiu n te tai arei.

22Bon Ataria are e a manga kaoka te kaawa are Erata, ma ni manga kateia.

Ieroboam te Kauoman Are Uean Iteraera

23E uea Ieroboam are natin Ieoati te m'aane i aon Iteraera n ana katebwi ma nimaua n ririki ni uea Amatia i aon Iuta. E uea Ieroboam i nanon 41 te ririki mai Taamaria.

24E aki ongotaeka naba ni katotoonga ana m'akuri ae e buakaka Ieroboam are natin Nebata te m'aane, are e kareketatiia Iteraera n te bure.

25E karababaa tian Ierutarem Ieroboam mai Rebo Amata are i meang nakon Taari are Mate i maiaki, n aron are E a tia ni berita iai te UEA nakon ana toro are Iona are natin Amitai te m'aane, are bon te burabeti mai Kaata Ebera.

26E buoka Ieroboam te UEA ni karaoa aei i bukina ngke e bon noori kamaamaten rawawataia Iteraera, n te aro are ti te bo te toro ma te inaomata, ao bon akea ae e tiku b'a te tia buokiia.

27Ao i bukina ngke E a tia ni berita te UEA b'a e na bon aki kamanaunaaki ni kabane Iteraera, ai ngaia are, e a buoka iai Ieroboam ni kamaiuia.

28A bane ni tauaki rongorongoni b'aai ni kabane ake e karaoi Ieroboam ngke e uea n reitaki ma ana m'akuri n ninikoria, ao arona n taui kaawa ake Tamateko ao Amata.

29E mate Ieroboam ao e taunaki, ao e a manga uea natina te m'aane are Tekaria.